ନ୍ୟୁଜ ଡେକ୍ସ : ବଲିଉଡର ସବୁଠାରୁ ଲୋକପ୍ରିୟ ଓ ଆତ୍ମାଭିମାନୀ ଗାୟକ ଅରିଜିତ ସିଂହ ତାଙ୍କ ସଙ୍ଗୀତ ଜୀବନରେ ଏକ ନୂତନ ପର୍ବର ଆରମ୍ଭ କରିଛନ୍ତି। ବଲିଉଡ୍ ପ୍ଲେବ୍ୟାକ୍ ଗାୟନରୁ ଅବସର ଘୋଷଣା ପରେ ସେ ତାଙ୍କର ପ୍ରଥମ ସ୍ୱାଧୀନ ଗୀତ ‘ରୈନା’ ମୁକ୍ତିଲାଭ କରିଛନ୍ତି, ଯାହା ପ୍ରଶଂସକମାନଙ୍କୁ ଅଚମ୍ବିତ କରିଦେଇଛି।‘ରୈନା’ ୨୭ ଫେବୃଆରୀ ୨୦୨୬ରେ ମୁକ୍ତିଲାଭ କରିଥିଲା।
ଏହି ଗୀତଟି ଏକ ରୋମାଣ୍ଟିକ, ଶାନ୍ତ ଓ ଗଭୀର ଭାବପ୍ରବଣ ସଙ୍ଗୀତ, ଯାହା ସୁନ୍ଦର ଗୀତିକା ଓ ସ୍ୱରର ମାଧ୍ୟମରେ ପ୍ରେମ ଓ ଶାନ୍ତିର ଅନୁଭୂତିକୁ ପ୍ରକାଶ କରିଛି। ଗୀତର ଗୀତିକା ପ୍ରିୟା ସରାୟାଙ୍କ ଦ୍ୱାରା ରଚିତ ଓ ଗରୁଡ ମ୍ୟୁଜିକ୍ ବ୍ୟାନରରେ ଏହା ପ୍ରକାଶିତ ହୋଇଛି। ମୁକ୍ତିଲାଭ ପରେ ସୋସିଆଲ ମାଧ୍ୟମରେ ଗୀତଟି ଜବରଦସ୍ତ ପ୍ରତିକ୍ରିୟା ପାଇଛି।ଅରିଜିତ ଜାନୁଆରୀ ୨୦୨୬ରେ ବଲିଉଡ୍ ପ୍ଲେବ୍ୟାକ୍ ଗାୟନରୁ ଅବସର ଘୋଷଣା କରିଥିଲେ। ସେ ସ୍ପଷ୍ଟ କରିଥିଲେ ଯେ ଆଗକୁ ସେ ଚଳଚ୍ଚିତ୍ର ପାଇଁ ଗୀତ ଗାଇବେ ନାହିଁ ଏବଂ ପ୍ରଶଂସକମାନଙ୍କୁ ଭଲପାଇବା ପାଇଁ ଧନ୍ୟବାଦ ଜଣାଇଥିଲେ। ତାଙ୍କର ଏହି ନିଷ୍ପତ୍ତି ସଙ୍ଗୀତ ଜଗତକୁ ଆଶ୍ଚର୍ଯ୍ୟରେ ପକାଇଥିଲା। ତଥାପି ‘ରୈନା’ ମୁକ୍ତି ସହିତ ସ୍ପଷ୍ଟ ହୋଇଛି ଯେ ଅରିଜିତ ସଙ୍ଗୀତକୁ ଛାଡ଼ୁନାହାଁନ୍ତି, ବରଂ ସେ ଏବେ ସ୍ୱାଧୀନ ସଙ୍ଗୀତ ମାର୍ଗରେ ଆଗକୁ ବଢ଼ୁଛନ୍ତି।
ଗୀତଟି ଶୁଣି ପ୍ରଶଂସକମାନେ ଭାବପ୍ରବଣ ପ୍ରତିକ୍ରିୟା ଦେଇଛନ୍ତି। କେହି କହିଛନ୍ତି ଯେ ଏହା ଏକ ଅଦ୍ଭୁତ ରୋମାଣ୍ଟିକ ଅନୁଭବ, ଯେତେବେଳେ ଅନ୍ୟମାନେ ଏହାକୁ ହୃଦୟସ୍ପର୍ଶୀ ଭାବେ ବର୍ଣ୍ଣନା କରିଛନ୍ତି।ଅନେକ ପ୍ରଶଂସକ ଲେଖିଛନ୍ତି ଯେ ଅରିଜିତଙ୍କ କଣ୍ଠସ୍ୱରରେ ଏବେ ବି ସେହି ମାୟା ଓ ଗଭୀରତା ରହିଛି, ଯାହା ତାଙ୍କୁ ସଙ୍ଗୀତ ଜଗତରେ ଅଲଗା ପରିଚୟ ଦେଇଥିଲା। ସେ ନିଜ ସୋସିଆଲ ମାଧ୍ୟମ ଖାତାରେ ପ୍ରଶଂସକଙ୍କୁ ଧନ୍ୟବାଦ ଜଣାଇ ସଙ୍ଗୀତ ଯାତ୍ରାର ଏହି ନୂଆ ପର୍ବ ପାଇଁ ଉତ୍ସାହ ପ୍ରକାଶ କରିଛନ୍ତି।
