ନ୍ୟୁଜ ଡେକ୍ସ : ଇଣ୍ଡିଗୋ ବିମାନ ବାରମ୍ବାର ହଠାତ୍ ବାତିଲ୍ ହେବାକୁ ନେଇ ଦେଶବ୍ୟାପୀ ଅସନ୍ତୋଷ ତୀବ୍ର ହୋଇଯାଇଛି। ଏହାକୁ ନେଇ ଡିସେମ୍ବର ୬ ତାରିଖ, ଶନିବାର ଦିନ ସୁପ୍ରିମକୋର୍ଟରେ ଯାତ୍ରୀମାନଙ୍କ ପକ୍ଷରୁ ଏକ ଜନସ୍ୱାର୍ଥ ମାମଲା (PIL) ଦାୟର କରାଯାଇଛି। ଏହି ମାମଲାରେ ଭାରତର ପ୍ରଧାନ ବିଚାରପତି (CJI)ଙ୍କୁ ହସ୍ତକ୍ଷେପ କରିବା ସହ ସୁପ୍ରିମକୋର୍ଟ ଦ୍ୱାରା ସ୍ୱତଃ ତଦନ୍ତ କରାଯାଉ ବୋଲି ନିବେଦନ କରାଯାଇଛି।
ଯାତ୍ରୀମାନେ ମାମଲାରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଓ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA)ଙ୍କୁ ମଧ୍ୟ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଉ ଏବଂ ଏହି ମାମଲାର ତୁରନ୍ତ ଶୁଣାଣି ପାଇଁ ଏକ ସ୍ୱତନ୍ତ୍ର ଖଣ୍ଡପୀଠ ଗଠନ କରାଯାଉ ବୋଲି ମାଗଣା କରିଛନ୍ତି।ଯାତ୍ରୀମାନେ କହିଛନ୍ତି ଯେ ହଠାତ୍ ବିମାନ ବାତିଲ୍ ହେବାରୁ ତାଙ୍କର ହୋଟେଲ ବୁକିଂ, ବିଦେଶ ଯାତ୍ରା ଯୋଜନା ଓ ଗୁରୁତ୍ୱପୂର୍ଣ୍ଣ ବୈଠକଗୁଡ଼ିକ ଭାରି ପରିମାଣରେ ବାଧାପ୍ରାପ୍ତ ହୋଇଛି। ଏହା ଯାତ୍ରୀମାନଙ୍କୁ ଆର୍ଥିକ ଓ ମାନସିକ ହେରାସମେଣ୍ଟରେ ପକାଇଛି ବୋଲି ମଧ୍ୟ ସେମାନେ ଅଭିଯୋଗ କରିଛନ୍ତି। ଏହି ଘଟଣାକୁ ନେଇ ଡିଜିସିଏ ଇଣ୍ଡିଗୋ ବିମାନ କମ୍ପାନୀ ବିରୁଦ୍ଧରେ କଠୋର ଆଭିମୁଖ୍ୟ ଗ୍ରହଣ କରିଛି। ଡିଜିସିଏ କହିଛି ଯେ, ଇଣ୍ଡିଗୋ ଏହାର ନୂଆ ଡ୍ୟୁଟି ନିୟମ କାର୍ଯ୍ୟକାରୀ କରିବା ଓ ଉପଯୁକ୍ତ କ୍ରୁ ପରିଚାଳନା କରିବାରେ ବିଫଳ ହୋଇଥିବାରୁ ବିମାନ ଚଳାଚଳ ବାଧାପ୍ରାପ୍ତ ହୋଇଛି।
ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ ଏନେଇ କହିଛନ୍ତି ଯେ, ଇଣ୍ଡିଗୋର ଖରାପ କ୍ରୁ ପରିଚାଳନା ଏବଂ ଡିଜିସିଏ ନିୟମାବଳୀର ଭୁଲ କାର୍ଯ୍ୟାନ୍ବୟନ ଏହି ସମସ୍ୟାର ମୂଳ କାରଣ। ଏହି ଘଟଣାର ତଦନ୍ତ କରାଯିବ ଏବଂ ଯେଉଁମାନେ ଦାୟୀ, ସେମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ହେବ ବୋଲି ସେ କହିଛନ୍ତି। ସେଥିସହିତ ଧୀରେ ଧୀରେ ଇଣ୍ଡିଗୋର ସେବା ପୁନର୍ଆରମ୍ଭ କରିବାରେ ମନ୍ତ୍ରଣାଳୟ ସହଯୋଗ କରିବ ବୋଲି ମଧ୍ୟ ସେ ଆଶ୍ୱାସନ ଦେଇଛନ୍ତି। ଡିସେମ୍ବର ୬ ତାରିଖ, ଶନିବାର ସକାଳ ପର୍ଯ୍ୟନ୍ତ ଦେଶର ଅନେକ ବିମାନବନ୍ଦରରେ ଇଣ୍ଡିଗୋର ବହୁ ଉଡ଼ାଣ ବାତିଲ କରାଯାଇଛି।
କେରଳର ତିରୁବନନ୍ତପୁରମ ବିମାନବନ୍ଦରରେ ୩ଟି ଘରୋଇ ଆଗମନ ଓ ୩ଟି ପ୍ରସ୍ଥାନ ବିମାନ, ଗୁଜୁରାଟର ଅହମ୍ମଦାବାଦ ବିମାନବନ୍ଦରରେ ରାତି ୧୨ଟାରୁ ସକାଳ ୬ଟା ମଧ୍ୟରେ ୭ଟି ଆଗମନ ଓ ୧୨ଟି ପ୍ରସ୍ଥାନ ବିମାନ, ଏବଂ ତାମିଲନାଡୁର ଚେନ୍ନାଇ ବିମାନବନ୍ଦରରେ ସକାଳ ୯ଟା ସୁଦ୍ଧା ମୋଟ ୨୯ଟି ଉଡ଼ାଣ ବାତିଲ କରାଯାଇଛି।ଦିଲ୍ଲୀ ଓ ମୁମ୍ବାଇ ଭଳି ପ୍ରମୁଖ ହବରେ ମଧ୍ୟ ଅନେକ ଇଣ୍ଡିଗୋ ଉଡ଼ାଣ ବିଳମ୍ବ ହେଉଛି। ଦିଲ୍ଲୀ ବିମାନବନ୍ଦରରେ ପରିସ୍ଥିତି ଏବେ କିଛି ମାପରେ ସ୍ୱାଭାବିକ ରହିଥିଲେ ମଧ୍ୟ, ଡିସେମ୍ବର ୧୦ ରୁ ୧୫ ତାରିଖ ମଧ୍ୟରେ ପରିସ୍ଥିତି ସମ୍ପୂର୍ଣ୍ଣ ସ୍ୱାଭାବିକ ହେବ ବୋଲି ବିମାନ କମ୍ପାନୀ ପକ୍ଷରୁ ସୂଚନା ଦିଆଯାଇଛି।
