ନ୍ୟୁଜ ଡେକ୍ସ : ଅସଂଗଠିତ କ୍ଷେତ୍ରର ଶ୍ରମିକମାନଙ୍କୁ ସାମାଜିକ ସୁରକ୍ଷା ଯୋଗାଇବାରେ e-Shram Portal ଗୁରୁତ୍ୱପୂର୍ଣ୍ଣ ଭୂମିକା ନିଭାଉଛି। ସରକାରୀ ଯୋଜନା ଓ ସାମାଜିକ ସୁରକ୍ଷା ସହ ଶ୍ରମିକମାନଙ୍କୁ ସିଧାସଳଖ ଯୋଡ଼ିବା ପାଇଁ ଏହି ପୋର୍ଟାଲ ଆରମ୍ଭ କରାଯାଇଥିଲା। ପରିସଂଖ୍ୟାନ ଅନୁଯାୟୀ, ପୁରୁଷଙ୍କ ତୁଳନାରେ ମହିଳାମାନେ ଏଥିରେ ପଞ୍ଜିକରଣରେ ଅଧିକ ଆଗ୍ରହ ଦେଖାଇଛନ୍ତି।
ଯୁବପିଢ଼ିଙ୍କ ମଧ୍ୟରେ ମଧ୍ୟ ଏହି ପୋର୍ଟାଲ ପ୍ରତି ଅଧିକ ଉତ୍ସାହ ଦେଖାଯାଇଛି। ବ୍ୟବସାୟ ଭିତ୍ତିକ ତଥ୍ୟ ଅନୁଯାୟୀ, ସବୁଠାରୁ ଅଧିକ ୪୮ ପ୍ରତିଶତ ଶ୍ରମିକ କୃଷି କ୍ଷେତ୍ରରୁ ପଞ୍ଜିକୃତ ହୋଇଛନ୍ତି। ଏହା ପରେ ଘରୋଇ କାର୍ଯ୍ୟରେ ନିଯୁକ୍ତ ଶ୍ରମିକ, ନିର୍ମାଣ କ୍ଷେତ୍ରର କାର୍ମିକ ଏବଂ ବସ୍ତ୍ର ଶିଳ୍ପରେ କାର୍ଯ୍ୟରତ ଲୋକମାନେ ରହିଛନ୍ତି। ଏହି ପୋର୍ଟାଲ ମାଧ୍ୟମରେ ଶ୍ରମିକମାନେ ସରକାରୀ ଯୋଜନାର ସିଧାସଳଖ ଲାଭ, ବ୍ୟାଙ୍କ ଖାତାକୁ ଆର୍ଥିକ ସହାୟତା ଏବଂ ବିପଦ ସମୟରେ ସହଯୋଗ ପାଇ ପାରୁଛନ୍ତି। ଏହା ଦର୍ଶାଉଛି ଯେ ଲୋକେ ଏବେ ନିଜ ସୁରକ୍ଷା ଓ ଭବିଷ୍ୟତ ପ୍ରତି ଅଧିକ ସଚେତନ ହୋଇପାରିଛନ୍ତି।
ସାମାଜିକ ସୁରକ୍ଷା ଯୋଜନା ସହ ଯୋଡ଼ିବାରେ Uttar Pradesh ର ଶ୍ରମିକମାନେ ସବୁଠୁ ଆଗରେ ଅଛନ୍ତି। ଗତ ବର୍ଷ ଡିସେମ୍ବର ସୁଦ୍ଧା ପ୍ରାୟ ୮ କୋଟି ୪୨ ଲକ୍ଷରୁ ଅଧିକ ଅସଂଗଠିତ ଶ୍ରମିକ ଏହି ପୋର୍ଟାଲରେ ନିଜ ନାମ ପଞ୍ଜିକରଣ କରିଛନ୍ତି, ଯାହା ଦେଶରେ ସର୍ବାଧିକ।ଇ-ଶ୍ରମ ପୋର୍ଟାଲ କେବଳ ଏକ ଡାଟାବେସ୍ ନୁହେଁ, ଏହା ଅସଂଗଠିତ କ୍ଷେତ୍ରର ଶ୍ରମିକଙ୍କ ପାଇଁ ଏକ ସୁରକ୍ଷା କବଚ ଭାବେ ପରିଣତ ହୋଇଛି।
