ନ୍ୟୁଜ ଡେକ୍ସ : ଭାରତୀୟ ଆଭ୍ୟନ୍ତରୀଣ ଜଳପଥ ପ୍ରାଧିକରଣ (IWAI), ଓଡ଼ିଶା ସରକାର, ପାରାଦୀପ ବନ୍ଦର ପ୍ରାଧିକରଣ (PPA) ଓ ମହାନଦୀ କୋଲଫିଲ୍ଡସ୍ ଲିମିଟେଡ୍ (MCL) ମଧ୍ୟରେ ମୁମ୍ବାଇର NESCO ଗ୍ରାଉଣ୍ଡରେ ଅନୁଷ୍ଠିତ ଇଣ୍ଡିଆ ମେରିଟାଇମ୍ ୨୦୨୫ ଅବସରରେ ଏକ ଐତିହାସିକ ବୁଝାମଣାପତ୍ର (MoU) ସ୍ୱାକ୍ଷର ହୋଇଛି। ଏହି ଚୁକ୍ତି ଓଡ଼ିଶାର ନଦୀ ପ୍ରଣାଳୀ ମାଧ୍ୟମରେ ସ୍ଥାୟୀ ମାଲ ପରିବହନ ଓ ଆଞ୍ଚଳିକ ଆର୍ଥିକ ଅଭିବୃଦ୍ଧିକୁ ଗତି ଦେବ।
ଏହି ପ୍ରକଳ୍ପ ମାଧ୍ୟମରେ ଜାତୀୟ ଜଳପଥ-୫ (NW-5) ଏବଂ ଜାତୀୟ ଜଳପଥ-୬୪ (NW-64) ର ବିକାଶ ଓ କାର୍ଯ୍ୟକ୍ଷମତା ସୁନିଶ୍ଚିତ କରାଯିବ। ₹୧୨,୨୦୦ କୋଟି ଟଙ୍କାର ଆନୁମାନିକ ନିବେଶ ସହିତ ଏହି ପଦକ୍ଷେପର ଲକ୍ଷ୍ୟ ହେଉଛି — ତାଳଚେର କୋଇଲା କ୍ଷେତ୍ରରୁ ପାରାଦୀପ ଓ ଧାମରା ବନ୍ଦର ପର୍ଯ୍ୟନ୍ତ କୋଇଲା ଏବଂ ଅନ୍ୟାନ୍ୟ ବଲ୍କ ମାଲ ର ସୁଗମ ପରିବହନ କରିବା।ଏହା ଫଳରେ ଲଜିଷ୍ଟିକ୍ସ ଖର୍ଚ୍ଚ ହ୍ରାସ, ରାସ୍ତା ଓ ରେଳ ନେଟୱାର୍କରେ ଭିଡ ହ୍ରାସ ଏବଂ ପରିବେଶ-ଅନୁକୂଳ ପରିବହନ ବୃଦ୍ଧି ହେବ। ଏହି ପଦକ୍ଷେପ ‘ବିକଶିତ ଭାରତ @୨୦୪୭’ ଦୃଷ୍ଟିକୋଣ ସହ ସମନ୍ୱୟ ରଖି ଆଭ୍ୟନ୍ତରୀଣ ଜଳପଥ ମାଧ୍ୟମରେ ଆଧୁନିକ ପରିବହନ ବ୍ୟବସ୍ଥା ସୃଷ୍ଟି କରିବ।
ପ୍ରକଳ୍ପଟି ଇନଲ୍ୟାଣ୍ଡ ଓଡ଼ିଶା ଲିମିଟେଡ୍ (IWCOL) ନାମକ ଏକ ସ୍ୱତନ୍ତ୍ର ଉଦ୍ଦେଶ୍ୟ ଯାନ ମାଧ୍ୟମରେ କାର୍ଯ୍ୟକାରୀ ହେବ। IWAI ପକ୍ଷରୁ ପ୍ରକଳ୍ପ ପ୍ରସ୍ତୁତି, ବୈଧାନିକ ଅନୁମୋଦନ ଏବଂ ଟର୍ମିନାଲ, ବ୍ୟାରେଜ୍ ଓ ନାଭିଗେସନ୍ ସିଷ୍ଟମ ବିକାଶରେ ନେତୃତ୍ୱ ଦିଆଯିବ।ଓଡ଼ିଶା ସରକାର ଏହି ପଦକ୍ଷେପରେ ଜବରଦଖଲମୁକ୍ତ ଜମି ଯୋଗାଇବ, ମଞ୍ଜୁରୀ ପ୍ରକ୍ରିୟାକୁ ସହଜ କରିବ ଏବଂ ପ୍ରଶାସନିକ ସହାୟତା ଯୋଗାଇବ। MCL ପକ୍ଷରୁ ନିଶ୍ଚିତ କାର୍ଗୋ ପରିବହନ ଏବଂ ପ୍ରଥମ ମାଇଲ୍ ସଂଯୋଗୀକରଣ ସୁନିଶ୍ଚିତ ହେବ, ଯେତେବେଳେ ପାରାଦୀପ ବନ୍ଦର ପ୍ରାଧିକରଣ ମାଲ ପରିଚାଳନା ଓ ଜଳପଥ ମାଧ୍ୟମରେ ମୋଡାଲ ସ୍ଥାନାନ୍ତରକୁ ଉତ୍ସାହିତ କରିବ।
ଏହି MoU ଉପଲକ୍ଷେ କେନ୍ଦ୍ର ସଂସଦୀୟ ବ୍ୟାପାର ଏବଂ ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରନ ରିଜିଜୁ ଏବଂ କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ରାଷ୍ଟ୍ରମନ୍ତ୍ରୀ ଶାନ୍ତନୁ ଠାକୁର ଉପସ୍ଥିତ ଥିଲେ। ଓଡ଼ିଶା ସରକାର ପକ୍ଷରୁ ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ସଚିବ ଉଷା ପାଢୀ ଚୁକ୍ତିନାମାରେ ସ୍ୱାକ୍ଷର କରିଥିଲେ।
