ନ୍ୟୁଜ ଡେକ୍ସ : ଓଲିଉଡର ଲୋକପ୍ରିୟ କଣ୍ଠଶିଳ୍ପୀ ହ୍ୟୁମାନ୍ ସାଗରଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଅବସ୍ଥାକୁ ପହଞ୍ଚିଛି। ପତ୍ନୀ ଶ୍ରେୟା ସାଗରଙ୍କ କହିବା ଅନୁସାରେ, ଗତ ୨୪ ଘଣ୍ଟାରେ ତାଙ୍କ ସ୍ବାସ୍ଥ୍ୟରେ କୌଣସି ସୁଧାର ଆସିନାହିଁ। ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ତାଙ୍କର ଚିକିତ୍ସା ନେଇ ଏମ୍ସ ଅଧିକାରୀଙ୍କ ସହ ଆଲୋଚନା କରିଛନ୍ତି।ହ୍ୟୁମାନ୍ ସାଗରଙ୍କୁ ଗତ କିଛି ସପ୍ତାହ ଧରି କଟକର ଏକ ଘରୋଇ ହସ୍ପିଟାଲରେ ଚିକିତ୍ସା କରାଯାଉଥିଲା।
ତଥାପି ସ୍ବାସ୍ଥ୍ୟାବସ୍ଥା ଅଚାନକ ଅବନତି ହେବାରୁ ସେମାନଙ୍କୁ ତୁରନ୍ତ ଭୁବନେଶ୍ୱର ଏମ୍ସ ଆଇସିୟୁରେ ସ୍ଥାନାନ୍ତର କରାଯାଇଥିଲା।ଏମ୍ସ ସ୍ତରର ଡାକ୍ତରମାନଙ୍କ କହିବା ଅନୁସାରେ, ହ୍ୟୁମାନ୍ ସାଗର ଶ୍ୱାସକ୍ରିୟା ସମସ୍ୟା, ନିମୋନିଆ, ହେପାଟୋପାଥି, କୋଆଗୁଲୋପାଥି, ଥ୍ରୋମ୍ବୋସାଇଟୋପେନିଆ ସହିତ ଗୁରୁତର ଭାବେ ପୀଡ଼ିତ। ତାଙ୍କର ଲିଭର୍ ଗୁରୁତର ଭାବେ ଖରାପ ଓ କିଡ୍ନି ମଧ୍ୟ ପ୍ରଭାବିତ ହୋଇଛି। ବର୍ତ୍ତମାନ ସେ ଭେଣ୍ଟିଲେଟର୍ ସହାୟତାରେ ଅଛନ୍ତି। ଓଡ଼ିଆ ଚଳଚ୍ଚିତ୍ର ଓ ସଂଗୀତ ଜଗତରେ ତାଙ୍କର ନାମ ପରିଚିତ। ୨୦୧୫ରେ ‘ଇସ୍କ ତୁ ହି ତୁ’ ଫିଲ୍ମ ଦ୍ୱାରା ଚଳଚ୍ଚିତ୍ର ଜଗତରେ ପ୍ରବେଶ କରିଥିବା ହ୍ୟୁମାନ୍, ତରଙ୍ଗ ଟିଭିର ଭଏସ୍ ଅଫ୍ ଓଡିଶା ରିଆଲିଟି ସୋ’ ଦ୍ୱାରା ଲୋକପ୍ରିୟତା ହାସଲ କରିଥିଲେ। ପରେ ସେ ଶହ ଶହ ଫିଲ୍ମ ଓ ଆଲବମ୍ରେ ସ୍ୱର ଦେଇ ଓଡ଼ିଆ ସଂଗୀତ ଜଗତକୁ ନୂତନ ଉଚ୍ଚତାକୁ ନେଇଯାଇଥିଲେ।
ହ୍ୟୁମାନ୍ ସାଗରଙ୍କ ମାତା ତାଙ୍କର ଶୀଘ୍ର ସୁସ୍ଥତା ପାଇଁ ପ୍ରାର୍ଥନା କରିଛନ୍ତି ଏବଂ ଅଧିକ ଉନ୍ନତ ଚିକିତ୍ସା ପାଇଁ ରାଜ୍ୟ ବାହାରକୁ ନେବା ସମ୍ଭାବନା ନେଇ ଭାବୁଛନ୍ତି। ସେ ଏହି ପାଇଁ ରାଜ୍ୟ ସରକାରଙ୍କ ସହାୟତା ଆବଶ୍ୟକ ବୋଲି ନିବେଦନ ମଧ୍ୟ କରିଛନ୍ତି।ଏକପକ୍ଷରେ, ପ୍ରସିଦ୍ଧ କଣ୍ଠଶିଳ୍ପୀ ଅଭିଜିତ ମଜୁମଦାର ମଧ୍ୟ ଏମ୍ସରେ ଚିକିତ୍ସାଧୀନ ଅଛନ୍ତି ଏବଂ ତାଙ୍କର ସ୍ବାସ୍ଥ୍ୟାବସ୍ଥା ମଧ୍ୟ ସଙ୍କଟାପନ୍ନ ଥିବା ସୂଚନା ମିଳିଛି।ଓଲିଉଡ ଓ ସଂଗୀତ ଜଗତ ସହିତ ସମଗ୍ର ଓଡ଼ିଶା ହ୍ୟୁମାନ୍ ସାଗରଙ୍କ ସ୍ବାସ୍ଥ୍ୟ ସୁଧାର ପାଇଁ ପ୍ରାର୍ଥନା କରୁଛି।
