ନ୍ୟୁଜ ଡେକ୍ସ: ଜୁନିଅର୍ ଖଣି ଅଧିକାରୀଙ୍କ ଘରେ ଭିଜିଲାନ୍ସ ଚଢ଼ାଉ। ଜୁନିଅର୍ ଖଣି ଅଧିକାରୀ ପଦ୍ମନାଭ ହୋତାଙ୍କ ଘରେ ଆଜି ସକାଳୁ ସକାଳୁ ଭିଜିଲାନ୍ସ ରେଡ କରିଛି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ୭ଟି ସ୍ଥାନରେ ଚାଲିଛି ରେଡ୍। କନିଷ୍ଠ ଖଣି ଅଧିକାରୀ ପଦ୍ମନାଭ ହୋତାଙ୍କର ୩ଟି ବହୁତଳ କୋଠା ଠାବ କରାଯାଇଛି। ତା’ ମଧ୍ୟରେ ଗୋଟିଏ ଚାରି ମହଲା କୋଠା ଅଛି।
ଏହି କୋଠାଟି ଭୁବନେଶ୍ୱରର କରଡ଼ୋକଣ୍ଟାରେ ଅଛି। ସେହିପରି କେନ୍ଦୁଝରର ଜଗନ୍ନାଥପୁରରେ ତାଙ୍କର ଗୋଟିଏ ଦୁଇ ମହଲା କୋଠା ଥିବା ବେଳେ ଯାଜପୁରର ଜେମାଦେଇପୁର ଶାସନରେ ତାଙ୍କର ଗୋଟିଏ ଘର ଅଛି। କେନ୍ଦୁଝର ଜିଲ୍ଲା ଘାଷିପୁର ତହସିଲର ମଦନପୁରରେ ଶ୍ରୀ ହୋତାଙ୍କର ଏକ ୫ ଏକରର ଜାଗା ଅଛି, ଯେଉଁଠି ସେ ଫାର୍ମ ହାଉସ କରିଛନ୍ତି। ତା’ସହିତ ଭୁବନେଶ୍ୱର, କଟକ ଓ ଯାଜପୁରରେ ତାଙ୍କର ୧୪ଟି ପ୍ଲଟ୍ ଅଛି।
ସେଥିରୁ ୪ଟି ଭୁବନେଶ୍ୱର ଓ କଟକରେ ଅଛି। ବାକି ୧୦ଟି ଯାଜପୁରର ଦାନଗଦିରେ ଅଛି। ଏହା ସହିତ ତାଙ୍କର ଗୋଟିଏ ଚାରି ଚକିଆ ଗାଡ଼ି ସହିତ ୨ଟି ଦୁଇ ଚକିଆ ଗାଡ଼ି ଅଛି। ତାଙ୍କର ବ୍ୟାଙ୍କ, ବୀମା ଓ ପୋଷ୍ଟ ଅଫିସ ଜମା ଏବଂ ଅନ୍ୟାନ୍ୟ ନିବେଶ ନେଇ ଭିଜିଲାନ୍ସର ଖୋଳତାଡ଼ ଜାରି ରହିଛି। ଚଢ଼ାଉ ଜାରି ରହିଥିବାରୁ ତାଙ୍କର ଆହୁରି ସମ୍ପିତ୍ତି ମିଳିବା ସମ୍ଭାବନା ରହିଛି।
