ନ୍ୟୁଜ ଡେକ୍ସ : ରବିବାର ରାତିରେ କୋଲକାତାର ନେତାଜୀ ସୁଭାଷଚନ୍ଦ୍ର ବୋଷ ଅନ୍ତର୍ଜାତୀୟ ବିମାନବନ୍ଦରରେ ଏକ ବଡ଼ ଅଘଟଣ ଟଳି ଯାଇଛି। ମୁମ୍ବାଇରୁ କୋଲକାତା ଆସୁଥିବା ସ୍ପାଇସଜେଟ୍ ବିମାନ SG-670 ର ଗୋଟିଏ ଇଞ୍ଜିନ ହଠାତ୍ ତ୍ରୁଟିଗ୍ରସ୍ତ ହେବା ପରେ ପାଇଲଟ୍ ବିମାନକୁ ଜରୁରୀକାଳୀନ ଅବତରଣ କରାଇଥିଲେ।
ବିମାନବନ୍ଦର ଅଧିକାରୀଙ୍କ ଅନୁସାରେ, ବିମାନ ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ି କୋଲକାତା ଅଭିମୁଖେ ଯାଉଥିଲା ବେଳେ ଇଞ୍ଜିନରେ ତ୍ରୁଟି ଚିହ୍ନଟ ହୋଇଥିଲା। ସେହି ସମୟରେ ପାଇଲଟ୍ ତୁରନ୍ତ କୋଲକାତା ବିମାନବନ୍ଦର କର୍ତ୍ତୃପକ୍ଷଙ୍କୁ ସୂଚନା ଦେଇଥିଲେ ଏବଂ ବିମାନକୁ ଜରୁରୀ ଅବତରଣ ପାଇଁ ଅନୁମତି ଚାହିଁଥିଲେ।ସୂଚନା ପାଇବା ସହିତେ ବିମାନବନ୍ଦର ପକ୍ଷରୁ ଜରୁରୀ ପ୍ରତିକ୍ରିୟା ଦଳ ଅଗ୍ନିଶମ ଗାଡ଼ି, ଆମ୍ବୁଲାନ୍ସ ଓ ଡାକ୍ତରୀ କର୍ମଚାରୀମାନେ ତୁରନ୍ତ ସ୍ଥଳରେ ପହଞ୍ଚିଥିଲେ ଏବଂ ସମସ୍ତ ପ୍ରସ୍ତୁତି ନିଆଯାଇଥିଲା।
ବିମାନଟି ନିରାପଦ ଭାବରେ ଅବତରଣ କରିଥିଲା ଏବଂ ସମସ୍ତ ଯାତ୍ରୀ ଓ କର୍ମଚାରୀ ସୁସ୍ଥ ଅବସ୍ଥାରେ ଅଛନ୍ତି। ଏହି ଘଟଣାରୁ ଏକ ବଡ଼ ଅଘଟଣ ଟଳି ଯାଇଛି ବୋଲି ବିମାନବନ୍ଦର ସୂତ୍ର ସୂଚନା ଦେଇଛି। ସ୍ପାଇସଜେଟ୍ ପକ୍ଷରୁ ଏହା ନିଶ୍ଚିତ କରାଯାଇଛି ଯେ ପାଇଲଟ୍ଙ୍କ ସତର୍କତା ଓ ବିମାନବନ୍ଦର ଅଧିକାରୀଙ୍କ ତୁରନ୍ତ ପ୍ରତିକ୍ରିୟାର ଫଳରେ ସମସ୍ତେ ସୁରକ୍ଷିତ ଅଛନ୍ତି।ଏହି ଘଟଣା ପରେ ଇଞ୍ଜିନ ତ୍ରୁଟିର କାରଣ ଜାଣିବା ପାଇଁ ଯାଞ୍ଚ ଆରମ୍ଭ କରାଯାଇଛି।
