ନ୍ୟୁଜ ଡେକ୍ସ : ଏସିଆର ସବୁଠୁ ବଡ଼ ଖାରାପାଣି ହ୍ରଦ ଚିଲିକା ଏହି ବର୍ଷ ମଧ୍ୟ ପରିବେଶ ପ୍ରେମୀ ଓ ପକ୍ଷୀ ବିଶେଷଜ୍ଞଙ୍କ ପାଇଁ ଖୁସିର ଖବର ଆଣିଛି। ଚଳିତ ବର୍ଷ ଚିଲିକାକୁ ମୋଟ ୧୯୬ ପ୍ରଜାତିର ୧୧ ଲକ୍ଷ ୩୨ ହଜାର ୨ ଶହ ପକ୍ଷୀ ଆଗମନ କରିଥିବା ଗଣନାରୁ ପ୍ରକାଶ ପାଇଛି। ଗତବର୍ଷ ତୁଳନାରେ ଏହି ବର୍ଷ ପକ୍ଷୀଙ୍କ ସଂଖ୍ୟା ୪ ହଜାର ୯୭୨ ଟି ବୃଦ୍ଧି ପାଇଥିବା ବେଳେ ପ୍ରଜାତି ସଂଖ୍ୟା ସମାନ ରହିଛି, ଯାହା ଚିଲିକାର ପରିବେଶ ସୁରକ୍ଷା ଓ ପ୍ରାକୃତିକ ସ୍ଥିତି ଉପରେ ଭରସା ବଢ଼ାଇଛି।
ଚିଲିକା ବନ୍ୟପ୍ରାଣୀ ବନଖଣ୍ଡ ଅଧିକାରୀଙ୍କ ସୂଚନା ଅନୁଯାୟୀ, ଏହି ବର୍ଷ ଆସିଥିବା ପକ୍ଷୀମାନଙ୍କ ମଧ୍ୟରୁ ୧୦୬ ପ୍ରଜାତିର ୧୧ ଲକ୍ଷ ୧୦ ହଜାର ୨୫୭ ଟି ବିଦେଶୀ ପ୍ରବାସୀ ପକ୍ଷୀ ଅଛନ୍ତି। ସେହିପରି ୯୦ ପ୍ରଜାତିର ୨୧ ହଜାର ୯୪୩ ଟି ସ୍ଥାନୀୟ ପକ୍ଷୀ ମଧ୍ୟ ଚିଲିକା ଅଞ୍ଚଳରେ ଦେଖାଯାଇଛନ୍ତି। ଏହା ଚିଲିକାକୁ କେବଳ ପ୍ରବାସୀ ପକ୍ଷୀଙ୍କ ପାଇଁ ନୁହେଁ, ସ୍ଥାନୀୟ ପକ୍ଷୀଙ୍କ ପାଇଁ ମଧ୍ୟ ସୁରକ୍ଷିତ ଆଶ୍ରୟସ୍ଥଳୀ ଭାବେ ପ୍ରମାଣ କରୁଛି।ଚଳିତ ବର୍ଷ ବିଶେଷକରି ପ୍ଲେନ ମାର୍ଟିନ ଓ ବେଙ୍ଗଲ ବୁଶ ଲାର୍କ ପ୍ରଜାତିର ପକ୍ଷୀଙ୍କ ସଂଖ୍ୟା ଅଧିକ ଥିବା ଦେଖାଯାଇଛି। ଏହା ଚିଲିକାର ଖାଦ୍ୟ ଶୃଙ୍ଖଳା, ପାଣିର ଗୁଣମାନ ଓ ଜଳଜ ପରିବେଶର ସୁଧାରକୁ ସୂଚିତ କରୁଥିବା ବୋଲି ପକ୍ଷୀ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ଗତ ବର୍ଷ ଅର୍ଥାତ ୨୦୨୫ ମସିହାରେ ମଧ୍ୟ ଚିଲିକାକୁ ୧୯୬ ପ୍ରଜାତିର ୧୧ ଲକ୍ଷ ୨୭ ହଜାର ୨୨୮ ପକ୍ଷୀ ଆସିଥିଲେ। ଏହି ବର୍ଷ ସେହି ଧାରା ଅଟୁଟ ରହିଥିବା ସହ ପକ୍ଷୀ ସଂଖ୍ୟାର ସାମାନ୍ୟ ବୃଦ୍ଧି ଚିଲିକା ସଂରକ୍ଷଣ ପ୍ରୟାସକୁ ସଫଳତାର ଦିଗରେ ନେଇଯାଉଛି।
ବମ୍ବେ ନ୍ୟାଚ୍ୟୁରାଲ୍ ହିଷ୍ଟ୍ରି ଅଫ୍ ସୋସାଇଟି (B.N.H.S.)ର ବରିଷ୍ଠ ଗବେଷକ ଓ ପକ୍ଷୀ ବିଶେଷଜ୍ଞଙ୍କ ଉପସ୍ଥିତିରେ ବାଲୁଗାଁସ୍ଥିତ ଚିଲିକା ବନ୍ୟପ୍ରାଣୀ ଡିଭିଜନ ପକ୍ଷରୁ ଏହି ପକ୍ଷୀ ଗଣନାର ଅନ୍ତିମ ରିପୋର୍ଟ ଘୋଷଣା କରାଯାଇଛି। ରିପୋର୍ଟରେ ଉଲ୍ଲେଖ କରାଯାଇଛି ଯେ, ଯଦି ଏହିପରି ସଂରକ୍ଷଣ ପ୍ରୟାସ ଜାରି ରହେ, ତେବେ ଆଗାମୀ ବର୍ଷଗୁଡ଼ିକରେ ଚିଲିକାରେ ପକ୍ଷୀ ପ୍ରଜାତି ଓ ସଂଖ୍ୟା ଆହୁରି ବୃଦ୍ଧି ପାଇବ।ଚିଲିକାର ଏହି ପକ୍ଷୀ ସମୃଦ୍ଧି କେବଳ ପ୍ରାକୃତିକ ସମ୍ପଦର ସଫଳ ସଂରକ୍ଷଣର ଉଦାହରଣ ନୁହେଁ, ବରଂ ପର୍ଯ୍ୟଟନ, ସ୍ଥାନୀୟ ଜୀବିକା ଓ ରାଜ୍ୟର ପରିବେଶୀୟ ପରିଚୟକୁ ମଧ୍ୟ ଆହୁରି ସୁଦୃଢ଼ କରୁଛି।
