ନ୍ୟୁଜ ଡେକ୍ସ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇ ଦିନିଆ ଆସାମ ଗସ୍ତରେ ଅଛନ୍ତି। ଏହି ଗସ୍ତ ସମୟରେ ସେ ଆସାମ ଭ୍ୟାଲି ଫର୍ଟିଲାଇଜର ଆଣ୍ଡ କେମିକାଲ୍ କମ୍ପାନୀ ଲିମିଟେଡ୍ (ଏଭିଏଫସିଏଲ୍)ର ଆମୋନିଆ–ୟୁରିଆ ପ୍ରକଳ୍ପର ଶିଳାନ୍ୟାସ ସମାରୋହରେ ଯୋଗ ଦେଇଥିଲେ।ଶିଳାନ୍ୟାସ ସମାରୋହକୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ, “ଆଜି ଆସାମ ଓ ସମଗ୍ର ଉତ୍ତର–ପୂର୍ବ ଭାରତ ପାଇଁ ଏକ ବଡ଼ ଦିନ।
ନମରୂପ ଓ ଦିବ୍ରୁଗଡ଼ ଦୀର୍ଘ ଦିନ ଧରି ଯାହାକୁ ଅପେକ୍ଷା କରୁଥିଲେ, ସେଇ ସ୍ୱପ୍ନ ଏବେ ସତ ହେବାକୁ ଯାଉଛି।” ସେ କହିଲେ ଯେ ଏହି ପ୍ରକଳ୍ପ ଆସାମ ସହିତ ସମଗ୍ର ଅଞ୍ଚଳରେ ଶିଳ୍ପ ପ୍ରଗତିର ଏକ ନୂତନ ଅଧ୍ୟାୟ ଆରମ୍ଭ କରିବ।ଦିବ୍ରୁଗଡ଼ ପହଞ୍ଚିବା ପୂର୍ବରୁ ପ୍ରଧାନମନ୍ତ୍ରୀ ଗୌହାଟୀରେ ନୂତନ ବିମାନବନ୍ଦର ଟର୍ମିନାଲର ଉଦଘାଟନ କରିଥିଲେ। ଏହାକୁ ଆସାମର ଦ୍ରୁତ ବିକାଶ ଯାତ୍ରାର ଆଉ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ ବୋଲି ସେ ବର୍ଣ୍ଣନା କରିଥିଲେ। “ଆସାମ ଏବେ ବିକାଶର ଏକ ନୂତନ ଗତିରେ ପ୍ରବେଶ କରିଛି। ଆପଣମାନେ ଯାହା ଅନୁଭବ କରୁଛନ୍ତି, ସେହିଟା କେବଳ ଆରମ୍ଭ,” ବୋଲି ମୋଦି କହିଥିଲେ। ଚାଷୀଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ, “ଦେଶର ସମସ୍ତ ଚାଷୀ ଭାଇଭଉଣୀଙ୍କୁ ଏହି ଆଧୁନିକ ସାର କାରଖାନା ପାଇଁ ମୋର ଶୁଭକାମନା।”
ସେ ଉଲ୍ଲେଖ କରିଥିଲେ ଯେ ବିଜେପିର ଡବଲ–ଇଞ୍ଜିନ୍ ସରକାର ଅଧୀନରେ ଶିଳ୍ପ ଓ ସଂଯୋଗର ସମନ୍ୱୟ ଆସାମର ସ୍ୱପ୍ନକୁ ସାକାର କରୁଛି ଏବଂ ଯୁବପିଢ଼ିଙ୍କୁ ନୂତନ ସ୍ୱପ୍ନ ଦେଖିବାକୁ ପ୍ରେରିତ କରୁଛି।ମୋଦି କହିଥିଲେ ଯେ ନମରୂପର ଏହି ଆମୋନିଆ–ୟୁରିଆ ୟୁନିଟ୍ ହଜାର ହଜାର ନୂତନ ନିଯୁକ୍ତି ଓ ଆତ୍ମନିଯୁକ୍ତି ସୁଯୋଗ ସୃଷ୍ଟି କରିବ। ପ୍ଲାଣ୍ଟ କାର୍ଯ୍ୟକ୍ଷମ ହେଲାପରେ ସ୍ଥାନୀୟ ଲୋକ, ବିଶେଷକରି ଯୁବକମାନେ, ସ୍ଥାୟୀ ଚାକିରିର ସୁଯୋଗ ପାଇବେ।ଏହି ଅବସରରେ ପ୍ରଧାନମନ୍ତ୍ରୀ କଂଗ୍ରେସ ଦଳକୁ ଟାର୍ଗେଟ୍ କରି କହିଥିଲେ ଯେ ପୂର୍ବରୁ କଂଗ୍ରେସ ଶାସନକାଳରେ ଆସାମ ସହିତ ଦେଶର ଅନ୍ୟାନ୍ୟ ରାଜ୍ୟରେ ଅନେକ ସାର କାରଖାନା ବନ୍ଦ ହୋଇଯାଇଥିଲା। ଡବଲ–ଇଞ୍ଜିନ୍ ସରକାର ସେହି ସମସ୍ୟାଗୁଡିକର ସମାଧାନ କରୁଛି ବୋଲି ସେ କହିଥିଲେ।
ମୋଦି କଂଗ୍ରେସ ଉପରେ ଆକ୍ରମଣ ଜାରି ରଖି କହିଥିଲେ ଯେ ଏହି ଦଳ ଦେଶ ବିରୋଧୀ ଚିନ୍ତାଧାରାକୁ ପ୍ରୋତ୍ସାହନ ଦେଉଛି ଏବଂ ଅବୈଧ ଅନୁପ୍ରବେଶକାରୀଙ୍କୁ ସୁରକ୍ଷା ଦେଉଛି। “କଂଗ୍ରେସ ଭୋଟ ବ୍ୟାଙ୍କ ରାଜନୀତି ପାଇଁ ଆସାମର ପରିଚୟକୁ ଅବହେଳା କରୁଛି,” ବୋଲି ସେ ଅଭିଯୋଗ କରିଥିଲେ।ଶେଷରେ ପ୍ରଧାନମନ୍ତ୍ରୀ କହିଥିଲେ, “ଆସାମର ପରିଚୟ ଓ ସମ୍ମାନକୁ ରକ୍ଷା କରିବା ପାଇଁ ବିଜେପି ଇସ୍ପାତ ପରି ଆପଣମାନଙ୍କ ସହିତ ଛିଡା ହେବ। କଂଗ୍ରେସର ତୁଷ୍ଟୀକରଣ ଓ ଭୋଟ ବ୍ୟାଙ୍କ ରାଜନୀତିର ବିଷରୁ ଆସାମକୁ ରକ୍ଷା କରିବା ଆବଶ୍ୟକ।”
