ନ୍ୟୁଜ ଡେକ୍ସ: ଆଥଲେଟ୍ ଦୂତି ଚାନ୍ଦଙ୍କ କାର୍କୁ ଧକ୍କା ଦେଲା ଟ୍ରକ୍। ଦୁର୍ଘଟଣାରେ ଦୂତି ଚାନ୍ଦଙ୍କର କିଛି ହୋଇନାହିଁ। କଟକ ଜିଲ୍ଳା ଓଏମପି ଛକ ନିକଟରେ ଏହି ଦୁର୍ଘଟଣା ଘଟିଛି। ପୁଲିସ ଦୁର୍ଘଟଣାଗ୍ରସ୍ତ ଟ୍ରକ୍କୁ ଜବତ କରିବା ସହ ଡ୍ରାଇଭରକୁ ଅଟକ ରଖିଛି। ମଧୁପାଟଣା ଥାନା ନିକଟସ୍ଥ ବ୍ରିଜ ତଳପଟ ରାସ୍ତାରେ ଏହି ଦୁର୍ଘଟଣା ଘଟିଥିଲା ।
ତେବେ ଦୁର୍ଘଟଣା ପରେ ଦୂତୀ ସମ୍ପୂର୍ଣ୍ଣ ଭାବେ ସୁରକ୍ଷିତ ରହିଥିବା ଜଣାପଡ଼ିଛି ।ସୂଚନା ମୁତାବକ, ଦୂତୀ ଓ ତାଙ୍କ ବନ୍ଧୁ ଗୁରୁବାର ଦିନ ସନ୍ଧ୍ୟା ୬ଟା ସମୟରେ କାର ଯୋଗେ ଯାଜପୁରରୁ ଭୁବନେଶ୍ୱର ଅଭିମୂଖେ ଆସୁଥିଲେ । ତେବେ କଟକର ଓଏମପି ଛକ ନିକଟରେ ଗୋଟିଏ ଟ୍ରକ ତାଙ୍କ ଗାଡ଼ିକୁ ଅତିକ୍ରମ କରିବାକୁ ଚେଷ୍ଟା କରିବା ସହ ଅଶାଳୀନ ଆଚରଣ କରିଥିଲା ।
ଏହାପରେ ଦୂତୀ ମଧୁପାଟଣା ବ୍ରିଜ ତଳେ ଟ୍ରକକୁ ଆଗକୁ ଯିବାକୁ ରାସ୍ତା ନଦେଇ ରାସ୍ତା ଉପରେ ଗାଡ଼ି ଛିଡ଼ା କରିଥିଲେ । ମାତ୍ର ଏହି ସମୟରେ ଟ୍ରକ ଚାଳକ ଜଣଙ୍କ ଡାହାଣ ପଟରୁ କାରକୁ ଧକ୍କାଦେଇ ଚାଲିଯିବାକୁ ପ୍ରୟାସ କରିଥିଲେ । ଏହାପରେ ଦୂତୀ ଉକ୍ତ ଟ୍ରକକୁ ପିଛା କରି କାଠଯୋଡ଼ି ପୋଲ ପୂର୍ବରୁ ଅଟକାଇବା ସହ ପୋଲିସକୁ ଜଣାଇଥିଲେ । ସେହି ସମୟରେ ଅନ୍ୟ କିଛି ଟ୍ରକ ଚାଳକ ସେଠାରେ ପହଞ୍ଚିବା ସହ ଦୂତୀଙ୍କୁ ଖରାପ ବ୍ୟବହାର କରିଥିବା ଦୌଡ଼ରାଣୀ କହିଛନ୍ତି ।
