ନ୍ୟୁଜ ଡେକ୍ସ : ଦେଶରେ କ୍ରମାଗତ ଭାବରେ ବୃଦ୍ଧି ପାଉଥିବା ସଡ଼କ ଦୁର୍ଘଟଣା ଉପରେ ଗଭୀର ଚିନ୍ତା ପ୍ରକାଶ କରି ସୁପ୍ରିମକୋର୍ଟ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଛଅ ମାସ ମଧ୍ୟରେ ସଡ଼କ ସୁରକ୍ଷା ସମ୍ବନ୍ଧୀୟ ନିୟମ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛି।ବିଚାରପତି ଜେ. ବି. ପାରଦିୱାଲା ଏବଂ କେ. ଭି. ବିଶ୍ୱନାଥନଙ୍କ ଖଣ୍ଡପୀଠ ଏହି ନିର୍ଦ୍ଦେଶ ଦେଇଥିଲେ।
ସୁପ୍ରିମକୋର୍ଟ କହିଛି, ମୋଟର ଯାନ ଆଇନର ଧାରା 138(1A) ଅନୁଯାୟୀ ନିୟମ ପ୍ରସ୍ତୁତ କରି ସାଧାରଣ ସ୍ଥାନ ଓ ଜାତୀୟ ରାଜପଥରେ ଅଣ-ମୋଟରଚାଳିତ ଯାନବାହନ ଓ ପଦଯାତ୍ରୀଙ୍କ ଗତିବିଧି ନିୟନ୍ତ୍ରଣ କରାଯିବ।କୋର୍ଟ ଆହୁରି କହିଛି ଯେ, ରାସ୍ତା ଡିଜାଇନ୍, ନିର୍ମାଣ ଏବଂ ରକ୍ଷଣାବେକ୍ଷଣ ସମୟରେ ଅଣ-ଯନ୍ତ୍ରକୃତ ଯାନବାହନ ଓ ପଦଯାତ୍ରୀଙ୍କ ସୁରକ୍ଷା ଏବଂ ସୁବିଧା ପାଇଁ ସ୍ପଷ୍ଟ ମାନଦଣ୍ଡ ନିର୍ଦ୍ଧାରିତ ହେବା ଆବଶ୍ୟକ।ହେଲମେଟ ପିନ୍ଧିବା, ଭୁଲ ଲେନରେ ଗାଡ଼ି ଚଲାଇବା ଓ ଅନଧିକୃତ ହର୍ଣ୍ଣ ବଜାଇବା ଭଳି ସଡ଼କ ସୁରକ୍ଷା ସମ୍ବନ୍ଧୀୟ ଦିଗରେ କଠୋର ନିୟମ ରୂପାୟଣ କରିବାକୁ ମଧ୍ୟ ସୁପ୍ରିମକୋର୍ଟ ରାଜ୍ୟଗୁଡ଼ିକୁ ଆଦେଶ ଦେଇଛି।
ଏହି ନିର୍ଦ୍ଦେଶର ଉଦ୍ଦେଶ୍ୟ ହେଉଛି ଜାତୀୟ ରାଜପଥ ଏବଂ ଅନ୍ୟାନ୍ୟ ରାସ୍ତାରେ ପଦଯାତ୍ରୀ ଏବଂ ଅଣ-ମୋଟରଚାଳିତ ଯାନବାହନ ସୁରକ୍ଷା ପାଇଁ ପର୍ଯ୍ୟାପ୍ତ ବ୍ୟବସ୍ଥା କରାଯିବା ନିଶ୍ଚିତ କରିବା।କୋଏମ୍ବାଟୁରର ଜଣେ ସର୍ଜନ ଡକ୍ଟର ଏସ. ରାଜଶେଖରନଙ୍କ ଦ୍ୱାରା ଦାୟର ଏକ ଆବେଦନର ଶୁଣାଣି ସମୟରେ ଏହି ନିର୍ଦ୍ଦେଶ ଦିଆଯାଇଛି।
