ନ୍ୟୁଜ ଡେକ୍ସ : ଯାଜପୁର ଜିଲ୍ଲାରେ ମାଦକ ଦ୍ରବ୍ୟ ଚାଲାଣ ବିରୋଧରେ ଅବକାରୀ ବିଭାଗ ଏକ ବଡ଼ ସଫଳତା ହାସଲ କରିଛି। ପାଣି ବୋତଲ ଭରା ପିକଅପ୍ ଗାଡ଼ି ଭିତରେ ଗଞ୍ଜେଇ ଚାଲାଣ କରାଯାଉଥିବା ସୂଚନା ପାଇ ଜିଲ୍ଲା ଅବକାରୀ ଭ୍ରାମ୍ୟମାଣ ଦଳ ପକ୍ଷରୁ ଚଢ଼ାଉ କରାଯାଇଥିଲା। ଏହି ଚଢ଼ାଉ ସମୟରେ ୧ କ୍ଵିଣ୍ଟାଲ ୬୦ କେଜି ଗଞ୍ଜେଇ ଜବତ କରାଯାଇଛି, ଯାହାର ଆନୁମାନିକ ବଜାର ମୂଲ୍ୟ ପ୍ରାୟ ୧୬ ଲକ୍ଷ ଟଙ୍କା ବୋଲି ଜଣାପଡ଼ିଛି।
ଅବକାରୀ ବିଭାଗ ସୂତ୍ରରୁ ପ୍ରକାଶ ଯେ, ଏକ ପିକଅପ୍ ଗାଡ଼ି ମାଧ୍ୟମରେ ବୌଦ୍ଧ ଜିଲ୍ଲାରୁ ଯାଜପୁର ଜିଲ୍ଲାକୁ ଗଞ୍ଜେଇ ଚାଲାଣ କରାଯାଉଥିବା ଗୁପ୍ତ ସୂଚନା ମିଳିଥିଲା। ଏହାପରେ ଅବକାରୀ ଭ୍ରାମ୍ୟମାଣ ଦଳ ଗାଡ଼ିକୁ ଅଟକାଇ ତଲାସି ନେଇଥିଲେ। ଗାଡ଼ି ଉପରେ ସାଧାରଣ ପାଣି ବୋତଲ ରଖାଯାଇଥିବା ବେଳେ, ଭିତରେ ସୁଚାରୁ ଭାବେ ପ୍ୟାକ୍ କରାଯାଇଥିବା ବିପୁଳ ପରିମାଣର ଗଞ୍ଜେଇ ରହିଥିବା ଧରାପଡ଼ିଥିଲା।ଏହି ଘଟଣାରେ ଅବକାରୀ ବିଭାଗ ୨ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ବୌଦ୍ଧ ଜିଲ୍ଲାର ଆନନ୍ଦ ଭୋଇ ଓ ଅନୁଗୁଳ ଜିଲ୍ଲାର ରେଙ୍ଗାଲବେଢା ଅଞ୍ଚଳର ଅନୀଲ ବେହେରା।
ପଚରାଉଚରା ବେଳେ ଜଣାପଡ଼ିଛି ଯେ, ଏମାନେ ଦୀର୍ଘଦିନ ଧରି ବୌଦ୍ଧ ଜିଲ୍ଲାରୁ ଗଞ୍ଜେଇ ଆଣି ଯାଜପୁର ଜିଲ୍ଲାର ବିଭିନ୍ନ ଅଞ୍ଚଳକୁ ଚାଲାଣ କରୁଥିଲେ। ଅବକାରୀ ବିଭାଗ ଏହି ଘଟଣାକୁ ଗମ୍ଭୀରତାର ସହ ନେଇ ଆହୁରି ତଦନ୍ତ ଆରମ୍ଭ କରିଛି। ଏହି ଚାଲାଣ ପଛରେ ଅନ୍ୟ କେଉଁ ଚକ୍ର କାର୍ଯ୍ୟରତ ଅଛି, ଏବଂ ଆଉ କେଉଁମାନେ ଜଡିତ ଅଛନ୍ତି, ସେ ସମ୍ପର୍କରେ ତଥ୍ୟ ସଂଗ୍ରହ କରାଯାଉଛି।
ଜବତ ଗାଡ଼ି ସହିତ ଗଞ୍ଜେଇକୁ ଆଇନୁସାରେ ଜବତ କରାଯାଇଥିବା ବେଳେ, ଗିରଫ ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯିବ ବୋଲି ଅବକାରୀ ବିଭାଗ ସୂଚନା ଦେଇଛି।ମାଦକ ଦ୍ରବ୍ୟ ଚାଲାଣ ରୋକିବା ପାଇଁ ଯାଜପୁର ଜିଲ୍ଲାରେ ଅବକାରୀ ବିଭାଗ ପକ୍ଷରୁ ନିୟମିତ ଚଢ଼ାଉ ଓ ଯାଞ୍ଚ କଡ଼ା କରାଯାଉଥିବା ବେଳେ, ଏହି ସଫଳତା ମାଦକ ମାଫିଆଙ୍କୁ ଏକ ବଡ଼ ଝଟକା ବୋଲି କୁହାଯାଉଛି।
