ନ୍ୟୁଜ ଡେକ୍ସ : ରଥଯାତ୍ରା ସମୟରେ ପୁରୀ ଶରଧାବାଲିରେ ହୋଇଥିବା ଦଳାଚକଟା ଘଟଣା ନେଇ ଓଡ଼ିଶା ସରକାର ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। ଏହି ଘଟଣାରେ ତଦନ୍ତ ରିପୋର୍ଟ ଆସିବା ପରେ ୭ ଜଣ ପୋଲିସ ଅଧିକାରୀଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି। ସେଥିପାଇଁ ଏକ ଘରୋଇ ପ୍ରଯୁକ୍ତିବିଦ୍ୟା ସଂସ୍ଥାକୁ ମଧ୍ୟ କଳା ତାଲିକାଭୁକ୍ତ କରିବା ନିଷ୍ପତ୍ତି ହୋଇଛି।
ସରକାରୀ ବିଜ୍ଞପ୍ତି ଅନୁସାରେ, ଯୋଜନା ଏବଂ ସମନ୍ୱୟ ବିଭାଗର ଉନ୍ନୟନ କମିଶନର-କମ୍-ଅତିରିକ୍ତ ମୁଖ୍ୟ ସଚିବଙ୍କ ନେତୃତ୍ୱରେ ହୋଇଥିବା ତଦନ୍ତରେ ପୋଲିସ ତଦାରଖରେ ଗୁରୁତର ତ୍ରୁଟି, ମନ୍ଦିର ପ୍ରଶାସନ ସହ ସଂପୃକ୍ତିର ଅଭାବ ଓ AI ଆଧାରିତ ସମନ୍ୱିତ କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ର (ICCC)ର ବିଫଳତା ଚିହ୍ନଟ ହୋଇଛି।ଏହି ତ୍ରୁଟି ଦଳାଚକଟା ଘଟଣାର ପ୍ରମୁଖ କାରଣ ହେବା ଥିବା ନିଷ୍କର୍ଷରେ ସରକାର ଗୃହ (ସ୍ପେଶିଆଲ ସେକ୍ସନ) ବିଭାଗ ମାଧ୍ୟମରେ ପଦକ୍ଷେପ ନେଇଛି। ଏକ ସରକାରୀ ବିଜ୍ଞପ୍ତିରେ ଗୃହ (ସ୍ପେଶିଆଲ ସେକ୍ସନ) ବିଭାଗ କହିଛି ଯେ ସରକାର ତଦନ୍ତର ନିଷ୍କର୍ଷକୁ ଗ୍ରହଣ କରିଛନ୍ତି। ଯେଉଁଥିରେ ପୋଲିସ ତଦାରଖରେ ଗୁରୁତର ତ୍ରୁଟି, ମନ୍ଦିର ପ୍ରଶାସନ ସହିତ ଦୁର୍ବଳ ସମନ୍ୱୟ ଏବଂ AI-ଭିତ୍ତିକ ସମନ୍ୱିତ କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ର (ICCC)ର ବିଫଳତା ଉଲ୍ଲେଖ କରାଯାଇଛି।
ଏହି ଅଧିକାରୀଙ୍କ ମଧ୍ୟରେ ରହିଛନ୍ତି ଅଜୟ କୁମାର ପାଢ଼ୀ, କମାଣ୍ଡାଣ୍ଟ, OSAP ତୃତୀୟ ବାଟାଲିୟନ, କୋରାପୁଟ; ବିଷ୍ଣୁ ପ୍ରସାଦ ପତି, DCP (HQ), ଭୁବନେଶ୍ୱର-କଟକ; ତାପସ ରଞ୍ଜନ ଦାସ, କମାଣ୍ଡାଣ୍ଟ, SSMSV, ପୁରୀ; କେ.କେ. ନାୟକ, ଡେପୁଟି କମାଣ୍ଡାଣ୍ଟ, SSMSV, ପୁରୀ; ପ୍ରସାନ୍ତ କୁମାର ସାହୋ, ଡିଏସପି ସିଟି, ପୁରୀ; ସୁଶାନ୍ତ କୁମାର ସାହୋ, ଆଇଆଇସି, କୁମ୍ଭାରପଡା ପୋଲିସ ଷ୍ଟେସନ; ଏବଂ ସାରଦା ପ୍ରସାଦ ଦାଶ, କମାଣ୍ଡାଣ୍ଟ, OSAP ଅଷ୍ଟମ ବାଟାଲିୟନ, ଛତ୍ରପୁର।
