ନ୍ୟୁଜ ଡେକ୍ସ :ବକ୍ସ ଅଫିସରେ ଧମାଲ ମଚାଇ ଚାଲିଥିବା ବଲିଉଡ୍ ଫିଲ୍ମ ‘ଧୂରନ୍ଧର’କୁ ନେଇ ଏବେ ଏକ ନୂଆ ବିବାଦ ଦେଖାଦେଇଛି। ବଲୋଚ ସମ୍ପ୍ରଦାୟର କିଛି ସଦସ୍ୟ ଫିଲ୍ମର କିଛି ଡାଇଲଗକୁ ନେଇ ଅସନ୍ତୋଷ ପ୍ରକାଶ କରି ଗୁଜରାଟ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଫିଲ୍ମ ନିର୍ମାତା ଓ ନିର୍ଦ୍ଦେଶକଙ୍କ ବିରୋଧରେ କାର୍ଯ୍ୟାନୁଷ୍ଠାନ ସହ ବିବାଦୀୟ ସଂଳାପକୁ ହଟାଇବାକୁ ସେମାନେ ଦାବି କରିଛନ୍ତି।
ଟାଇମ୍ସ ଅଫ୍ ଇଣ୍ଡିଆର ଏକ ରିପୋର୍ଟ ଅନୁଯାୟୀ, ଗାନ୍ଧିନଗରରେ ବସୁଥିବା ୟାସିନ ବଲୋଚ ଏବଂ ବନାସକାଣ୍ଠର ଆୟୁବଖାନ ବଲୋଚ ଏହି ମାମଲାରେ ଆବେଦନ ଦାଖଲ କରିଛନ୍ତି। ସେମାନେ ତାଙ୍କ ଯାଚିକାରେ ଫିଲ୍ମ ନିର୍ଦ୍ଦେଶକ ଆଦିତ୍ୟ ଧରଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ଦାବି କରିଛନ୍ତି।ଆବେଦନକାରୀମାନଙ୍କ ଅଭିଯୋଗ ହେଉଛି, ଫିଲ୍ମରେ ବଲୋଚ ସମୁଦାୟ ବିରୋଧରେ ଘୃଣାମୂଳକ ଭାଷା (ହେଟ୍ ସ୍ପିଚ୍) ବ୍ୟବହାର କରାଯାଇଛି। ବିଶେଷକରି ସଞ୍ଜୟ ଦତ୍ତ ଅଭିନୀତ ଏସପି ଚରିତ୍ରର ଗୋଟିଏ ସଂଳାପକୁ ନେଇ ଆପତ୍ତି ଉଠାଯାଇଛି, ଯେଉଁଥିରେ କୁହାଯାଇଛି— “କୁମ୍ଭୀରକୁ ଭରସା କରି ପାରିବେ, କିନ୍ତୁ ବଲୋଚକୁ ନୁହେଁ।”
ଆବେଦନକାରୀମାନେ କହିଛନ୍ତି, ଏହି ସଂଳାପ ସମ୍ପୂର୍ଣ୍ଣ ଭାବେ ବଲୋଚ ସମୁଦାୟକୁ ଅପମାନିତ କରୁଛି ଓ ସାମାଜିକ ଭାବେ ଅସନ୍ତୋଷ ସୃଷ୍ଟି କରିପାରେ। ସେହିପରି, ଯେପର୍ଯ୍ୟନ୍ତ ଉକ୍ତ ସଂଳାପକୁ ସ୍ଥାୟୀ ଭାବେ ମ୍ୟୁଟ୍ କିମ୍ବା ଡିଲିଟ୍ କରାଯାଇନାହିଁ, ସେପର୍ଯ୍ୟନ୍ତ ସେଣ୍ଟ୍ରାଲ୍ ବୋର୍ଡ୍ ଅଫ୍ ଫିଲ୍ମ ସର୍ଟିଫିକେସନ୍ (CBFC) ଦ୍ୱାରା ଦିଆଯାଇଥିବା ସର୍ଟିଫିକେଟରେ ପରିବର୍ତ୍ତନ କରାଯିବା ଉଚିତ୍ ବୋଲି ସେମାନେ ଦାବି କରିଛନ୍ତି।ଏହି ମାମଲାକୁ ନେଇ ଏବେ ଫିଲ୍ମ ମହଳ ସହିତ ସାରା ଦେଶରେ ଚର୍ଚ୍ଚା ଜୋର ଧରିଛି।
