ନ୍ୟୁଜ ଡେକ୍ସ : ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏବଂ ରାଷ୍ଟ୍ରବାଦୀ କଂଗ୍ରେସ ପାର୍ଟିର ଅଧ୍ୟକ୍ଷ ଅଜିତ ପାୱାରଙ୍କ ଦୁଃଖଦ ନିଧନ ପରେ ସାରା ରାଜ୍ୟ ସହିତ ସମଗ୍ର ଦେଶରେ ଶୋକର ଛାୟା ପଡ଼ିଛି। ଆଜି ବାରାମତିରେ ପୂର୍ଣ୍ଣ ରାଜ୍ୟ ସମ୍ମାନ ସହିତ ତାଙ୍କର ଅନ୍ତିମ ସଂସ୍କାର କରାଯିବ। ଏହି ଶେଷ ଯାତ୍ରାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସମେତ ଅନେକ ଶୀର୍ଷ ନେତା ଯୋଗଦେବେ, ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଯୋଗ ଦେବେ ବୋଲି ସମ୍ଭାବନା ରହିଛି।
ଗତ ୨୮ ଜାନୁଆରୀ ସକାଳେ ମୁମ୍ବାଇରୁ ବାରାମତିକୁ ଯାଉଥିବା ଅଜିତ ପାୱାରଙ୍କ ଘରୋଇ ଚାର୍ଟର୍ଡ ବିମାନ ବାରାମତି ବିମାନବନ୍ଦରରେ ଅବତରଣ ସମୟରେ ଦୁର୍ଘଟଣାଗ୍ରସ୍ତ ହୋଇ ଭୟଙ୍କର ଭାବେ ଆଗୁନ ଲାଗିଯାଇଥିଲା। ଏହି ଦୁର୍ଘଟଣାରେ ଅଜିତ ପାୱାର ସହିତ ପାଞ୍ଚ ଜଣଙ୍କର ଜୀବନ ଯାଇଥିଲା। ମୃତକମାନେ ହେଲେ କ୍ୟାପ୍ଟେନ୍ ସୁମିତ କପୁର, ସହ–ପାଇଲଟ୍ କ୍ୟାପ୍ଟେନ୍ ଶାମ୍ଭବୀ ପାଠକ, ବ୍ୟକ୍ତିଗତ ସୁରକ୍ଷା ଅଧିକାରୀ ବିଦିତ ଜାଧବ ଓ ବିମାନ ପରିଚାରିକା ପିଙ୍କି ମାଲିଙ୍କର। ବିମାନ ଦୁର୍ଘଟଣାର କାରଣ ଜାଣିବା ପାଇଁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ ଏକ ଉଚ୍ଚସ୍ତରୀୟ ତଦନ୍ତ ଆରମ୍ଭ କରିଛି।
ବିମାନ ଦୁର୍ଘଟଣା ତଦନ୍ତ ବ୍ୟୁରୋର ଏକ ବିଶେଷଜ୍ଞ ଦଳ ଦୁର୍ଘଟଣା ସ୍ଥଳରେ ପହଞ୍ଚି ଫରେନସିକ୍ ପରୀକ୍ଷା କରୁଛି।ମହାରାଷ୍ଟ୍ର ରାଜନୀତିରେ ‘ଦାଦା’ ଭାବେ ପରିଚିତ ୬୬ ବର୍ଷୀୟ ଅଜିତ ପାୱାର ଏକ ସାହସୀ ଓ ପ୍ରଭାବଶାଳୀ ନେତା ଥିଲେ। ତାଙ୍କର ଅକାଳ ମୃତ୍ୟୁକୁ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ “ଅବିଶ୍ୱସନୀୟ ଓ ହୃଦୟବିଦାରକ” ବୋଲି ବର୍ଣ୍ଣନା କରିଛନ୍ତି। ଦେଶ ଏକ ଦକ୍ଷ ରାଜନେତା ଓ ଲୋକପ୍ରିୟ ନେତୃତ୍ୱକୁ ହରାଇଛି।
