ନ୍ୟୁଜ ଡେକ୍ସ : ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ଅଞ୍ଚଳର ବାହାନଗା ଛକ ନିକଟରେ ଆଜି ସକାଳେ ଏକ ଭୟାବହ ସଡ଼କ ଦୁର୍ଘଟଣା ଘଟିଛି। କଲିକତାରୁ ପୁରୀ ଅଭିମୁଖେ ଯାଉଥିବା ‘ଶ୍ରୀ ଭେଙ୍କେଟଲକ୍ଷ୍ମୀ’ ନାମକ (ଏପି–୨୫ଡବ୍ଲୁ–୯୯୨୯) ଏକ ତୀର୍ଥଯାତ୍ରୀ ବସ ଭାରସାମ୍ୟ ହରାଇ ରାଜପଥର ଡିଭାଇଡର ଉପରକୁ ଚଢ଼ିଯିବାରୁ ଦୁର୍ଘଟଣା ଘଟିଥିଲା।ସୂଚନା ଅନୁଯାୟୀ, ସକାଳ ପ୍ରାୟ ୫ଟା ୧୫ ମିନିଟ୍ ସମୟରେ ବସଟି ବାହାନଗା ଛକ ନିକଟରେ ପହଞ୍ଚିବା ସମୟରେ ଚାଳକ ନିୟନ୍ତ୍ରଣ ହରାଇଥିଲେ।
ବସଟି ଡିଭାଇଡର ଉପରେ ଚଢ଼ିଯାଇ ଏକ ବିଦ୍ୟୁତ୍ ଖୁଟିକୁ ଧକ୍କା ଦେଇଥିଲା। ଧକ୍କାରେ ବସର ଡ୍ରାଇଭର ଖୁଟି ସହ ଆଘାତ ପାଇ ତଳକୁ ଖସି ପଡ଼ିଥିଲେ ଏବଂ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। ମୃତକ ଡ୍ରାଇଭରଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।ବସରେ ସମୁଦାୟ ୪୦ ଜଣ ତୀର୍ଥଯାତ୍ରୀ ଯାତ୍ରା କରୁଥିବା ବେଳେ ଦୁର୍ଘଟଣାରେ ୧୦ରୁ ଅଧିକ ଯାତ୍ରୀ ଗୁରୁତର ଆହତ ହୋଇଛନ୍ତି। ଅନ୍ୟ ଅନେକ ଯାତ୍ରୀ ମଧ୍ୟ ସାଧାରଣ ଆହତ ହୋଇଥିବା ଜଣାପଡ଼ିଛି। ସମସ୍ତ ଆହତଙ୍କୁ ତୁରନ୍ତ ଖନ୍ତାପଡ଼ା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ପଠାଯାଇଛି, ଯେଉଁଠାରେ କିଛିଙ୍କ ଅବସ୍ଥା ଗୁରୁତର ଥିବା କୁହାଯାଉଛି। ଘଟଣା ସୂଚନା ପାଇବା ସହିତ ଖନ୍ତାପଡ଼ା ପୋଲିସ, ବାହାନଗା ଅଗ୍ନିଶମ ବିଭାଗ ଓ ଜାତୀୟ ରାଜପଥ ପୋଲିସ ମିଳିତ ଭାବେ ଘଟଣାସ୍ଥଳକୁ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଆହତ ଯାତ୍ରୀମାନଙ୍କୁ ବସ ଭିତରୁ ବାହାର କରି ଆମ୍ବୁଲାନ୍ସ ମାଧ୍ୟମରେ ହସ୍ପିଟାଲକୁ ପଠାଯାଇଥିଲା। ଦୁର୍ଘଟଣା ପରେ କିଛି ସମୟ ପର୍ଯ୍ୟନ୍ତ ଜାତୀୟ ରାଜପଥରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା।
ପୋଲିସ ପକ୍ଷରୁ କୁହାଯାଇଛି ଯେ ଦୁର୍ଘଟଣାର ସଠିକ୍ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନି। ବସର ଗତି, ଡ୍ରାଇଭରଙ୍କ ସ୍ୱାସ୍ଥ୍ୟ ଅବସ୍ଥା କିମ୍ବା ରାସ୍ତାର ସ୍ଥିତି—ସମସ୍ତ ଦିଗରୁ ତଦନ୍ତ ଚାଲିଛି। ସମସ୍ତ ଯାତ୍ରୀ ତେଲେଙ୍ଗାନାର ଜେନାଲୁରମ ଜିଲ୍ଲାରୁ ଆସିଥିବା ଜଣାପଡ଼ିଛି ଏବଂ ସେମାନେ ପୁରୀ ଦର୍ଶନ ପାଇଁ ଯାଉଥିଲେ।ଏହି ଭୟାବହ ଦୁର୍ଘଟଣା ପୁଣିଥରେ ରାଜପଥରେ ସଡ଼କ ସୁରକ୍ଷା ଓ ଦୀର୍ଘ ଦୂରତାରେ ଚଳାଚଳ କରୁଥିବା ଯାନବାହନର ସତର୍କତା ଉପରେ ପ୍ରଶ୍ନ ଉଠାଇଛି।
