ନ୍ୟୁଜ ଡେକ୍ସ : ଭାରତର ସରକାରୀ ସ୍ୱାସ୍ଥ୍ୟସେବା ପ୍ରଣାଳୀରେ ଏକ ଐତିହାସିକ ପରିବର୍ତ୍ତନର ସୂଚନା ମିଳିଛି। ସରକାରୀ ହସ୍ପିଟାଲଗୁଡ଼ିକୁ ଅଧିକ ଆଧୁନିକ ଓ ଟେକ୍ନୋଲୋଜିସମ୍ପନ୍ନ କରିବା ଦିଗରେ ଆଉ ଏକ ବଡ଼ ପଦକ୍ଷେପ ନିଆଯାଇଛି। ଉତ୍ତରପ୍ରଦେଶର ଗ୍ରେଟର୍ ନୋଏଡ଼ାରେ ଥିବା ଗଭର୍ନମେଣ୍ଟ୍ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସ୍ (ଜିଆଇଏମ୍ଏସ୍)ରେ ଦେଶର ପ୍ରଥମ ସରକାରୀ ହସ୍ପିଟାଲ-ଆଧାରିତ ଏଆଇ କ୍ଲିନିକ୍ ଖୋଲାଯାଇଛି।
ଏହି ଏଆଇ କ୍ଲିନିକ୍କୁ ଭାରତ ସରକାରଙ୍କ ସ୍ୱାସ୍ଥ୍ୟସେବା ବିଭାଗର ଅତିରିକ୍ତ ମହାନିର୍ଦ୍ଦେଶକ ଅନ୍ଲାଇନ୍ ମାଧ୍ୟମରେ ଉଦ୍ଘାଟନ କରିଛନ୍ତି। ଜିଆଇଏମ୍ଏସ୍ର ସେଣ୍ଟର୍ ଫର୍ ମେଡିକାଲ ଇନୋଭେସନ୍ ଅଧୀନରେ ଏହି କ୍ଲିନିକ୍ ପ୍ରତିଷ୍ଠା ହୋଇଛି। ଏହାର ମୁଖ୍ୟ ଉଦ୍ଦେଶ୍ୟ ହେଉଛି ସରକାରୀ ହସ୍ପିଟାଲରେ ଡାକ୍ତର ଓ ରୋଗୀଙ୍କୁ ସିଧାସଳଖ ଏଆଇ-ଆଧାରିତ ସ୍ୱାସ୍ଥ୍ୟସେବା ସୁବିଧା ପ୍ରଦାନ କରିବା।ଜିଆଇଏମ୍ଏସ୍ର ନିର୍ଦ୍ଦେଶକ ଡା. ରାକେଶ କୁମାର ଗୁପ୍ତା କହିଛନ୍ତି ଯେ, ଏହି ପଦକ୍ଷେପ ସ୍ୱାସ୍ଥ୍ୟସେବା ଷ୍ଟାର୍ଟଅପ୍ଗୁଡ଼ିକ ପାଇଁ ନୂଆ ସୁଯୋଗ ସୃଷ୍ଟି କରିବ।
ଏଆଇ ମାଧ୍ୟମରେ ନୂଆ ଉଦ୍ଭାବନ ଡାକ୍ତର ଓ ରୋଗୀଙ୍କ ପର୍ଯ୍ୟନ୍ତ ସିଧାସଳଖ ପହଞ୍ଚିପାରିବ, ଯାହା ସମୟର ଆବଶ୍ୟକତା। ଏହି ପ୍ରୟାସକୁ କେବଳ ଉତ୍ତରପ୍ରଦେଶ ପାଇଁ ନୁହେଁ, ସମଗ୍ର ଭାରତୀୟ ସ୍ୱାସ୍ଥ୍ୟସେବା କ୍ଷେତ୍ର ପାଇଁ ଏକ ମାଇଲ୍ଷ୍ଟୋନ୍ ଭାବେ ଦେଖାଯାଉଛି। ଭବିଷ୍ୟତରେ ଏଆଇ ଭିତ୍ତିକ ସେବା ମାଧ୍ୟମରେ ସରକାରୀ ହସ୍ପିଟାଲର ଚିକିତ୍ସା ବ୍ୟବସ୍ଥା ଆଉ ଅଧିକ କାର୍ଯ୍ୟକାରୀ ଓ ସୁଲଭ ହେବ ବୋଲି ଆଶା କରାଯାଉଛି।
