ନ୍ୟୁଜ ଡେକ୍ସ : ଚଳିତ ଆର୍ଥିକବର୍ଷରେ ଭାରତୀୟ ଅର୍ଥନୀତି ୬.୬% ହାରରେ ବଢ଼ିବ ବୋଲି ଅନ୍ତର୍ଜାତୀୟ ମୁଦ୍ରାପାଣ୍ଠି (IMF) ତାହାର ସଂପ୍ରତିକ ୱାର୍ଲ୍ଡ ଇକୋନୋମିକ୍ ଆଉଟ୍ଲୁକ୍ (WEO) ରିପୋର୍ଟରେ ଉଲ୍ଲେଖ କରିଛି। ଏହା ସହିତ ଭାରତ ବିଶ୍ୱର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ଭାବେ ତାହାର ସ୍ଥାନ ବଜାୟ ରଖିବ।ଆଇଏମଏଫ୍ ଅନୁସାରେ, ପ୍ରଥମ ତ୍ରୟମାସରେ ଦେଶର ମଜବୁତ ଅର୍ଥନୈତିକ ପ୍ରଦର୍ଶନ ଏହି ପୂର୍ବାନୁମାନ ପଛରେ ପ୍ରଧାନ କାରଣ।
ଭାରତ ଅଭିବୃଦ୍ଧି କ୍ଷେତ୍ରରେ ଚୀନ୍କୁ ପଛରେ ପକାଇବ ବୋଲି ଏହା ଅନୁମାନ କରିଛି, କାରଣ ଆଲୋଚ୍ୟ ଅବଧିରେ ଚୀନ୍ର ଅଭିବୃଦ୍ଧି ହାର ୪.୮% ରହିବ ବୋଲି ଆକଳନ କରାଯାଇଛି।ଅନ୍ତର୍ଜାତୀୟ ମୁଦ୍ରାପାଣ୍ଠି ବିଭିନ୍ନ ଅର୍ଥବ୍ୟବସ୍ଥା ଉପରେ ଆମେରିକୀୟ ଟାରିଫ୍ ଓ ଆର୍ଥିକ ନୀତିଗୁଡ଼ିକର ପ୍ରଭାବକୁ ଦୃଷ୍ଟିରେ ରଖି ସଂଶୋଧିତ ଆକଳନ ଜାରି କରିଛି। ତେବେ, ୨୦୨୬ ପାଇଁ ଭାରତର ଅଭିବୃଦ୍ଧି ଅନୁମାନକୁ ଏହା ୬.୨% କୁ ହ୍ରାସ କରିଛି।
ବିଶ୍ୱ ଅର୍ଥନୀତି ଦିଗରେ ଆଇଏମଏଫ୍ ଆକଳନ କରିଛି ଯେ, ୨୦୨୫ ମସିହାରେ ବିଶ୍ୱ ଅର୍ଥନୈତିକ ଅଭିବୃଦ୍ଧି ହାର ୩.୨% ରହିବ ଏବଂ ୨୦୨୬ରେ ଏହା ହ୍ରାସ ପାଇ ୩.୧% କୁ ଖସିଯିବ। ବିକଶିତ ଅର୍ଥନୀତିଗୁଡ଼ିକ ଏହି ଅବଧିରେ ହାରାହାରି ୧.୬% ହାରରେ ବଢ଼ିବେ, ଯେଉଁଠାରେ ବିକାଶମୁଖୀ ଅର୍ଥବ୍ୟବସ୍ଥାଗୁଡ଼ିକ ୪.୨% ହାରରେ ଅଭିବୃଦ୍ଧି ପାଇବେ ବୋଲି ରିପୋର୍ଟ ଉଲ୍ଲେଖ କରିଛି।
