ନ୍ୟୁଜ ଡେକ୍ସ : ଲଗାତାର ଦ୍ୱିତୀୟ ଦିନ ପାଇଁ ରାଜଧାନୀ ଭୁବନେଶ୍ୱର ଘନ କୁହୁଡ଼ିରେ ଆଚ୍ଛାଦିତ ହୋଇ ରହିଛି। ଏହାର ପ୍ରଭାବରେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ଶୁକ୍ରବାର ଦିନ ବିମାନ ଚଳାଚଳ ଗୁରୁତର ଭାବେ ପ୍ରଭାବିତ ହୋଇଥିଲା। କମ୍ ଦୃଶ୍ୟମାନତା କାରଣରୁ କିଛି ବିମାନ ଉଡାଣ ବାତିଲ ହୋଇଥିବା ବେଳେ ଅନେକ ଉଡାଣ ଘଣ୍ଟା ଘଣ୍ଟା ବିଳମ୍ବର ସମ୍ମୁଖୀନ ହୋଇଥିଲା।
ସୂତ୍ର ଅନୁଯାୟୀ, ରନୱେ ଉପରେ ଅତ୍ୟଧିକ କୁହୁଡ଼ି ଯୋଗୁଁ ଅହମ୍ମଦାବାଦ, କୋଲକାତା ଓ ଦିଲ୍ଲୀ ଭଳି ପ୍ରମୁଖ ଗନ୍ତବ୍ୟସ୍ଥଳକୁ ଯାଉଥିବା ଅତି କମରେ ତିନୋଟି ବିମାନ ଉଡାଣ ବାତିଲ କରାଯାଇଥିଲା। ସେହିପରି ବାରାଣସୀ, ବେଙ୍ଗାଲୁରୁ, କୋଲକାତା, ଦୁର୍ଗାପୁର ଓ ହାଇଦ୍ରାବାଦ ରୁଟରେ ଚଳାଚଳ କରୁଥିବା ପ୍ରାୟ ୫ଟି ବିମାନ ଦୁଇରୁ ଚାରି ଘଣ୍ଟା ପର୍ଯ୍ୟନ୍ତ ବିଳମ୍ବ ହୋଇଥିଲା।ବିମାନବନ୍ଦର କର୍ତ୍ତୃପକ୍ଷ କହିଛନ୍ତି ଯେ ସୁରକ୍ଷିତ ବିମାନ ଉଡାଣ ଓ ଅବତରଣ ପାଇଁ ସର୍ବନିମ୍ନ ୫୫୦ ମିଟର ରନୱେ ଭିଜୁଆଲ୍ ରେଞ୍ଜ ଆବଶ୍ୟକ। କିନ୍ତୁ ସକାଳ ସମୟରେ ଦୃଶ୍ୟମାନତା ୫୦ ମିଟର ପର୍ଯ୍ୟନ୍ତ ଖସିଯାଇଥିବାରୁ ବିମାନ ଚଳାଚଳରେ ବିପଦ ଉପସ୍ଥିତ ହୋଇଥିଲା।
ଏହି ମଧ୍ୟରେ ଭାରତୀୟ ପାଣିପାଗ ବିଭାଗ (ଆଇଏମଡି) ଘନରୁ ଅତି ଘନ କୁହୁଡ଼ି ସମ୍ଭାବନାକୁ ଦୃଷ୍ଟିରେ ରଖି ଓଡ଼ିଶାର ବିଭିନ୍ନ ଜିଲ୍ଲା ପାଇଁ ହଳଦିଆ ଓ କମଳା ସତର୍କତା ଜାରି କରିଛି। ଏହି ଚେତାବନୀ ଜାନୁଆରୀ ୬ ପର୍ଯ୍ୟନ୍ତ ଲାଗୁ ରହିବ। ଏହି ସମୟ ମଧ୍ୟରେ ସକାଳେ ଦୃଶ୍ୟମାନତା କମ୍ ରହିବା ସମ୍ଭାବନା ଥିବାରୁ ବିମାନ ଯାତ୍ରାରେ ଆହୁରି ବାଧା ସୃଷ୍ଟି ହୋଇପାରେ ବୋଲି ଆଇଏମଡି ପକ୍ଷରୁ ସଚେତନ କରାଯାଇଛି।
