ନ୍ୟୁଜ ଡେକ୍ସ : ଦିବଙ୍ଗତ ଏନସିପି ନେତା ଅଜିତ ପାୱାରଙ୍କ ମୃତ୍ୟୁ ପରେ ମହାରାଷ୍ଟ୍ର ରାଜନୀତିରେ ଏକ ନୂତନ ଅଧ୍ୟାୟ ଆରମ୍ଭ ହୋଇଛି। ବିଧାନସଭା ଭବନରେ ଅନୁଷ୍ଠିତ ଏକ ବିଶେଷ ବୈଠକରେ ସର୍ବସମ୍ମତି କ୍ରମେ ସୁନେତ୍ର ପାୱାରଙ୍କୁ ଦଳର ବିଧାୟକ ନେତା ଭାବେ ଚୟନ କରାଯାଇଥିଲା। ପରେ ସେ ମହାରାଷ୍ଟ୍ରର ପ୍ରଥମ ମହିଳା ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି।
ଏହି ଘଟଣା ରାଜ୍ୟର ରାଜନୀତିକ ଇତିହାସରେ ଏକ ମାଇଲ୍ଷ୍ଟୋନ୍ ଭାବେ ଦେଖାଯାଉଛି।ସୁନେତ୍ର ପାୱାର ୨୦୨୪ ଲୋକସଭା ନିର୍ବାଚନ ପର୍ଯ୍ୟନ୍ତ ସକ୍ରିୟ ରାଜନୀତିରୁ ଦୂରେ ଥିଲେ। ସେହି ବର୍ଷ ବାରାମତି ଆସନରୁ ଏନସିପି ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ତାଙ୍କ ଭାଉଜ ଏବଂ ଏନସିପି (ସପା) ସାଂସଦ ସୁପ୍ରିୟା ସୁଲେଙ୍କ ଠାରୁ ପରାଜିତ ହୋଇଥିଲେ। ତଥାପି ଦଳ ତାଙ୍କ ଉପରେ ଆସ୍ଥା ରଖି ତାଙ୍କୁ ଏହି ଉଚ୍ଚ ପଦବୀର ଦାୟିତ୍ୱ ଦେଇଛି।ସୁନେତ୍ର ପାୱାର ଶପଥ ଗ୍ରହଣ କରିବା ପରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ କହିଛନ୍ତି ଯେ, ଅଜିତ ପାୱାରଙ୍କ ପରିବାର ଓ ଦଳ ଯେ କୌଣସି ନିଷ୍ପତ୍ତି ନେବେ, ଭାଜପା ତାହାକୁ ସମ୍ପୂର୍ଣ୍ଣ ସମର୍ଥନ କରିବ।
ଏହି ବିବୃତ୍ତି ରାଜ୍ୟରେ ଶାସକ ମହାଯୋଗର ସ୍ଥିରତାକୁ ଇଙ୍ଗିତ କରୁଛି। ଅନ୍ୟପଟେ ଏନସିପି (ଏସପି) ମୁଖ୍ୟ ଶରଦ ପାୱାର ଏହି ଘଟଣାରୁ ନିଜକୁ ଦୂରେଇ ରଖିଛନ୍ତି। ସେ କହିଛନ୍ତି ଯେ ସୁନେତ୍ର ପାୱାରଙ୍କ ଶପଥ ଗ୍ରହଣ ବିଷୟରେ ସେ ଗଣମାଧ୍ୟମରୁ ଜାଣିଛନ୍ତି। ଏହି ନିଷ୍ପତ୍ତି ଏନସିପି ଦ୍ୱାରା ନିଆଯାଇଥିବା ସମ୍ଭାବନା ରହିଛି ବୋଲି ସେ କହିଥିଲେ। ଏହା ସହ ସେ ଅଜିତ ପାୱାର ଦୁଇଟି ଏନସିପି ଗୋଷ୍ଠୀକୁ ଏକତ୍ର କରିବାକୁ ଚାହୁଁଥିଲେ ଏବଂ ସେଥିପାଇଁ ଚେଷ୍ଟା ଚାଲିଥିବା ମଧ୍ୟ ଉଲ୍ଲେଖ କରିଛନ୍ତି।ସୁନେତ୍ର ପାୱାର ଧାରାଶିବ ଜିଲ୍ଲାର ନିବାସୀ ଓ ବରିଷ୍ଠ ଏନସିପି ନେତା ପଦ୍ମସିଂ ପାଟିଲଙ୍କ ଭଉଣୀ।
ରାଜନୀତି ଓ ସାମାଜିକ ସେବା ପ୍ରତି ତାଙ୍କର ଆଗ୍ରହ ପିତାଙ୍କଠାରୁ ଆସିଥିବା ବୋଲି ସେ କହିଛନ୍ତି। ତାଙ୍କ ବାପା ଜଣେ ସ୍ୱାଧୀନତା ସଂଗ୍ରାମୀ ଓ ଗାଁର ପ୍ରଭାବଶାଳୀ ବ୍ୟକ୍ତି ଥିଲେ। ପଦ୍ମସିଂ ପାଟିଲ ଓ ଶରଦ ପାୱାରଙ୍କ ମଧ୍ୟରେ ଘନିଷ୍ଠ ବନ୍ଧୁତ୍ୱ ଥିବାରୁ ସୁନେତ୍ର ଓ ଅଜିତ ପାୱାରଙ୍କ ବିବାହ ୧୯୮୦ ମସିହାରେ ସମ୍ଭବ ହୋଇଥିଲା ଏବଂ ସେହିଠାରୁ ସେ ବାରାମତିରେ ବସବାସ କରୁଥିଲେ।ସୁନେତ୍ର ପାୱାରଙ୍କ ଉପମୁଖ୍ୟମନ୍ତ୍ରୀ ପଦଗ୍ରହଣ ମହାରାଷ୍ଟ୍ରର ରାଜନୀତିରେ ନୂଆ ସମୀକରଣ ସୃଷ୍ଟି କରିବା ସହ ଏନସିପି ମଧ୍ୟରେ ଏକତା ଓ ପୁନର୍ଗଠନ ପାଇଁ ଏକ ନୂଆ ଦିଗ ଦେବ ବୋଲି ରାଜନୀତିକ ବିଶ୍ଳେଷକମାନେ ମତ ପ୍ରକାଶ କରୁଛନ୍ତି।
