ନ୍ୟୁଜ ଡେକ୍ସ : ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ଆଜି ଏକ ବଡ଼ ବିମାନ ଦୁର୍ଘଟଣା ଅଳ୍ପରେ ଟଳିଯାଇଛି। ରନୱେ ନିକଟସ୍ଥ ଟ୍ୟାକ୍ସିୱେରେ ଏୟାର ଇଣ୍ଡିଆ ଏବଂ ଇଣ୍ଡିଗୋ ବିମାନର ଡେଣା ପରସ୍ପର ସହ ଧକ୍କା ଲାଗିଥିଲା। ସୌଭାଗ୍ୟବଶତଃ ଏହି ଘଟଣାରେ କୌଣସି ଯାତ୍ରୀ ଆହତ ହୋଇନଥିବା ବେଳେ ସମସ୍ତେ ସୁରକ୍ଷିତ ଥିବା ଜଣାପଡ଼ିଛି।
ରିପୋର୍ଟ ଅନୁଯାୟୀ, ମୁମ୍ବାଇରୁ କୋଏମ୍ବାଟୁରକୁ ଉଡ଼ାଣ ପାଇଁ ପ୍ରସ୍ତୁତ ହେଉଥିବା ଏୟାର ଇଣ୍ଡିଆ ବିମାନ AI 2732 ଟ୍ୟାକ୍ସିୱେରେ ଅପେକ୍ଷା କରୁଥିଲା। ସେହି ସମୟରେ ହାଇଦ୍ରାବାଦରୁ ମୁମ୍ବାଇ ଆସୁଥିବା ଇଣ୍ଡିଗୋ ବିମାନ 6E 791 ଅବତରଣ କରି ଟ୍ୟାକ୍ସି କରୁଥିଲା। ଦୁଇଟି ବିମାନ ଏକାପରେ ଏକା ନିକଟ ଦେଇ ଯାଉଥିବା ବେଳେ ତାଙ୍କର ଡେଣା ପରସ୍ପର ସହ ଘଷି ହୋଇଯାଇଥିଲା। ଏଥିରେ ଏୟାର ଇଣ୍ଡିଆ ବିମାନର ଡେଣା କ୍ଷତିଗ୍ରସ୍ତ ହୋଇଥିଲା। ଘଟଣା ପରେ ଦୁଇ ବିମାନ କମ୍ପାନୀ ତୁରନ୍ତ ଆଧିକାରିକ ସୂଚନା ଜାରି କରିଛନ୍ତି। ଏୟାର ଇଣ୍ଡିଆର ଜଣେ ମୁଖପାତ୍ର କହିଛନ୍ତି ଯେ, ସତର୍କତାମୂଳକ ପଦକ୍ଷେପ ଭାବରେ ବିମାନକୁ ଯାନ୍ତ୍ରିକ ଯାଞ୍ଚ ପାଇଁ ଗ୍ରାଉଣ୍ଡ କରାଯାଇଛି।
ଯାତ୍ରୀମାନଙ୍କୁ ସୁରକ୍ଷିତ ଭାବେ ବିମାନରୁ ଓହ୍ଲାଇ ଦିଆଯାଇଛି ଏବଂ ସେମାନଙ୍କୁ ତାଙ୍କର ଗନ୍ତବ୍ୟସ୍ଥଳକୁ ପହଞ୍ଚାଇବା ପାଇଁ ବିକଳ୍ପ ଯାତ୍ରା ବ୍ୟବସ୍ଥା କରାଯାଉଛି।ଇଣ୍ଡିଗୋ ପକ୍ଷରୁ ମଧ୍ୟ କୁହାଯାଇଛି ଯେ, ବିମାନ ଚାଳନା ପ୍ରୋଟୋକଲ ଅନୁଯାୟୀ ସମସ୍ତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଘଟଣା ବିଷୟରେ ସୂଚନା ଦିଆଯାଇଛି ଏବଂ ବିମାନର ସମ୍ପୂର୍ଣ୍ଣ ଯାଞ୍ଚ ରକ୍ଷଣାବେକ୍ଷଣ ଟିମ୍ ଦ୍ୱାରା କରାଯାଉଛି।ଏହି ଘଟଣା ମୁମ୍ବାଇ ଭଳି ବ୍ୟସ୍ତ ବିମାନବନ୍ଦରରେ ସୁରକ୍ଷା ଓ ଟ୍ରାଫିକ୍ ମ୍ୟାନେଜମେଣ୍ଟର ଗୁରୁତ୍ୱକୁ ପୁନଃ ଆଲୋଚନାରେ ଆଣିଛି। ସମୟରେ ପଦକ୍ଷେପ ଓ ସତର୍କତା ଯୋଗୁଁ ଏକ ଭୟଙ୍କର ଦୁର୍ଘଟଣା ଟଳିଯାଇଥିବାରୁ ସମସ୍ତ ଯାତ୍ରୀ ନିଶ୍ୱାସ ନେଇପାରିଛନ୍ତି।
