ନ୍ୟୁଜ ଡେକ୍ସ : ଭୁବନେଶ୍ୱରବାସୀଙ୍କ ପାଇଁ ଏକ ଆନନ୍ଦଦାୟକ ଖବର। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଏହାର ପରିଚାଳନାଧୀନ ପାର୍କଗୁଡ଼ିକର ଖୋଲା ରହିବା ସମୟକୁ ନେଇ ଏକ ବଡ଼ ପରିବର୍ତ୍ତନ ଘୋଷଣା କରିଛି। ପ୍ରାତଃଭ୍ରମଣକାରୀ, ଫିଟନେସ୍ ପ୍ରେମୀ ଓ ସାଧାରଣ ପରିଦର୍ଶକଙ୍କ ବାରମ୍ବାର ଅନୁରୋଧକୁ ଦୃଷ୍ଟିରେ ରଖି, ଏବେ ସପ୍ତାହାନ୍ତରେ ଶନିବାର ଓ ରବିବାର ସମସ୍ତ ବିଡିଏ ପରିଚାଳିତ ପାର୍କ ଦିନସାରା ଖୋଲା ରହିବ।
ବିଡିଏ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହି ନୂଆ ବ୍ୟବସ୍ଥା ଆସନ୍ତା ଡିସେମ୍ବର ୧୩ ତାରିଖ ଠାରୁ ଲାଗୁ ହେବ। ସଂଶୋଧିତ ସମୟାନୁସାରେ, ଶନିବାର ଓ ରବିବାର ସମସ୍ତ ପାର୍କ ସକାଳ ୫ଟାରୁ ରାତି ୮ଟା ୩୦ ପର୍ଯ୍ୟନ୍ତ ଲଗାତାର ଖୋଲା ରହିବ। ମଧ୍ୟାହ୍ନ ଓ ଅପରାହ୍ନରେ ଯେଉଁ ବନ୍ଦ ସମୟ ରହୁଥିଲା, ତାହା ଏବେ ସପ୍ତାହାନ୍ତରେ ଲାଗୁ ହେବ ନାହିଁ।କର୍ତ୍ତୃପକ୍ଷ ଆହୁରି ସୂଚନା ଦେଇଛନ୍ତି ଯେ, ଇନ୍ଦିରା ଗାନ୍ଧୀ ପାର୍କ (ଆଇଜି ପାର୍କ) ସପ୍ତାହର ସବୁ ଦିନ ସକାଳ ୫ଟାରୁ ରାତି ୮ଟା ୩୦ ପର୍ଯ୍ୟନ୍ତ ଏହି ସମୟସୂଚୀ ଅନୁଯାୟୀ ଖୋଲା ରହିବ। ଅନ୍ୟ ସମସ୍ତ ପାର୍କ ପାଇଁ ସପ୍ତାହର ଦିନଗୁଡ଼ିକରେ ପୂର୍ବ ପରି ସକାଳ ୫ଟାରୁ ୧୧ଟା ୩୦ ପର୍ଯ୍ୟନ୍ତ ଓ ପୁଣି ଅପରାହ୍ନ ୩ଟା ୩୦ରୁ ରାତି ୮ଟା ୩୦ ପର୍ଯ୍ୟନ୍ତ ଖୋଲା ରହିବ।
ବର୍ତ୍ତମାନ ବିଡିଏ ଭୁବନେଶ୍ୱରର ଆଇଜି ପାର୍କ, ବିଜୁ ପଟ୍ଟନାୟକ ପାର୍କ, ଏପିଜେ ଅବଦୁଲ କଲାମ ପାର୍କ, ମଧୁସୂଦନ ଦାସ ପାର୍କ, ଗୁରୁ କେଳୁଚରଣ ମହାପାତ୍ର ପାର୍କ, ବୁଦ୍ଧ ଜୟନ୍ତୀ ପାର୍କ ସମେତ ପ୍ରାୟ ୫୦ଟି ପ୍ରମୁଖ ପାର୍କ ପରିଚାଳନା କରୁଛି। ପ୍ରତିଦିନ ହାରାହାରି ପ୍ରାୟ ୩୫ ହଜାର ଲୋକ ଏହି ପାର୍କଗୁଡ଼ିକୁ ପରିଦର୍ଶନ କରନ୍ତି।ଏହାସହ ବିଡିଏ ପକ୍ଷରୁ ଅନେକ ପାର୍କରେ ଖେଳ ଉପକରଣର ମରାମତି, ରଙ୍ଗକାମ ଓ ସାର୍ବିକ ସୁରକ୍ଷା ବ୍ୟବସ୍ଥାକୁ ମଧ୍ୟ ଉନ୍ନତ କରାଯାଉଛି, ଯାହାଦ୍ୱାରା ପରିଦର୍ଶକଙ୍କ ଅଭିଜ୍ଞତାକୁ ଆହୁରି ଭଲ କରାଯିବ।
