ନ୍ୟୁଜ ଡେକ୍ସ : ସନ୍ଦୀପ ରେଡ୍ଡୀ ଭାଙ୍ଗାଙ୍କ ଆଗାମୀ ବହୁପ୍ରତୀକ୍ଷିତ ଫିଲ୍ମ ‘ସ୍ପିରିଟ୍’ ଆରମ୍ଭ ହେବା ପରଠାରୁ ଲଗାତାର ଚର୍ଚ୍ଚାରେ ରହିଆସିଛି। ପୂର୍ବରୁ ଫିଲ୍ମର ନାୟିକା ନେଇ ଘଟିଥିବା ବଦଳ ଦୀପିକା ପାଦୁକୋଣଙ୍କ ସ୍ଥାନରେ ତୃପ୍ତି ଡିମରିଙ୍କୁ ପ୍ରଭାସଙ୍କ ବିପକ୍ଷରେ କାଷ୍ଟ କରାଯିବା ପ୍ରସଙ୍ଗରେ ଆଗୁରୁ ଚର୍ଚ୍ଚା ଥିଲା। ଏବେ ଏହା ସହ ଅଭିନେତା ପ୍ରକାଶ ରାଜ ପ୍ରୋଜେକ୍ଟ ଛାଡ଼ିଦେଇଛନ୍ତି ବୋଲି ଗସିପ୍ ଆସିଥିବାରୁ ଆଉ ଅଧିକ ଆଲୋଡ଼ନ ସୃଷ୍ଟି ହୋଇଥିଲା।
ରିପୋର୍ଟ ଅନୁଯାୟୀ, ସୁଟିଂ ସମୟରେ ପ୍ରକାଶ ରାଜ ଏକ ନିର୍ଦ୍ଦିଷ୍ଟ ଦୃଶ୍ୟ ଏବଂ ସ୍କ୍ରିପ୍ଟର କିଛି ଅଂଶର କାର୍ଯ୍ୟାନ୍ୱୟନକୁ ନେଇ ଅସନ୍ତୋଷ ପ୍ରକାଶ କରିଥିଲେ, ଯାହାର ଫଳରେ ସେ ଫିଲ୍ମ ଛାଡ଼ିଦେଇଥିବା ଖବର ଫେଲାଇଯାଇଥିଲା। କିନ୍ତୁ ଏହି ସମସ୍ତ ଖବରକୁ ପ୍ରକାଶ ରାଜ ସ୍ପଷ୍ଟ ଭାବରେ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ଏପରି କୌଣସି ଘଟଣା ସମ୍ପର୍କରେ ସେ ଜାଣି ନାହାନ୍ତି ଏବଂ ଏହି ଖବରଗୁଡ଼ିକ ସମ୍ପୂର୍ଣ୍ଣ ମିଥ୍ୟା। ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ସେ ଏବେ ବି ‘ସ୍ପିରିଟ୍’ ଫିଲ୍ମର ଏକ ଅଂଶ ଅଟନ୍ତି। ଉଲ୍ଲେଖଯୋଗ୍ୟ ଯେ, ଗତ ବର୍ଷ ଅକ୍ଟୋବରରେ ନିର୍ମାତାମାନେ ମୁକ୍ତିଲାଭ କରାଇଥିବା ‘ସ୍ପିରିଟ୍’ର ସାଉଣ୍ଡଟ୍ରାକ୍ରେ ପ୍ରକାଶ ରାଜଙ୍କ ଭଏସ୍-ଓଭର ମଧ୍ୟ ସାମିଲ ରହିଛି, ଯାହା ତାଙ୍କ ସଂପୃକ୍ତିକୁ ଆହୁରି ସ୍ପଷ୍ଟ କରେ।‘ସ୍ପିରିଟ୍’କୁ ସନ୍ଦୀପ ରେଡ୍ଡୀ ଭାଙ୍ଗାଙ୍କ କ୍ୟାରିଅରର ସବୁଠାରୁ ମହତ୍ୱାକାଂକ୍ଷୀ ଚଳଚ୍ଚିତ୍ରମାନଙ୍କ ମଧ୍ୟରୁ ଗୋଟିଏ ବୋଲି ଦେଖାଯାଉଛି।
ଏହି ଫିଲ୍ମରେ ପ୍ରଭାସଙ୍କ ସହ ଭାଙ୍ଗା ପ୍ରଥମ ଥର ପାଇଁ କାମ କରୁଛନ୍ତି ଏବଂ ପ୍ରଭାସଙ୍କୁ ଏକ ସମ୍ପୂର୍ଣ୍ଣ ନିଆରା ଅନ୍ଦାଜରେ ଦେଖାଇବେ ବୋଲି ଆଶା କରାଯାଉଛି। ଡିସେମ୍ବରରେ ଫିଲ୍ମଟି ମୁକ୍ତିଲାଭ କରିବାକୁ ଯାଉଛି ଏବଂ ତାହାର ପ୍ରଥମ ଦୃଶ୍ୟ ମୁକ୍ତି ପରେ ମଧ୍ୟ ବ୍ୟାପକ ଚର୍ଚ୍ଚା ସୃଷ୍ଟି କରିଥିଲା।ଏହା ସହ ବିବେକ ଓବରୟ ମଧ୍ୟ ଏହି ଚଳଚ୍ଚିତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ। ‘ସ୍ପିରିଟ୍’କୁ ଏକ ଉଚ୍ଚ-ଅକ୍ଟେନ୍ ଆକ୍ସନ୍ ଓ ଗଭୀର ମନୋବୈଜ୍ଞାନିକ କାହାଣୀ ଭିତ୍ତିକ ଫିଲ୍ମ ବୋଲି କୁହାଯାଉଛି, ଯାହାକୁ ନେଇ ଦର୍ଶକଙ୍କ ଆଶା ଆକାଶଛୁଆଁ ରହିଛି।
