ନ୍ୟୁଜ ଡେକ୍ସ : ଇରାନର ରାଜଧାନୀ ତେହେରାନ ସହ ଦେଶର ଅନେକ ପ୍ରମୁଖ ସହରରେ ସରକାର ବିରୋଧରେ ଭୟାବହ ଓ ବ୍ୟାପକ ପ୍ରତିବାଦ ଦେଖିବାକୁ ମିଳିଛି। ସୋସିଆଲ ମିଡିଆରେ ପ୍ରଚାରିତ ଭିଡିଓଗୁଡ଼ିକରୁ ଜଣାପଡ଼ୁଛି ଯେ ଲକ୍ଷ ଲକ୍ଷ ଲୋକ ରାସ୍ତାକୁ ଓହ୍ଲାଇ ସରକାର ବିରୋଧରେ ସ୍ଲୋଗାନ୍ ଦେଉଛନ୍ତି। #IranProtests ଓ #IranRevolution ହ୍ୟାସଟ୍ୟାଗ୍ ସୋସିଆଲ ମିଡିଆରେ ଟ୍ରେଣ୍ଡ କରୁଛି।
୨୦୦୯ ଓ ୨୦୨୨ ପରେ ଏହାକୁ ଇରାନରେ ଧର୍ମଗୁରୁ ପ୍ରତିଷ୍ଠାନ ବିରୋଧରେ ସବୁଠାରୁ ବଡ଼ ଜନଆନ୍ଦୋଳନ ବୋଲି ବିଶେଷଜ୍ଞମାନେ ବର୍ଣ୍ଣନା କରୁଛନ୍ତି। ଅର୍ଥନୈତିକ ସଙ୍କଟକୁ କେନ୍ଦ୍ର କରି ଆରମ୍ଭ ହୋଇଥିବା ଏହି ବିଦ୍ରୋହ ଧୀରେ ଧୀରେ ହିଂସାତ୍ମକ ରୂପ ନେଇଛି। ସର୍ବୋଚ୍ଚ ନେତା ଆୟାତୋଲ୍ଲା ଖାମେନିଙ୍କ ବିରୋଧରେ ମଧ୍ୟ ତୀବ୍ର ସ୍ଲୋଗାନ୍ ଦେଖିବାକୁ ମିଳୁଛି।ମାନବାଧିକାର ସଂଗଠନମାନଙ୍କ ଅନୁସାରେ, ସରକାର ବିରୋଧୀ ହିଂସାତ୍ମକ ପ୍ରତିବାଦରେ ଏପର୍ଯ୍ୟନ୍ତ ୬୨ ଜଣଙ୍କ ମୃତ୍ୟୁ ଘଟିଛି ଓ ଶତାଧିକ ଲୋକ ଆହତ ହୋଇଛନ୍ତି। ପରିସ୍ଥିତି ନିୟନ୍ତ୍ରଣରେ ଆଣିବା ପାଇଁ ସରକାର ଅନେକ ଅଞ୍ଚଳରେ ଇଣ୍ଟରନେଟ୍ ସେବା ବନ୍ଦ କରିଦେଇଛନ୍ତି।
ସଂଗଠନଗୁଡ଼ିକ କହିଛନ୍ତି ଯେ ଏହା ଲଗାତାର ୧୨ତମ ଅଶାନ୍ତି ତରଙ୍ଗ, ଯାହା ଇରାନକୁ ଆଉ ଅଧିକ ଅସ୍ଥିର କରୁଛି। ଦେଶର ମୁଦ୍ରା ‘ରିଆଲ୍’ର ରେକର୍ଡ ହ୍ରାସ, ଆକାଶଛୁଆଁ ମୁଦ୍ରାସ୍ଫୀତି, ବେକାରୀ ଓ ଅତ୍ୟାବଶ୍ୟକୀୟ ସାମଗ୍ରୀର ଅସହ୍ୟ ମୂଲ୍ୟବୃଦ୍ଧି ଲୋକମାନଙ୍କ କ୍ରୋଧର ପ୍ରମୁଖ କାରଣ ହୋଇଛି। ଖାଦ୍ୟ ଓ ଔଷଧର ଦର ଅସାଧାରଣ ଭାବରେ ବଢ଼ିବା ଜନଜୀବନକୁ ଅସ୍ଥବ୍ୟସ୍ତ କରିଦେଇଛି।
ପ୍ରତିବାଦକାରୀମାନେ ଅଭିଯୋଗ କରୁଛନ୍ତି ଯେ ସରକାର ବିଦେଶୀ ପ୍ରତିବନ୍ଧକକୁ ଦୋଷ ଦେଇ ନିଜ ଦାୟିତ୍ୱରୁ ଏଡାଇଯାଉଛି। ଏହି ଗଭୀର ଆର୍ଥିକ ସଙ୍କଟ ମଧ୍ୟରେ ଦେଶର ୨୧ଟି ପ୍ରଦେଶର ୧୦୦ରୁ ଅଧିକ ସହରରେ ଲକ୍ଷାଧିକ ଲୋକ ରାସ୍ତାକୁ ଓହ୍ଲାଇ ସରକାର ବିରୋଧରେ ଶକ୍ତି ପ୍ରଦର୍ଶନ କରୁଛନ୍ତି।ଇରାନରେ ଉଦ୍ଭବିତ ଏହି ଅଭୂତପୂର୍ବ ଅଶାନ୍ତି ବିଶ୍ୱ ରାଜନୈତିକ ମହଳରେ ମଧ୍ୟ ଗଭୀର ଚର୍ଚ୍ଚାର ବିଷୟ ହୋଇଉଠିଛି।
