ନ୍ୟୁଜ ଡେସ୍କ: ଆଜି ପୁଣି ରତ୍ନଭଣ୍ଡାର ଚଟାଣର ଯାଞ୍ଚ କରାଯିବ। ଖୋଲିବ ଶ୍ରୀମନ୍ଦିର ଭିତର ରତ୍ନଭଣ୍ଡାର ରହସ୍ୟ। ଗୁପ୍ତ କୋଠରୀ ଏବଂ ସୁଡଙ୍ଗ ରହସ୍ୟ ଉନ୍ମୋଚନ ପାଇଁ ପ୍ରଥମ ଦିନରେ ପେନିଟ୍ରେଟିଂ ରାଡାର ସର୍ଭେ ସରିଛି । ୩ ଘଣ୍ଟା ୫୦ ମିନିଟ୍ ଧରି ଏନ୍ଜିଆର୍ଆଇର ତିନି ଜଣିଆ ବିଶେଷଜ୍ଞ ଟିମ୍ ଭିତର ରତ୍ନ ଭଣ୍ଡାରର ଚଟାଣ ଯାଞ୍ଚ କରିଛନ୍ତି।
ପ୍ରାୟ ପ୍ରତି ଅଧ ମିଟର ଦୂରତା ଅନ୍ତରରେ ବାରମ୍ବାର ସର୍ବେକ୍ଷଣ କରାଯାଇଛି। ଦୁଇଟି କଣ୍ଟ୍ରୋଲ ୟୁନିଟ, ୩ଟି ରାଡର ୟୁନିଟ ବା ଆଣ୍ଟିନା ଓ ଗୋଟିଏ କାର୍ଟ ସର୍ଭେ କାର୍ଯ୍ୟରେ ବ୍ୟବହୃତ ହୋଇଛି। ତିନିଟି ଉଚ୍ଚ କ୍ଷମତା ସମ୍ପନ୍ନ ମେଶିନ ୨୦୦, ୪୦୦, ୯୦୦ ମେଗାହାର୍ଜ ର ଆଣ୍ଟିନା ଦ୍ଵାରା ସର୍ଭେ କରାଯାଇଛି। ଏହି ଯନ୍ତ୍ରଂଶ ମାଟି ଭିତରେ ୧୦ ମିଟର ପର୍ଯ୍ୟନ୍ତ ଜିନିଷକୁ ଠାବ କରିପାରିବାର କ୍ଷମତା ରଖିଥିବା ବେଳେ ପ୍ରାୟ ୭ ରୁ ୮ ମିଟର ଦୂରତା ପର୍ଯ୍ୟନ୍ତ ସଠିକ୍ ରିପୋର୍ଟ ଦେଇପାରିବ।
ସେହି ରିପୋର୍ଟ ଆସିବା ପରେ ମରାମତି କାର୍ଯ୍ୟ ଆରମ୍ଭ ହେବ। ତେବେ ସର୍ଭେ ଅସମ୍ପୂର୍ଣ୍ଣ ରହିଥିବା ବେଳେ ଆସନ୍ତାକାଲି ପୁଣି ଜାରି ରହିବ ସର୍ଭେ କାର୍ଯ୍ୟ।ତେବେ ଚଳିତ ମାସ ଶେଷସୁଦ୍ଧା ସର୍ଭେ ରିପୋର୍ଟ ପ୍ରଦାନ କରାଯିବ ବୋଲି ଡ. ପାଣ୍ଡେ କହିଛନ୍ତି। ରତ୍ନଭଣ୍ଡାର ଯାଞ୍ଚ ଶେଷ ହେବା ପରେ ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ସଂସ୍ଥା ଦ୍ବାରା ଆବଶ୍ୟକ ମରାମତି କରାଯିବ। ଦୁଇଟି ଯାକ ରତ୍ନଭଣ୍ଡାର କବାଟଗୁଡ଼ିକୁ ସୁନା ଛାଉଣୀ କରାଯିବ।
