ନ୍ୟୁଜ ଡେକ୍ସ : ଆଜି ଅର୍ଥାତ୍ ବୁଧବାର କିଛି ସମୟ ପୂର୍ବରୁ ଖୋର୍ଦ୍ଧା ଜିଲ୍ଲା ବାଲିପାଟଣାର ସବ-ରେଜିଷ୍ଟ୍ରାର କାର୍ଯ୍ୟାଳୟର ଜୁନିଅର କ୍ଲର୍କ ସୁକାନ୍ତ କୁମାର ସିଂହ ଏବଂ ତାଙ୍କ ବ୍ୟକ୍ତିଗତ ସହଯୋଗୀ ମହେନ୍ଦ୍ର ସାହୁଙ୍କୁ ଏକ ପଞ୍ଜୀକୃତ ଟ୍ରଷ୍ଟ ଡିଡ୍ ହସ୍ତାନ୍ତର କରିବା ପାଇଁ ଜଣେ ଅଭିଯୋଗକାରୀ (ଟ୍ରଷ୍ଟ ବୋର୍ଡର କାର୍ଯ୍ୟକର୍ତ୍ତା)ଙ୍କଠାରୁ ୫,୦୦୦ ଟଙ୍କା ଲାଞ୍ଚ ଦାବି କରି ୨,୫୦୦ ଟଙ୍କା ଲାଞ୍ଚ ନେଉଥିବା ସମୟରେ ଓଡ଼ିଶା ଭିଜିଲାନ୍ସ ଦ୍ୱାରା ଗିରଫ କରାଯାଇଛି।
ସମସ୍ତ ଲାଞ୍ଚ ଟଙ୍କା ସେମାନଙ୍କଠାରୁ ଜବତ କରାଯାଇଛି। ସୁକାନ୍ତ କୁମାର ସିଂହ ନାମକ କନିଷ୍ଠ କ୍ଲର୍କ ପଞ୍ଜିକୃତ ଟ୍ରଷ୍ଟ ଡିଡ୍ ହସ୍ତାନ୍ତର କରିବା ପାଇଁ ଏକ ଟ୍ରଷ୍ଟ ବୋର୍ଡର ଜଣେ କର୍ମକର୍ତ୍ତାଙ୍କଠାରୁ ବେଆଇନ ଭାବେ ଟଙ୍କା ଦାବି କରିଥିବା ଅଭିଯୋଗ ହୋଇଛି। ଖାଲି ଏତିକି ନୁହେଁ ଅଭିଯୋଗକାରୀ ୭ ଜୁଲାଇରେ ତାଙ୍କୁ ୧୫୦୦ ଟଙ୍କା ଲାଞ୍ଚ ଆକାରରେ ଦେଇଥିଲେ। କିନ୍ତୁ ସେ ଡିଡ୍ ହସ୍ତାନ୍ତର କରିବା ପାଇଁ ଆଉ ୨,୫୦୦ ଟଙ୍କା ଦାବି କରିଥିଲେ।
ଯାହା ପରେ ସେ ଭିଜିଲାନ୍ସକୁ ଜଣାଇଥିଲେ। ଅଭିଯୋଗ ପରେ ଭିଜିଲାନ୍ସ କର୍ତ୍ତୃପକ୍ଷ ଏକ ଜାଲ ବିଛାଇଥିଲେ। କନିଷ୍ଠ କ୍ଲର୍କ ଏବଂ ତାଙ୍କ ସହଯୋଗୀ ମହେନ୍ଦ୍ର ସାହୁଙ୍କୁ ଟଙ୍କା ଗ୍ରହଣ କରିବା ସମୟରେ ଧରିଥିଲେ ଟିମ୍। ଏନେଇ ଏକ ମାମଲା ରୁଜୁ କରାଯାଇଥିବା ବେଳେ ସୁକାନ୍ତଙ୍କ ପାଖରେ ଆୟବହିର୍ଭୁତ ସମ୍ପତି ଅଛି କି ନାହିଁ ତାହା ଜାଣିବା ପାଇଁ ତାଙ୍କ ସହିତ ଜଡିତ ଦୁଇଟି ସ୍ଥାନରେ ଚଢାଉ କରାଯାଉଛି।
