ନ୍ୟୁଜ ଡେକ୍ସ : ବଲାଙ୍ଗିର ଜିଲ୍ଲାର ଟିଟିଲାଗଡ଼ ରେଳଷ୍ଟେସନରେ ଆରପିଏଫ (ରେଳ ସୁରକ୍ଷା ବଳ) ଏକ ବିଶେଷ ଅଭିଯାନ ସମୟରେ ୭୦ ଲକ୍ଷ ଟଙ୍କା ଜବତ କରିଛି। ଏହି ଟଙ୍କା ଏର୍ଣ୍ଣାକୁଲମ–ହଟିଆ ଧରତୀ ଆବା ସୁପରଫାଷ୍ଟ ଏକ୍ସପ୍ରେସ ଟ୍ରେନରୁ ମିଳିଛି।ସୂଚନା ଅନୁଯାୟୀ, ଆରପିଏଫ କର୍ମଚାରୀମାନେ ନିୟମିତ ଯାଞ୍ଚ କରୁଥିବା ସମୟରେ ଟ୍ରେନର ଗୋଟିଏ ବଗିରେ ସନ୍ଦିଗ୍ଧ ଏକ ବ୍ୟାଗ ଦେଖିଥିଲେ।
ବ୍ୟାଗଟି ଖୋଲି ଦେଖିଲେ, ସେଠାରେ ବିପୁଳ ପରିମାଣର ନଗଦ ଟଙ୍କା ଥିଲା। ତଦନ୍ତରେ ଜଣାପଡ଼ିଛି ଯେ, ଏହି ଟଙ୍କା ପ୍ରଭାତ କୁମାର ସାହୁ ଓ ଉମେଶ ପ୍ରସାଦ ନାମକ ଦୁଇ ଯାତ୍ରୀଙ୍କ ସହିତ ସମ୍ପର୍କିତ।ଯେତେବେଳେ ଆରପିଏଫ ସେମାନଙ୍କୁ ଟଙ୍କାର ଉତ୍ସ ବିଷୟରେ ପଚାରିଥିଲେ, ସେମାନେ ସଠିକ୍ ଉତ୍ତର ଦେଇପାରିନଥିଲେ। ଏହି ପରିସ୍ଥିତିରେ ସେମାନଙ୍କୁ ତୁରନ୍ତ ଅଟକ କରାଯାଇଛି ଏବଂ ଅଧିକ ପଚରାଉଚରା ପାଇଁ ହେପାଜତରେ ନେଇ ଯାଇଛି। ଏହି ଘଟଣା ସମ୍ପର୍କରେ ଆୟକର ବିଭାଗକୁ ମଧ୍ୟ ସୂଚନା ଦିଆଯାଇଛି ଏବଂ ଟଙ୍କାର ଉତ୍ସ ଓ ଉଦ୍ଦେଶ୍ୟ ସମ୍ପର୍କରେ ତଦନ୍ତ ଚାଲିଛି।
ଏହି ଟଙ୍କାର ନୂଆପଡ଼ା ବିଧାନସଭା ଉପନିର୍ବାଚନ ସହିତ କୌଣସି ସମ୍ପର୍କ ଅଛି କି ନାହିଁ, ସେଥିପାଇଁ ମଧ୍ୟ ଯାଞ୍ଚ ଚାଲିଛି। ନିର୍ବାଚନ ପୂର୍ବରୁ ଏଭଳି ଘଟଣା ଘଟିବାରୁ ନିର୍ବାଚନ କମିଶନ ଓ ଆୟକର ବିଭାଗ ଦୁଇଁ ମଧ୍ୟ ସତର୍କ ହୋଇଛନ୍ତି।ଏପରି ଘଟଣା ନିର୍ବାଚନ ସମୟରେ ଅବୈଧ ଟଙ୍କା ବ୍ୟବହାର ନେଇ ଚିନ୍ତା ବଢ଼ାଇଦେଇଛି। ରେଳ ଏବଂ ଆୟକର ଅଧିକାରୀମାନେ ଏହି ମାମଲାକୁ ଗୁରୁତ୍ୱ ସହକାରେ ତଦନ୍ତ କରୁଛନ୍ତି।
