ନ୍ୟୁଜ ଡେକ୍ସ : ଓଡିଶା ବିଦ୍ୟୁତ ନିୟାମକ ଆୟୋଗର ଅଧ୍ୟକ୍ଷ ପଦରୁ ପ୍ରଦୀପ କୁମାର ଜେନା ଇସ୍ତଫା ଦେଇଛନ୍ତି। ବ୍ୟକ୍ତିଗତ କାରଣ ଦର୍ଶାଇ ସେ ଏହି ପଦବୀ ଛାଡ଼ିଥିବା ଜଣାପଡ଼ିଛି। ଏନେଇ ରାଜ୍ୟ ଶକ୍ତି ବିଭାଗ ପକ୍ଷରୁ ସୋମବାର ଏକ ଅଧିସୂଚନା ଜାରି କରାଯାଇଛି। ଏହି ଅଧିସୂଚନାରେ ଉଲ୍ଲେଖ କରାଯାଇଛି ଯେ, ପ୍ରଦୀପ କୁମାର ଜେନାଙ୍କ ଇସ୍ତଫାକୁ ରାଜ୍ୟ ସରକାର ଗ୍ରହଣ କରିଛନ୍ତି ଏବଂ ରାଜ୍ୟପାଳଙ୍କ ଆଦେଶ କ୍ରମେ ତାଙ୍କୁ ୨୦୨୬ ମସିହା ମେ ୨୫ ତାରିଖରୁ ପଦ ଛାଡ଼ିବାକୁ ଅନୁମତି ପ୍ରଦାନ କରାଯାଇଛି।
ପ୍ରଦୀପ କୁମାର ଜେନା ଜଣେ ଅବସରପ୍ରାପ୍ତ ଆଇଏଏସ ଅଧିକାରୀ ଭାବେ ପ୍ରଶାସନିକ କ୍ଷେତ୍ରରେ ଦୀର୍ଘ ଅନୁଭବ ରଖିଥିଲେ। ସେ ଓଡିଶା ବିଦ୍ୟୁତ ନିୟାମକ ଆୟୋଗର ଅଧ୍ୟକ୍ଷ ଭାବେ ଯୋଗଦେବା ପରେ ରାଜ୍ୟର ବିଦ୍ୟୁତ ବିତରଣ ବ୍ୟବସ୍ଥା, ଶୁଳ୍କ ନିର୍ଦ୍ଧାରଣ, ଉପଭୋକ୍ତା ସୁବିଧା ଏବଂ ବିଦ୍ୟୁତ କ୍ଷେତ୍ରର ବିଭିନ୍ନ ନିୟାମକ ଓ ନୀତିଗତ ପ୍ରସଙ୍ଗର ତଦାରଖ କରୁଥିଲେ। ତାଙ୍କ ଅଧ୍ୟକ୍ଷତା କାଳରେ ବିଦ୍ୟୁତ କ୍ଷେତ୍ରରେ ନିୟମିତ ସମୀକ୍ଷା, ଶୁଳ୍କ ନିର୍ଦ୍ଧାରଣ ସମ୍ବନ୍ଧୀୟ ଶୁଣାଣି ଏବଂ ବିତରଣ ବ୍ୟବସ୍ଥାର ସୁଧାର ଉପରେ ବିଶେଷ ଗୁରୁତ୍ୱ ଦିଆଯାଇଥିଲା। ଓଡିଶା ବିଦ୍ୟୁତ ନିୟାମକ ଆୟୋଗ ରାଜ୍ୟର ବିଦ୍ୟୁତ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ନିୟାମକ ସଂସ୍ଥା ଭାବେ କାର୍ଯ୍ୟ କରୁଛି।
ଏହା ବିଦ୍ୟୁତ ଉତ୍ପାଦନ, ବିତରଣ ଏବଂ ଶୁଳ୍କ ନିର୍ଦ୍ଧାରଣ ସହିତ ଉପଭୋକ୍ତା ସ୍ୱାର୍ଥ ସୁରକ୍ଷାରେ ମୁଖ୍ୟ ଭୂମିକା ନିଭାଇଥାଏ। ଏପରି ଏକ ଗୁରୁତ୍ୱପୂର୍ଣ୍ଣ ପଦରୁ ପ୍ରଦୀପ କୁମାର ଜେନାଙ୍କ ଇସ୍ତଫାକୁ ନେଇ ପ୍ରଶାସନିକ ମହଳରେ ଚର୍ଚ୍ଚା ଆରମ୍ଭ ହୋଇଛି।ତେବେ ତାଙ୍କ ଇସ୍ତଫା ପରେ ଓଡିଶା ବିଦ୍ୟୁତ ନିୟାମକ ଆୟୋଗର ନୂତନ ଅଧ୍ୟକ୍ଷ କିଏ ହେବେ ଓ ଏହି ପଦବୀ ପାଇଁ କେବେ ନିଯୁକ୍ତି ପ୍ରକ୍ରିୟା ଆରମ୍ଭ ହେବ, ସେନେଇ ଏପର୍ଯ୍ୟନ୍ତ ସରକାରୀ ସ୍ତରରୁ କୌଣସି ସ୍ପଷ୍ଟ ସୂଚନା ମିଳିନାହିଁ।
