ନ୍ୟୁଜ ଡେକ୍ସ : ପଶ୍ଚିମବଙ୍ଗ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଭାରତୀୟ ରେଳ ପରିବହନ କ୍ଷେତ୍ରରେ ଏକ ଐତିହାସିକ ମାଇଲସ୍ଟୋନ୍ ସୃଷ୍ଟି କରିଛନ୍ତି। ଦେଶର ପ୍ରଥମ ବନ୍ଦେ ଭାରତ ଏକ୍ସପ୍ରେସ ସ୍ଲିପର ଟ୍ରେନକୁ ସେ ପତାକା ଦେଖାଇ ଶୁଭାରମ୍ଭ କରିଛନ୍ତି। ଏହି ଆଧୁନିକ ଟ୍ରେନଟି ହାଓଡ଼ାରୁ ଗୁଵାହାଟି (କାମାଖ୍ୟା) ପର୍ଯ୍ୟନ୍ତ ଚଳାଚଳ କରିବ ଏବଂ ଜାନୁଆରୀ ୧୮ ତାରିଖରୁ ନିୟମିତ ସେବା ଆରମ୍ଭ କରିବ।
ଦୂରଗାମୀ ଯାତ୍ରୀଙ୍କୁ ଦୃଷ୍ଟିରେ ରଖି ଡିଜାଇନ କରାଯାଇଥିବା ବନ୍ଦେ ଭାରତ ସ୍ଲିପର ଟ୍ରେନ ଦ୍ରୁତ, ସୁରକ୍ଷିତ ଓ ଆରାମଦାୟକ ଯାତ୍ରା ପାଇଁ ଏକ ନୂଆ ବିକଳ୍ପ ଭାବେ ଉଭୟ ରାଜ୍ୟ ଓ ଉତ୍ତର–ପୂର୍ବ ଭାରତ ପାଇଁ ଗୁରୁତ୍ୱ ନେଇଆସିଛି। ଟ୍ରେନରେ ଏସି ପ୍ରଥମ ଶ୍ରେଣୀ, ଏସି ଦ୍ୱିତୀୟ ଶ୍ରେଣୀ ଏବଂ ଏସି ତୃତୀୟ ଶ୍ରେଣୀ ସ୍ଲିପର କୋଚ ରହିଛି, ଯାହା ଯାତ୍ରୀମାନଙ୍କୁ ନିଜ ଆବଶ୍ୟକତା ଅନୁଯାୟୀ ସୁବିଧା ବାଛିବାର ସୁଯୋଗ ଦେଉଛି।ଯାତ୍ରୀ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ, ଏହି ଟ୍ରେନକୁ ‘କବଚ’ ସ୍ୱୟଂଚାଳିତ ଟ୍ରେନ ସୁରକ୍ଷା ପ୍ରଣାଳୀ ସହିତ ସଜ୍ଜିତ କରାଯାଇଛି। ଏହା ସହ ଜରୁରୀକାଳୀନ ଟକ୍–ବ୍ୟାକ ୟୁନିଟ, ଡ୍ରାଇଭର କ୍ୟାବିନରେ ଆଧୁନିକ କଣ୍ଟ୍ରୋଲ ସିଷ୍ଟମ ଏବଂ ଉନ୍ନତ ମନିଟରିଂ ବ୍ୟବସ୍ଥା ରହିଛି, ଯାହା ଯାତ୍ରାକୁ ଅଧିକ ସୁରକ୍ଷିତ କରିବ। ଟ୍ରେନର ଭିତର ଡିଜାଇନରେ ଭାରତୀୟ ସଂସ୍କୃତିର ଝଲକ ସ୍ପଷ୍ଟ ଭାବେ ପ୍ରତିଫଳିତ ହୋଇଛି।
ଆଧୁନିକ ଆଲୋକ, ସୁନ୍ଦର ଲେଆଉଟ ଏବଂ ଆରାମଦାୟକ ବେର୍ଥ୍ ବ୍ୟବସ୍ଥା ଦୀର୍ଘ ଯାତ୍ରାକୁ ସହଜ ଓ ସୁଖଦ କରିବ। ବାହ୍ୟ ଡିଜାଇନକୁ ଏମିତି ଭାବେ ତିଆରି କରାଯାଇଛି, ଯାହା ବାୟୁ ପ୍ରତିରୋଧ କମାଇ ଉଚ୍ଚ ଗତିରେ ଚଳାଚଳକୁ ସମ୍ଭବ କରିବ।ପରିଚ୍ଛନ୍ନତା ଦୃଷ୍ଟିରୁ ଟ୍ରେନରେ ବିଶେଷ ଜୀବାଣୁନାଶକ ପ୍ରଯୁକ୍ତି ବ୍ୟବହାର କରାଯାଇଛି, ଯାହା କୋଚ ଭିତରେ ସ୍ୱଚ୍ଛ ଓ ସୁରକ୍ଷିତ ପରିବେଶ ସୁନିଶ୍ଚିତ କରିବ।ଏହି ଶୁଭାରମ୍ଭ ପରେ ପ୍ରଧାନମନ୍ତ୍ରୀ ମୋଦି ଏକ ସରକାରୀ କାର୍ଯ୍ୟକ୍ରମରେ ଯୋଗ ଦେବା ସହିତ ଏକ ବିଶାଳ ରାଲିକୁ ସମ୍ବୋଧିତ କରିବେ ବୋଲି ଜଣାପଡ଼ିଛି।
ଭୋଟର ତାଲିକା ସଂଶୋଧନ (SIR) ଏବଂ I-PAC ଉପରେ ହୋଇଥିବା ଇଡି ଚଢାଉକୁ ନେଇ ପଶ୍ଚିମବଙ୍ଗରେ ଚାଲିଥିବା ରାଜନୈତିକ ଚର୍ଚ୍ଚା ମଧ୍ୟରେ ଏହି ଗସ୍ତକୁ ବେଶ୍ ଗୁରୁତ୍ୱପୂର୍ଣ୍ଣ ମନାଯାଉଛି। ଅପରାହ୍ନରେ ପ୍ରଧାନମନ୍ତ୍ରୀ ସଂଖ୍ୟାଲଘୁ ବହୁଳ ମାଲଦା ଅଞ୍ଚଳରେ ଏକ ରାଲିକୁ ସମ୍ବୋଧିତ କରିବେ ବୋଲି ମଧ୍ୟ ସୂଚନା ମିଳିଛି।
