ନ୍ୟୁଜ ଡେକ୍ସ : ଆଜି ଓମାନର ରାଜଧାନୀ ମସ୍କଟରେ ଆମେରିକା ଏବଂ ଇରାନ ମଧ୍ୟରେ ଏକ ଅତ୍ୟନ୍ତ ସମ୍ବେଦନଶୀଳ ପରମାଣୁ ଆଲୋଚନା ଅନୁଷ୍ଠିତ ହେବାକୁ ଯାଉଛି। ଦୁଇ ଦେଶ ମଧ୍ୟରେ ଦୀର୍ଘଦିନ ଧରି ଚାଲିଥିବା ଉତ୍ତେଜନା ମଧ୍ୟରେ ଏହି ବୈଠକକୁ ମଧ୍ୟପ୍ରାଚ୍ୟର ସୁରକ୍ଷା ପାଇଁ ଏକ ନିର୍ଣ୍ଣାୟକ ମୁହୂର୍ତ୍ତ ଭାବେ ଦେଖାଯାଉଛି।ଯଦିଓ ଉଭୟ ଦେଶ ଆଲୋଚନାକୁ ବସିବାକୁ ରାଜି ହୋଇଛନ୍ତି, ତଥାପି ଏଜେଣ୍ଡାକୁ ନେଇ ମତଭେଦ ଏପର୍ଯ୍ୟନ୍ତ ରହିଛି।
ଆମେରିକା ଚାହୁଁଛି ଯେ ଇରାନର ପରମାଣୁ କାର୍ଯ୍ୟକ୍ରମ ସହ ସେହିଦେଶର କ୍ଷେପଣାସ୍ତ୍ର କାର୍ଯ୍ୟକ୍ରମ ମଧ୍ୟ ଆଲୋଚନାରେ ଆସୁ, କିନ୍ତୁ ଇରାନ ସ୍ପଷ୍ଟ ଭାବରେ କହିଛି ଯେ ତାଙ୍କର କ୍ଷେପଣାସ୍ତ୍ର କାର୍ଯ୍ୟକ୍ରମ ଆଲୋଚନାର ସୀମାରୁ ବାହାରେ। ଇରାନ ନିଜର ପରମାଣୁ କାର୍ଯ୍ୟକ୍ରମକୁ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ବୋଲି ଦାବି କରୁଥିବା ବେଳେ, ଆମେରିକା ଏବଂ ଇସ୍ରାଏଲ ଏହା ମାଧ୍ୟମରେ ପରମାଣୁ ଅସ୍ତ୍ର ବିକାଶ ହେବାର ଆଶଙ୍କା ପ୍ରକାଶ କରୁଛନ୍ତି। ଏହି ଆଲୋଚନା ପୂର୍ବରୁ ଅଞ୍ଚଳରେ ସାମରିକ ଉତ୍ତେଜନା ଚରମରେ ପହଞ୍ଚିଛି। ଆମେରିକା ଆରବ ସାଗରରେ ନିଜର ଯୁଦ୍ଧ ବିମାନ ଓ ନୌସେନାକୁ ମୁତୟନ କରିଛି, ଯେତେବେଳେ ଇରାନ କ୍ଷେପଣାସ୍ତ୍ର ପରୀକ୍ଷଣ କରି ଏକ ନୂତନ ଭୂମିଗତ କ୍ଷେପଣାସ୍ତ୍ର କେନ୍ଦ୍ର ଖୋଲିଛି।
ଏହାରି ମଧ୍ୟରେ ଆମେରିକାର ନୌସେନା ଏକ ଇରାନୀ ଡ୍ରୋନକୁ ଖସାଇ ଦେବା ଘଟଣା ଦୁଇ ଦେଶ ମଧ୍ୟରେ ଶକ୍ତି ପ୍ରଦର୍ଶନକୁ ଆହୁରି ତୀବ୍ର କରିଛି।ଆଜିର ବୈଠକ କତାର, ତୁର୍କୀ ଓ ମିଶରଙ୍କ ମଧ୍ୟସ୍ଥତାରେ ହେଉଛି ଏବଂ ଏହାକୁ ଓମାନର ବୈଦେଶିକ ମନ୍ତ୍ରୀ ବଦର ଅଲ–ବୁସୈଦି ପରିଚାଳନା କରିବେ। ଇରାନ ପକ୍ଷରୁ ଆବାସ ଅରାଘଚି ଏବଂ ଆମେରିକା ପକ୍ଷରୁ ଜେରେଡ କୁଶନର ଓ ଷ୍ଟିଭ ୱିଟକଫ ଆଲୋଚନାରେ ଭାଗ ନେବେ। ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ମଧ୍ୟ ସୂଚନା ଦେଇଛନ୍ତି ଯେ ଆଲୋଚନା ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ କେନ୍ଦ୍ରିତ ହେବ।
ଉପସାଗରୀୟ ଦେଶଗୁଡ଼ିକ ଭୟ କରୁଛନ୍ତି ଯେ ଯଦି ଏହି ଆଲୋଚନା ବିଫଳ ହୁଏ, ତେବେ ଦୁଇ ପକ୍ଷର ମଧ୍ୟରେ ଭୁଲ ପଦକ୍ଷେପ ସମ୍ପୂର୍ଣ୍ଣ ଯୁଦ୍ଧକୁ ଜନ୍ମ ଦେଇପାରେ। ଏହିକାରଣରୁ ଓମାନରେ ହେବାକୁ ଥିବା ଏହି ସମ୍ମିଳନୀକୁ କେବଳ ଦୁଇ ଦେଶ ନୁହେଁ, ସମଗ୍ର ବିଶ୍ୱ ଗଭୀର ଆଗ୍ରହରେ ନଜର ରଖିଛି।
