ନ୍ୟୁଜ ଡେକ୍ସ : ତିରୁମାଲା ତିରୁପତି ଦେବସ୍ଥାନମ୍ (TTD)ରେ ନକଲି ଘିଅ ଘଟଣା ପରେ ଏବେ ନକଲି ସିଲ୍କ କପଡ଼ାର ମହାଘୋଟାଳା ପ୍ରକାଶ ଆସିଛି। ୨୦୧୫ ରୁ ୨୦୨୫ ମଧ୍ୟରେ ପାଖାପାଖି ଦଶବର୍ଷ ଧରି ମନ୍ଦିରକୁ ଯୋଗାଯାଉଥିବା ରେଶମ ଚୁନି (dupatta) ଶୁଦ୍ଧ ରେଶମ ନୁହେଁ, ୧୦୦% ପଲିଷ୍ଟର ଥିବା ଜଣାପଡିଛି। ମୋଟ ଘୋଟାଳାର ଅନୁମାନିତ ମୂଲ୍ୟ ୫୪ କୋଟି ଟଙ୍କା।
ଟିଟିଡି ବୋର୍ଡ ଅଧ୍ୟକ୍ଷ ବି.ଆର. ନାଇଡୁଙ୍କ ନିର୍ଦ୍ଦେଶରେ ଆଭ୍ୟନ୍ତରୀଣ ଭିଜିଲାନ୍ସ ତଦନ୍ତ କରାଯାଇଥିଲା। ତଦନ୍ତରେ ଉଦ୍ଘାଟିତ ହୋଇଛି ଯେ ଠିକାଦାର ଟେଣ୍ଡରରେ ଶୁଦ୍ଧ ରେଶମ ଉତ୍ପାଦ ଯୋଗାଣ ଦାବି କରିଥିବା ସତ୍ତ୍ୱେ ବାସ୍ତବରେ ଶସ୍ତା ପଲିଷ୍ଟର କପଡ଼ା ଯୋଗାଇ ଆସୁଥିଲେ। ମନ୍ଦିରରେ ଭକ୍ତମାନଙ୍କୁ ପ୍ରସାଦ ରୂପେ ଦିଆଯାଏଥିବା ଏହି ଚୁନିଗୁଡ଼ିକ ପବିତ୍ର ବେଦଶିରବଚନମ୍ ଭଳି ଅନୁଷ୍ଠାନରେ ମଧ୍ୟ ବ୍ୟବହୃତ ହୁଏ। ଚୁନିରେ ରେଶମ ହୋଲୋଗ୍ରାମ ଲଗାଇବାର ନିୟମ ମଧ୍ୟ ଅନୁସରଣ କରାଯାଇ ନଥିଲା।
ଟିଟିଡି ଅଧ୍ୟକ୍ଷ ବି.ଆର. ନାଇଡୁ କହିଛନ୍ତି—“୩୫୦ ଟଙ୍କାର ଏକ ପଲିଷ୍ଟର ଚୁନିକୁ ରେଶମ ଭାବେ ୧୩୦୦ ଟଙ୍କାରେ ଦେଖାଯାଇଥିଲା। ଏପର୍ଯ୍ୟନ୍ତ ଥିବା ସମସ୍ତ ଯୋଗାଣର ମୂଲ୍ୟ ୫୦ କୋଟି ଟଙ୍କା ଅଧିକ ହୋଇପାରେ। ଆମେ ଏହାକୁ ଏସିବି (ଦୁର୍ନୀତି ନିବାରଣ ବ୍ୟୁରୋ) ତଦନ୍ତ ପାଇଁ ପଠାଇଛୁ।”ଏହି ଘଟଣା ପରେ TTD ଏହି କମ୍ପାନୀର ସମସ୍ତ ଚାଲୁ ଟେଣ୍ଡର ବାତିଲ କରିଛି ଏବଂ ନିଷେଧ ଲଗାଇଛି।
ଆନ୍ଧ୍ରପ୍ରଦେଶ ସରକାର ମାମଲାକୁ ଗୁରୁତ୍ତ୍ୱ ଦେଇ ACB କୁ ପୂରା ଷଡ଼ଯନ୍ତ୍ର ଏବଂ ଆର୍ଥିକ ଅନିୟମିତତା ବିଷୟରେ ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।TTD ଏବେ ନୂତନ ଟେଣ୍ଡର ପ୍ରକ୍ରିୟାରେ କଠିନ ଗୁଣନିୟନ୍ତ୍ରଣ ନିୟମ ଆଣିବାକୁ ଯୋଜନା କରିଛି। ACB ର ତଦନ୍ତ ରିପୋର୍ଟ ଆସିବା ପରେ ଅନେକ ପ୍ରମୁଖ ଅଧିକାରୀଙ୍କ ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ସମ୍ଭାବନା ରହିଛି।ଏହି ଘୋଟାଳା ସାରା ଦେଶରେ ଚର୍ଚ୍ଚାରେ ଆସିଛି ଏବଂ ଧାର୍ମିକ ସଂସ୍ଥାଗୁଡ଼ିକରେ ପାରଦର୍ଶିତା ଓ ନିୟନ୍ତ୍ରଣ ବୃଦ୍ଧି ପାଇଁ ଦାବି ତୀବ୍ର ହୋଇଛି।
