ନ୍ୟୁଜ ଡେକ୍ସ : ଆମେରିକାର ଟେକ୍ସାସ ରାଜ୍ୟର ଗାଲଭେଷ୍ଟନ୍ ନିକଟରେ ମେକ୍ସିକାନ୍ ନୌସେନାର ଏକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ଅତି କମରେ ପାଞ୍ଚ ଜଣଙ୍କର ମୃତ୍ୟୁ ଘଟିଥିବା ଆମେରିକାନ୍ ତଟରକ୍ଷୀ ବାହିନୀ ନିଶ୍ଚିତ କରିଛି। ବିମାନଟିରେ ମୋଟ ସାତ ଜଣ ଥିବା ବେଳେ ଅବଶିଷ୍ଟ ବଞ୍ଚିଥିବା ଲୋକଙ୍କ ଖୋଜା ଟେକ୍ସାସ ଉପକୂଳ ଜଳରେ ଜାରି ରହିଛି।
ସୂଚନା ଅନୁଯାୟୀ, ବିମାନଟି ସୋମବାର ଅପରାହ୍ନରେ ଗାଲଭେଷ୍ଟନ୍ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା। ମେକ୍ସିକାନ୍ ନୌସେନା ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ, ବିମାନଟି ଏକ ମେଡିକାଲ ମିଶନରେ ଥିଲା ଏବଂ ଜଣେ ଗୁରୁତର ଅସୁସ୍ଥ ଯୁବକଙ୍କୁ ହସ୍ପିଟାଲକୁ ନେଇଯାଉଥିଲା। ବିମାନରେ ଚାରି ଜଣ ନୌସେନା ଅଧିକାରୀ, ଜଣେ ଶିଶୁ ଓ ଅନ୍ୟାନ୍ୟ ଯାତ୍ରୀ ଥିବା ସୂଚନା ମିଳିଛି।ଦୁର୍ଘଟଣା ପରେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ଗାଲଭେଷ୍ଟନ୍ ସେରିଫ୍ କାର୍ଯ୍ୟାଳୟ ଅନୁଯାୟୀ, ଘଟଣା ସମ୍ପର୍କରେ ସମସ୍ତ ପ୍ରମୁଖ ଦିଗରୁ ତଦନ୍ତ ଚାଲିଛି।
ମେକ୍ସିକାନ୍ ନୌସେନା କହିଛି ଯେ ମୃତକଙ୍କ ସଠିକ୍ ସଂଖ୍ୟା ନିର୍ଣ୍ଣୟ କରିବା ଏପର୍ଯ୍ୟନ୍ତ କଷ୍ଟକର ହୋଇପଡ଼ିଛି। ଉଲ୍ଲେଖଯୋଗ୍ୟ ଯେ, ଗାଲଭେଷ୍ଟନ୍ ଏକ ପ୍ରସିଦ୍ଧ ସମୁଦ୍ରତଟ ଓ ପର୍ଯ୍ୟଟନ କେନ୍ଦ୍ର। ଗତ କିଛି ଦିନ ଧରି ଏହି ଅଞ୍ଚଳରେ କୁହୁଡ଼ି ଛାଇ ରହିଥିବା ବେଳେ, ଖରାପ ପାଗ ଦୁର୍ଘଟଣାର କାରଣ କି ନୁହେଁ, ସେଥିପାଇଁ ତଦନ୍ତ ଚାଲିଛି। ଘଟଣା ସମ୍ପର୍କରେ ନୂଆ ସୂଚନା ମିଳିଲେ ସତ୍ୱର ପ୍ରକାଶ କରାଯିବ ବୋଲି କର୍ତ୍ତୃପକ୍ଷ କହିଛନ୍ତି।
