ନ୍ୟୁଜ ଡେକ୍ସ : ଆଜି ଦେଶର କେନ୍ଦ୍ରୀୟ ବଜେଟ୍ ଉପସ୍ଥାପନ ହେବାକୁ ଯାଉଥିବା ବେଳେ, ତାହା ପୂର୍ବରୁ ମୁଦ୍ରାସ୍ଫୀତିର ଏକ ବଡ଼ ଝଟକା ସାମ୍ନାକୁ ଆସିଛି। ସରକାରୀ ତୈଳ ବିପଣନ କମ୍ପାନିଗୁଡ଼ିକ ୧୯ କିଲୋଗ୍ରାମ ବାଣିଜ୍ୟିକ ଏଲ୍ପିଜି ସିଲିଣ୍ଡରର ମୂଲ୍ୟ ବୃଦ୍ଧି କରିଛନ୍ତି। ଏହି ନୂଆ ଦର ୧ ଫେବୃଆରିରୁ ଦିଲ୍ଲୀ, ମୁମ୍ବାଇ, କୋଲକାତା ଓ ଚେନ୍ନାଇ ସମେତ ସାରା ଦେଶରେ ଲାଗୁ ହୋଇଛି।
ଏହି ମୂଲ୍ୟ ବୃଦ୍ଧି ବିଶେଷକରି ହୋଟେଲ, ରେଷ୍ଟୁରାଣ୍ଟ, ଢାବା, କ୍ୟାଟରିଂ ସେବା ଓ ଅନ୍ୟାନ୍ୟ ବ୍ୟବସାୟିକ ପ୍ରତିଷ୍ଠାନମାନଙ୍କ ପାଇଁ ଅଧିକ ଭାର ବଢ଼ାଇବ ବୋଲି ଆଶଙ୍କା କରାଯାଉଛି। କାରଣ ଏହି ସଂସ୍ଥାମାନେ ପ୍ରଧାନତଃ ୧୯ କିଲୋଗ୍ରାମ ବାଣିଜ୍ୟିକ ସିଲିଣ୍ଡର ଉପରେ ନିର୍ଭର କରନ୍ତି। ମୂଲ୍ୟ ବୃଦ୍ଧିର ପ୍ରଭାବ ସିଧାସଳଖ ଭାବେ ଖାଦ୍ୟ ପଦାର୍ଥ, ହୋଟେଲ ଖର୍ଚ୍ଚ ଓ ସେବା ଦର ଉପରେ ପଡ଼ିପାରେ, ଯାହା ଆମ ସାଧାରଣ ଗ୍ରାହକଙ୍କ ଉପରେ ମହଙ୍ଗାଇର ଚାପ ବଢ଼ାଇପାରେ। ତେବେ ଏଠାରେ ଏକ ରାହାତ ମଧ୍ୟ ରହିଛି। ଘରୋଇ ଉପଯୋଗ ପାଇଁ ବ୍ୟବହୃତ ଏଲ୍ପିଜି ଗ୍ୟାସ୍ ସିଲିଣ୍ଡରର ମୂଲ୍ୟରେ କୌଣସି ପରିବର୍ତ୍ତନ କରାଯାଇନାହିଁ।
ଅର୍ଥାତ୍ ସାଧାରଣ ଘରେ ରନ୍ଧଣା ପାଇଁ ବ୍ୟବହୃତ ଗ୍ୟାସ୍ ଉପରେ ଏହି ନୂଆ ମୂଲ୍ୟ ବୃଦ୍ଧିର ପ୍ରଭାବ ପଡ଼ିବ ନାହିଁ।ସୂଚନା ଅନୁସାରେ, ସରକାରୀ ପେଟ୍ରୋଲିୟମ୍ ମାର୍କେଟିଂ କମ୍ପାନୀଗୁଡ଼ିକ ପ୍ରତି ମାସର ପ୍ରଥମ ତାରିଖରେ ଏଲ୍ପିଜି ସିଲିଣ୍ଡରର ମୂଲ୍ୟ ସମୀକ୍ଷା କରନ୍ତି। ଆନ୍ତର୍ଜାତୀୟ ବଜାରରେ ଇଂଧନ ମୂଲ୍ୟ, ଡଲାର-ଟଙ୍କା ମୁଦ୍ରା ହାର, ପରିବହନ ଖର୍ଚ୍ଚ ଓ ଅନ୍ୟାନ୍ୟ ଆର୍ଥିକ ଘଟକକୁ ଧ୍ୟାନରେ ରଖି ଏହି ଦର ନିର୍ଦ୍ଧାରଣ କରାଯାଏ।ଗତ କିଛି ମାସ ଧରି ବାଣିଜ୍ୟିକ ଗ୍ୟାସ୍ ସିଲିଣ୍ଡରର ଦରରେ ଉତ୍ତାର-ଚଢ଼ାଉ ଦେଖାଯାଉଛି। ପୂର୍ବରୁ ଜାନୁଆରୀ ମାସରେ ମଧ୍ୟ ୧୯ କିଲୋଗ୍ରାମ ବାଣିଜ୍ୟିକ ସିଲିଣ୍ଡରର ମୂଲ୍ୟ ବୃଦ୍ଧି କରାଯାଇଥିଲା।
ତାହା ପୂର୍ବରୁ ଗତ ବର୍ଷ ନଭେମ୍ବର ଓ ଡିସେମ୍ବରରେ ଏହି ସିଲିଣ୍ଡରର ମୂଲ୍ୟ କ୍ରମଶଃ ପାଞ୍ଚ ଟଙ୍କା ଓ ଦଶ ଟଙ୍କା କମାଯାଇଥିଲା।ବଜେଟ୍ ଦିନରେ ଏଭଳି ମୂଲ୍ୟ ବୃଦ୍ଧି ଘୋଷଣା ହେବାରୁ ବ୍ୟବସାୟୀ ଓ ଉପଭୋକ୍ତା ମଧ୍ୟରେ ଚିନ୍ତା ବଢ଼ିଛି। ବଜେଟ୍ରେ ସରକାର କେମିତି ମୁଦ୍ରାସ୍ଫୀତି ନିୟନ୍ତ୍ରଣ, ଇଂଧନ ମୂଲ୍ୟ ସ୍ଥିରତା ଓ ସାଧାରଣ ଲୋକଙ୍କୁ ରାହାତ ଦେବା ପାଇଁ କେଉଁ ପଦକ୍ଷେପ ଘୋଷଣା କରିବେ, ସେଥିପାଇଁ ସମଗ୍ର ଦେଶ ଅପେକ୍ଷାରେ ରହିଛି।
