ନ୍ୟୁଜ ଡେକ୍ସ : ବିଧାନସଭା ନିର୍ବାଚନ ପୂର୍ବରୁ ଆସାମରେ ରାଜନୈତିକ ମହଲରେ ବଡ଼ ହଲଚଲ ସୃଷ୍ଟି ହୋଇଛି। ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଙ୍ଗଳବାର ପୂର୍ବତନ ଆସାମ କଂଗ୍ରେସ ସଭାପତି ଭୁପେନ ବୋରାଙ୍କ ସହ ସାକ୍ଷାତ୍କାର କରିଥିଲେ। ଏହି ବୈଠକ ପରେ ଶର୍ମା ଘୋଷଣା କରିଛନ୍ତି ଯେ ଭୁପେନ ବୋରା ଫେବୃଆରୀ ୨୨ ତାରିଖରେ ବିଜେପିରେ ଯୋଗଦେବେ।
ଭୁପେନ ବୋରା ସୋମବାର, ଫେବୃଆରୀ ୧୬ ତାରିଖରେ କଂଗ୍ରେସ ଦଳରୁ ଇସ୍ତଫା ଦେଇଥିଲେ। ସେ ୨୦୨୧ରୁ ୨୦୨୫ ପର୍ଯ୍ୟନ୍ତ ଆସାମ କଂଗ୍ରେସର ସଭାପତି ଭାବେ କାର୍ଯ୍ୟ କରିଥିଲେ। ତାଙ୍କ ଇସ୍ତଫା ପରେ କଂଗ୍ରେସ ହାଇକମାଣ୍ଡ ଏହାକୁ ଗ୍ରହଣ କରିନଥିବା ସହିତ ତାଙ୍କୁ ନିଷ୍ପତ୍ତି ପୁନର୍ବିଚାର କରିବାକୁ ପ୍ରବର୍ତ୍ତାଇଥିଲା।କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ଭୁପେନ ବୋରାଙ୍କୁ ମନାଇବା ପାଇଁ ଚେଷ୍ଟା କରି ତାଙ୍କୁ ନିଷ୍ପତ୍ତି ପୁନର୍ବିଚାର କରିବାକୁ ପରାମର୍ଶ ଦେଇଥିଲେ। ଏହା ପରେ ବୋରା କିଛି ସମୟ ଚାହିଁଥିଲେ ବୋଲି ସୂଚନା ମିଳିଛି।
ତଥାପି, ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ସାମ୍ବାଦିକମାନଙ୍କ ସହ କଥାବାର୍ତ୍ତାରେ ସ୍ପଷ୍ଟ କରିଛନ୍ତି ଯେ ଭୁପେନ ବୋରା ନିଶ୍ଚିତ ଭାବେ ଫେବୃଆରୀ ୨୨ରେ ବିଜେପିରେ ଯୋଗଦେବେ। ସେ କହିଛନ୍ତି ଯେ ଦିଲୀପ ସାଇକିଆ ଏହି ପ୍ରକ୍ରିୟାକୁ ଚୂଡ଼ାନ୍ତ କରିବେ ଏବଂ ଗୌହାଟୀ ସହ ଉତ୍ତର ଲଖିମପୁରରୁ ମଧ୍ୟ ବହୁ ସଂଖ୍ୟକ କଂଗ୍ରେସ ନେତା ବିଜେପିରେ ଯୋଗଦେବାକୁ ପ୍ରସ୍ତୁତ ଅଛନ୍ତି।ଭୁପେନ ବୋରାଙ୍କ ଦଳ ବଦଳ ଆସାମର ଆସନ୍ତା ବିଧାନସଭା ନିର୍ବାଚନ ପୂର୍ବରୁ ରାଜ୍ୟର ରାଜନୀତିକୁ ଆହୁରି ସରଗରମ କରିଦେଇଛି।
