ନ୍ୟୁଜ ଡେକ୍ସ : ପ୍ରତିରକ୍ଷା କ୍ଷେତ୍ରରେ ଭାରତ ଆଉ ଏକ ବଡ଼ ସଫଳତା ହାସଲ କରିଛି। ଶୁକ୍ରବାର ଓଡ଼ିଶାର ଚାନ୍ଦିପୁରସ୍ଥିତ ସମନ୍ୱିତ ପରୀକ୍ଷଣ ପରିସରରେ ସ୍ୱଳ୍ପ ଦୂରଗାମୀ ବାଲିଷ୍ଟିକ୍ କ୍ଷେପଣାସ୍ତ୍ର ‘ଅଗ୍ନି-୧’ର ସଫଳ ପରୀକ୍ଷଣ କରାଯାଇଛି। ସେନାର ଷ୍ଟ୍ରାଟେଜିକ୍ ଫୋର୍ସ କମାଣ୍ଡ ତତ୍ତ୍ୱାବଧାନରେ ଏହି ପରୀକ୍ଷଣ ସମ୍ପନ୍ନ ହୋଇଥିଲା।ଏହି କ୍ଷେପଣାସ୍ତ୍ର ପ୍ରାୟ ୭୦୦ ରୁ ୧,୨୦୦ କିଲୋମିଟର ଦୂରରେ ଥିବା ଶତ୍ରୁ ଲକ୍ଷ୍ୟକୁ ଧ୍ୱଂସ କରିବାର କ୍ଷମତା ରଖିଛି।
ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ଅଗ୍ନି-୧ ଭାରତର ସ୍ୱଦେଶୀ ବାଲିଷ୍ଟିକ୍ କ୍ଷେପଣାସ୍ତ୍ର ସିରିଜର ଏକ ପ୍ରମୁଖ ଅଂଶ ଏବଂ ଏହା ଦେଶର ରଣନୈତିକ ପ୍ରତିରୋଧ କ୍ଷମତାକୁ ଆହୁରି ସୁଦୃଢ଼ କରିବ।ଡିଆରଡିଓ ଦ୍ୱାରା ବିକଶିତ ଏହି ସ୍ୱଦେଶୀ ସ୍ୱଳ୍ପ ଦୂରଗାମୀ ବାଲିଷ୍ଟିକ୍ କ୍ଷେପଣାସ୍ତ୍ର ସଠିକ୍ ଲକ୍ଷ୍ୟଭେଦ ପାଇଁ ପରିଚିତ। ଏହା ସଂପୂର୍ଣ୍ଣ ସଠିକତା ସହିତ ଶତ୍ରୁ ଲକ୍ଷ୍ୟକୁ ଆକ୍ରମଣ କରିପାରେ। ଅଗ୍ନି-୧ କ୍ଷେପଣାସ୍ତ୍ରର ମୋଟ ଲମ୍ବ ପ୍ରାୟ ୧୨ ମିଟର ଏବଂ ଏହାର ଓଜନ ପ୍ରାୟ ୧୨ ଟନ୍। ଏହା ୧ ଟନ୍ ପର୍ଯ୍ୟନ୍ତ ପରମାଣୁ କିମ୍ବା ପାରମ୍ପରିକ ବିସ୍ଫୋରକ ବହନ କରିବାର କ୍ଷମତା ରଖିଛି।ଏହି କ୍ଷେପଣାସ୍ତ୍ର ସଲିଡ ଫୁଏଲ୍ରେ ଚାଲିଥାଏ ଏବଂ ସଡ଼କ ପଥରେ ସହଜରେ ଯେକୌଣସି ସ୍ଥାନରୁ ଲଞ୍ଚ କରାଯାଇପାରେ।
ଅତ୍ୟନ୍ତ କମ ସମୟ ମଧ୍ୟରେ ଏହାକୁ ଲଞ୍ଚ ପାଇଁ ପ୍ରସ୍ତୁତ କରିହେବା ଏହାର ଏକ ବଡ଼ ବୈଶିଷ୍ଟ୍ୟ।ସୂଚନାଯୋଗ୍ୟ, ଅଗ୍ନି-୧ କ୍ଷେପଣାସ୍ତ୍ରକୁ ୨୦୦୪ ମସିହାରେ ଭାରତୀୟ ସେନାରେ ସାମିଲ କରାଯାଇଥିଲା। ସେଥିଠାରୁ ଏହା ଭାରତର ପରମାଣୁ ଶକ୍ତି ଓ ପ୍ରତିରକ୍ଷା ବ୍ୟବସ୍ଥାର ଏକ ଗୁରୁତ୍ୱପୂର୍ଣ୍ଣ ଅଂଶ ଭାବେ କାର୍ଯ୍ୟ କରୁଛି।ମେ ମାସର ଆରମ୍ଭରେ ଭାରତ ଉନ୍ନତ ଅଗ୍ନି ସିରିଜ୍ର ଅନ୍ୟ ଏକ କ୍ଷେପଣାସ୍ତ୍ରର ସଫଳ ପରୀକ୍ଷଣ କରିଥିଲା। ଆଜିର ସଫଳ ପରୀକ୍ଷଣ ଦେଶର ରଣନୈତିକ ଓ ପ୍ରତିରକ୍ଷା ପ୍ରଣାଳୀ ଆହୁରି ସୁଦୃଢ଼ ଓ ସଚେତନ ଥିବାକୁ ପ୍ରମାଣ କରିଛି।
