ନ୍ୟୁଜ ଡେକ୍ସ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ସରକାରୀ ରାସନ ବ୍ୟବସ୍ଥାକୁ ନେଇ ଏକ ବଡ଼ ଓ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଦେଶର ପ୍ରାୟ ୮୦ କୋଟି ରାସନ ହିତାଧିକାରୀଙ୍କୁ ସିଧାସଳଖ ପ୍ରଭାବିତ କରିବାକୁ ଯାଉଥିବା ଏହି ଯୋଜନାର ନାମ ରଖାଯାଇଛି ‘ସାର୍ଥକ-ପିଡିଏସ୍’। ଏହି ସମ୍ପୂର୍ଣ୍ଣ ଯୋଜନା ପାଇଁ କେନ୍ଦ୍ର ସରକାର ପ୍ରାୟ ୨୫ ହଜାର ୫୩୦ କୋଟି ଟଙ୍କା ବ୍ୟୟ କରିବେ ବୋଲି ସୂଚନା ମିଳିଛି।
କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କ୍ୟାବିନେଟ ବୈଠକ ପରେ ସାମ୍ବାଦିକମାନଙ୍କୁ ସୂଚନା ଦେଇ କହିଛନ୍ତି ଯେ, ସାରା ଦେଶରେ ଚାଲୁଥିବା ସରକାରୀ ରାସନ ବଣ୍ଟନ ବ୍ୟବସ୍ଥାକୁ ଆହୁରି ସୁଦୃଢ଼, ସ୍ୱଚ୍ଛ ଓ ଆଧୁନିକ କରିବା ଲକ୍ଷ୍ୟରେ ଏହି ନୂଆ ପଦକ୍ଷେପ ଗ୍ରହଣ କରାଯାଇଛି। ସେ କହିଛନ୍ତି ଯେ, ଏହି ଯୋଜନାରେ ତିନୋଟି ପ୍ରମୁଖ ପରିବର୍ତ୍ତନ କରାଯାଇଛି।ପ୍ରଥମ ପରିବର୍ତ୍ତନ ଅନୁସାରେ, ରାଜ୍ୟ ସରକାରମାନଙ୍କୁ ରାସନ ଶସ୍ୟ ପରିବହନ ପାଇଁ ଆର୍ଥିକ ସହାୟତା ଦିଆଯିବ। ଏପର୍ଯ୍ୟନ୍ତ ରାଜ୍ୟ ସରକାରମାନେ ଭାରତୀୟ ଖାଦ୍ୟ ନିଗମର ଗୋଦାମରୁ ଜିଲ୍ଲା, ବ୍ଲକ ଓ ରାସନ ଦୋକାନ ପର୍ଯ୍ୟନ୍ତ ଶସ୍ୟ ପହଞ୍ଚାଇବାରେ ଆର୍ଥିକ ଚାପର ସମ୍ମୁଖୀନ ହେଉଥିଲେ। ଏବେ ଏହି ଖର୍ଚ୍ଚରେ କେନ୍ଦ୍ର ସରକାର ସହଯୋଗ କରିବେ ବୋଲି କୁହାଯାଇଛି। ଦ୍ୱିତୀୟ ପରିବର୍ତ୍ତନ ହେଉଛି ରାସନ ଡିଲରମାନଙ୍କ କମିଶନ ବୃଦ୍ଧି।
ଦୀର୍ଘଦିନ ଧରି ରାସନ ଡିଲରମାନେ କମିଶନ ବୃଦ୍ଧି ଦାବି କରୁଥିବା ବେଳେ, କେନ୍ଦ୍ର ସରକାର ଏହାକୁ ଗ୍ରହଣ କରିଛନ୍ତି। ଏହା ଦ୍ୱାରା ରାସନ ଦୋକାନୀମାନଙ୍କ ଆୟ ବୃଦ୍ଧି ପାଇବ ଏବଂ ବ୍ୟବସ୍ଥାରେ ଆହୁରି ସୁଚାରୁ ପରିଚାଳନା ସମ୍ଭବ ହେବ ବୋଲି ସରକାର ଆଶା କରୁଛନ୍ତି।ତୃତୀୟ ଏବଂ ସବୁଠୁ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ହେଉଛି ରାସନ ବ୍ୟବସ୍ଥାରେ ନୂତନ ପ୍ରଯୁକ୍ତିର ବ୍ୟବହାର। ସରକାର ଏବେ ପିଡିଏସ୍ ହିତାଧିକାରୀଙ୍କ ପଞ୍ଜୀକରଣ ଏବଂ ତଥ୍ୟ ଯାଞ୍ଚ ପାଇଁ କୃତ୍ରିମ ବୁଦ୍ଧିମତା ଭିତ୍ତିକ ପ୍ରଣାଳୀର ବ୍ୟବହାର କରିବେ। ଏହା ଦ୍ୱାରା ଭୁଆ ରାସନ କାର୍ଡ ଓ ଅନିୟମିତତାକୁ ରୋକାଯାଇପାରିବ ବୋଲି ସରକାରଙ୍କ ମତ।କେନ୍ଦ୍ର ମନ୍ତ୍ରୀ କହିଛନ୍ତି ଯେ, ଏହି ବିଶାଳ ବଜେଟ୍ ମାଧ୍ୟମରେ ରାସନ ବଣ୍ଟନ ବ୍ୟବସ୍ଥାକୁ ଡିଜିଟାଲ୍ ଓ ଆଧୁନିକ କରାଯିବ।
ଏହା ଦ୍ୱାରା ହିତାଧିକାରୀମାନେ ସ୍ୱଚ୍ଛ ଏବଂ ସହଜ ସେବା ପାଇପାରିବେ।ସେହିପରି କେନ୍ଦ୍ର କ୍ୟାବିନେଟ ବୈଠକରେ ଦେଶରେ ଚାଲିଥିବା ଗ୍ରୀଷ୍ମ ପ୍ରବାହ ସ୍ଥିତିକୁ ନେଇ ମଧ୍ୟ ବିସ୍ତୃତ ଆଲୋଚନା ହୋଇଥିଲା। କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ବାର୍ତ୍ତା ଅନୁଯାୟୀ ପ୍ରତ୍ୟେକ ମନ୍ତ୍ରଣାଳୟ ଏବଂ ବିଭାଗ ନିଜ ନିଜ କ୍ଷେତ୍ରରେ ଗ୍ରୀଷ୍ମ ପ୍ରବାହ ମୁକାବିଲା ପାଇଁ ନେଇପାରୁଥିବା ପଦକ୍ଷେପ ଉପରେ ଚର୍ଚ୍ଚା କରିଛନ୍ତି।ସରକାରଙ୍କ ଏହି ନୂଆ ଯୋଜନା ଦେଶର କୋଟି କୋଟି ଗରିବ ଓ ନିମ୍ନବର୍ଗର ଲୋକଙ୍କ ପାଇଁ ରାସନ ବ୍ୟବସ୍ଥାକୁ ଆହୁରି ସୁଗମ ଓ ସ୍ୱଚ୍ଛ କରିବ ବୋଲି ଆଶା କରାଯାଉଛି।
