ନ୍ୟୁଜ ଡେକ୍ସ : ଭାରତୀୟ ପାଣିପାଗ ବିଭାଗ ଦେଶର ୨୧ଟି ରାଜ୍ୟ ପାଇଁ ପ୍ରବଳ ବର୍ଷା, ଝଡ଼ତୋଫାନ ଓ ବଜ୍ରପାତ ନେଇ ସତର୍କ ସୂଚନା ଜାରି କରିଛି। ଓଡ଼ିଶା, ଦିଲ୍ଲୀ, ଉତ୍ତର ପ୍ରଦେଶ, ବିହାର ଓ ରାଜସ୍ଥାନ ସମେତ ଅନେକ ରାଜ୍ୟରେ ଆଜି ପାଗରେ ବଡ଼ ପରିବର୍ତ୍ତନ ଦେଖାଦେବାର ଆଶଙ୍କା ରହିଛି। ସକ୍ରିୟ ପଶ୍ଚିମୀ ବାୟୁ ପ୍ରଭାବ ଏବଂ ମୌସୁମୀର ଅଗ୍ରଗତି ଯୋଗୁଁ ଏହି ପରିସ୍ଥିତି ସୃଷ୍ଟି ହୋଇଥିବା ଜଣାପଡ଼ିଛି।ପାଣିପାଗ ବିଭାଗର ଆକଳନ ଅନୁସାରେ ଅନେକ ସ୍ଥାନରେ ଘଣ୍ଟାପ୍ରତି ୬୦ରୁ ୮୫ କିଲୋମିଟର ବେଗରେ ପବନ ବହିପାରେ। ଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ସକାଳଠାରୁ ଆକାଶ ମେଘାଚ୍ଛନ୍ନ ରହିଛି।
ଏଠାରେ ଝଡ଼ବର୍ଷା ସହ ହାଲୁକାରୁ ମଧ୍ୟମ ବର୍ଷା ହେବାର ସମ୍ଭାବନା ଥିବାବେଳେ ତାପମାତ୍ରା ହ୍ରାସ ପାଇ ଲୋକମାନେ ଗରମରୁ ଆଶ୍ୱସ୍ତି ପାଇବେ ବୋଲି କୁହାଯାଇଛି।ଉତ୍ତର ପ୍ରଦେଶର ପଶ୍ଚିମ ଓ ପୂର୍ବ ଭାଗର ଅନେକ ଅଞ୍ଚଳ ପାଇଁ ଧୂଳିଝଡ଼ ସହ ପ୍ରବଳ ବର୍ଷା ଓ ବଜ୍ରପାତ ସତର୍କ ସୂଚନା ଜାରି କରାଯାଇଛି। ବିହାର ଆଡକୁ ମୌସୁମୀ ସୀମା ଅଗ୍ରସର ହେଉଥିବାରୁ ସେଠାରେ ମଧ୍ୟ ପାଗ ଅଧିକ ସକ୍ରିୟ ରହିବାର ଆଶା କରାଯାଉଛି।ଓଡ଼ିଶାରେ ଆଜି ଅଧିକାଂଶ ଜିଲ୍ଲାରେ ପ୍ରବଳ ବର୍ଷା, ଝଡ଼ବର୍ଷା ଓ ଜୋରଦାର ପବନ ବହିବାର ସମ୍ଭାବନା ରହିଛି। ବିଶେଷକରି ରାଜ୍ୟର ପୂର୍ବାଞ୍ଚଳରେ ଫସଲ କ୍ଷତି ହେବାର ଆଶଙ୍କା ଥିବାରୁ ଚାଷୀମାନଙ୍କୁ ସତର୍କ ରହିବାକୁ କୁହାଯାଇଛି।ରାଜସ୍ଥାନର ଅନେକ ଜିଲ୍ଲାରେ ଘଡ଼ଘଡ଼ି ସହ ପ୍ରବଳ ବର୍ଷା ହେବାର ସମ୍ଭାବନା ରହିଛି। ମରୁଭୂମି ଅଞ୍ଚଳରେ ଧୂଳିଯୁକ୍ତ ପବନ ବହିବା ଫଳରେ ଦୃଶ୍ୟମାନତା କମିପାରେ ବୋଲି ସତର୍କ କରାଯାଇଛି।ହିମାଚଳ ପ୍ରଦେଶରେ ଆଗାମୀ କିଛି ଦିନ ଧରି ହାଲୁକାରୁ ମଧ୍ୟମ ବର୍ଷା ସହ କୁଆପଥର ବର୍ଷା ଜାରି ରହିବ।
ଉଚ୍ଚ ପାହାଡ଼ିଆ ଅଞ୍ଚଳରେ ଭୂସ୍ଖଳନର ଆଶଙ୍କା ଥିବାରୁ ପର୍ଯ୍ୟଟକଙ୍କୁ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି।ସେହିପରି ଉତ୍ତରାଖଣ୍ଡର ପାହାଡ଼ିଆ ଓ ସମତଳ ଅଞ୍ଚଳରେ ଝଡ଼ତୋଫାନ ସହ ପ୍ରବଳ ବର୍ଷା ହେବାର ସମ୍ଭାବନା ରହିଛି। ପାଗରେ ହଠାତ୍ ପରିବର୍ତ୍ତନ ଏବଂ ରାସ୍ତା ଅବରୋଧ ହେବାର ଆଶଙ୍କା ରହିଥିବାରୁ ସ୍ଥାନୀୟ ପ୍ରଶାସନ ସତର୍କ ରହିଛି। ଜମ୍ମୁ-କାଶ୍ମୀର ଓ ଲଦାଖରେ ମଧ୍ୟ ବର୍ଷା ଏବଂ ପ୍ରବଳ ପବନ ବହିବାର ପୂର୍ବାନୁମାନ କରାଯାଇଛି। ପାଣିପାଗ ବିଭାଗ ଲୋକମାନଙ୍କୁ ଆବଶ୍ୟକ ନଥିଲେ ଘରୁ ବାହାରକୁ ନଯିବା ଏବଂ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି।
