ନ୍ୟୁଜ ଡେକ୍ସ : ଗବେଷଣା ଓ ବିଜ୍ଞାନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ କିଟ୍ ବିଶ୍ୱବିଦ୍ୟାଳୟ ଆଉ ଏକ ବଡ଼ ସଫଳତା ହାସଲ କରିଛି। ୨୦୨୫ ବର୍ଷ ପାଇଁ ପ୍ରକାଶିତ ବିଶ୍ୱର ଶ୍ରେଷ୍ଠ ୫ ପ୍ରତିଶତ ବୈଜ୍ଞାନିକଙ୍କ ତାଲିକାରେ କିଟ୍ର ୪୫ ଜଣ ପ୍ରାଧ୍ୟାପକ ସ୍ଥାନ ପାଇଛନ୍ତି। ଗବେଷଣା କ୍ଷେତ୍ରରେ ସେମାନଙ୍କ ଉତ୍କୃଷ୍ଟ କାର୍ଯ୍ୟ, ପ୍ରକାଶନ ଏବଂ ବୈଜ୍ଞାନିକ ପ୍ରଭାବକୁ ଆଧାର କରି ଏହି ସମ୍ମାନଜନକ ମାନ୍ୟତା ମିଳିଛି।ଏହି ତାଲିକା ଏକ ସ୍ୱାଧୀନ ଏବଂ ସ୍ୱଚ୍ଛ ବିଶ୍ୱସ୍ତରୀୟ ମୂଲ୍ୟାଙ୍କନ ବ୍ୟବସ୍ଥା ଦ୍ୱାରା ପ୍ରସ୍ତୁତ କରାଯାଇଛି। ଯୋଗ୍ୟତା ଓ ଗବେଷଣା ଅବଦାନକୁ ଆଧାର କରି ବୈଜ୍ଞାନିକମାନଙ୍କ ମୂଲ୍ୟାଙ୍କନ କରାଯାଇଥାଏ।
ଚଳିତ ବର୍ଷର ସୂଚକାଙ୍କରେ ବିଶ୍ୱବ୍ୟାପୀ ୧ କୋଟିରୁ ଅଧିକ ସକ୍ରିୟ ଗବେଷକ ଏବଂ ପ୍ରାୟ ୫ କୋଟି ଗବେଷଣା କାର୍ଯ୍ୟର ବିଶ୍ଳେଷଣ କରାଯାଇଥିଲା।ଶୀର୍ଷ ୫ ପ୍ରତିଶତରେ ସ୍ଥାନ ପାଇଥିବା ବୈଜ୍ଞାନିକମାନଙ୍କୁ ବିଶ୍ୱର ଅନ୍ୟ ଗବେଷକମାନଙ୍କ ତୁଳନାରେ ଅଧିକ ଉତ୍ପାଦନକ୍ଷମ ଏବଂ ପ୍ରଭାବଶାଳୀ ବୋଲି ଗଣାଯାଏ। ଏହି ସଫଳତା କିଟ୍ର ଗବେଷଣାମୁଖୀ ପରିବେଶ, ଉଚ୍ଚମାନର ପ୍ରକାଶନ, ନବସୃଜନ ଏବଂ ବିଭିନ୍ନ ବିଷୟ ମଧ୍ୟରେ ସହଯୋଗକୁ ପ୍ରତିଫଳିତ କରିଛି। ଗବେଷକମାନଙ୍କ ଚୟନ ପାଇଁ ପ୍ରକାଶନ, ଉଦ୍ଧୃତି ଏବଂ ଅନ୍ୟାନ୍ୟ ବୈଜ୍ଞାନିକ ସୂଚକ ଆଧାରରେ ଏକ ସମନ୍ୱିତ ମୂଲ୍ୟାଙ୍କନ ପଦ୍ଧତି ବ୍ୟବହାର କରାଯାଇଛି। ବିଶ୍ୱର ବିଭିନ୍ନ ଶିକ୍ଷାଗତ ବିଷୟକୁ ଏହି ମୂଲ୍ୟାଙ୍କନରେ ସାମିଲ କରାଯାଇଥିବାବେଳେ ମୁକ୍ତ ଗବେଷଣା ତଥ୍ୟଭଣ୍ଡାରର ସୂଚନା ଆଧାରରେ ସ୍ୱଚ୍ଛତା ଓ ନିରପେକ୍ଷତା ସୁନିଶ୍ଚିତ କରାଯାଇଛି।ଏହି ସଫଳତା ପାଇଁ କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ ସନ୍ତୋଷ ବ୍ୟକ୍ତ କରିଛନ୍ତି।
ସେ କହିଛନ୍ତି ଯେ, ଏହି ସମ୍ମାନଜନକ ବିଶ୍ୱ ତାଲିକାରେ କିଟ୍ର ପ୍ରାଧ୍ୟାପକମାନଙ୍କ ସ୍ଥାନ ପ୍ରତିଷ୍ଠାନର ଅନ୍ତର୍ଜାତୀୟ ଶୈକ୍ଷିକ ପରିଚୟକୁ ଆହୁରି ସୁଦୃଢ଼ କରିବ। ଏହା ସହ ଗବେଷଣା ସହଯୋଗ, ନବସୃଜନ ଓ ଛାତ୍ରଛାତ୍ରୀଙ୍କ ପରାମର୍ଶ କ୍ଷେତ୍ରରେ ନୂଆ ସୁଯୋଗ ସୃଷ୍ଟି ହେବ।ଗବେଷଣା ଆଧାରିତ ଶିକ୍ଷା, ସାମାଜିକ ପ୍ରଭାବ ଏବଂ ବିଶ୍ୱସ୍ତରୀୟ ଶୈକ୍ଷିକ ମାନଦଣ୍ଡକୁ ପ୍ରାଧାନ୍ୟ ଦେଇ ଆସୁଥିବା କିଟ୍ ବର୍ଷ ବର୍ଷ ଧରି ଅନେକ ଅନ୍ତର୍ଜାତୀୟ ସମ୍ମାନ ହାସଲ କରିଆସିଛି। ୪୫ ଜଣ ପ୍ରାଧ୍ୟାପକଙ୍କ ଏହି ସଫଳତା କିଟ୍ର ଗବେଷଣା କ୍ଷେତ୍ରରେ ବଢ଼ୁଥିବା ବିଶ୍ୱସ୍ତରୀୟ ସ୍ୱୀକୃତିକୁ ପୁଣିଥରେ ପ୍ରମାଣିତ କରିଛି।
