ନ୍ୟୁଜ ଡେକ୍ସ : ଯୁଗ୍ମ ପ୍ରବେଶିକା ପରୀକ୍ଷା (ଜେଇଇ) ମେନ୍ ୨୦୨୬ ପାଇଁ ଅନଲାଇନ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ନ୍ୟାସନାଲ୍ ଟେଷ୍ଟିଂ ଏଜେନ୍ସି (ଏନ୍ଟିଏ) ପକ୍ଷରୁ ଜାରି ହୋଇଥିବା ବିଜ୍ଞପ୍ତି ଅନୁଯାୟୀ, ଆଗାମୀ ନଭେମ୍ବର ୨୭ ତାରିଖ ରାତି ୯ଟା ପର୍ଯ୍ୟନ୍ତ ଆବେଦନ କରିପାରିବେ ପରୀକ୍ଷାର୍ଥୀମାନେ। ଏହା ସହିତ ରାତି ୧୧ଟା ୫୦ ମିନିଟ୍ ମଧ୍ୟରେ ଅନଲାଇନ ଫି ଦାଖଲ କରିବା ସୁବିଧା ରହିଛି।
ଏନ୍ଟିଏ ଅଧିକାରିକ ସୂଚନା ଅନୁଯାୟୀ, ପରୀକ୍ଷା ସେଣ୍ଟର ସମ୍ବନ୍ଧୀୟ ସହର ନାମ ଜାନୁଆରୀ ପ୍ରଥମ ସପ୍ତାହରେ ଘୋଷଣା କରାଯିବ। ପ୍ରଥମ ସେସନ୍ ପରୀକ୍ଷା ଜାନୁଆରୀ ୨୧ରୁ ୩୦ ମଧ୍ୟରେ ହେବାକୁ ଥିବାବେଳେ ଫଳ ଫେବ୍ରୁଆରୀ ୧୨ ତାରିଖ ସୁଦ୍ଧା ପ୍ରକାଶ ହେବ।ଜେଇଇ ମେନ୍ ପରୀକ୍ଷା ୨ଟି ସେସନରେ ହେବ — ପ୍ରଥମଟି ଜାନୁଆରୀ ଓ ଦ୍ୱିତୀୟଟି ଏପ୍ରିଲ୍ ମାସରେ। ଏହି ଦୁଇଟି ସେସନ୍ ଦୁଇଟି କମ୍ପ୍ୟୁଟର ବେସଡ୍ ଟେଷ୍ଟ (CBT) ମୋଡ୍ରେ କରାଯିବ।
ପରୀକ୍ଷାରେ ଦୁଇଟି ପେପର ରହିବ — ପେପର-୧ ବିଇ/ବିଟେକ୍ ପାଠ୍ୟକ୍ରମ ପାଇଁ ଏବଂ ପେପର-୨ ଆର୍କିଟେକ୍ଚର ଓ ପ୍ଲାନିଂ ପାଠ୍ୟକ୍ରମ ପାଇଁ। ଏହି ପରୀକ୍ଷା ମାଧ୍ୟମରେ ପରୀକ୍ଷାର୍ଥୀମାନେ ଦେଶର ଶ୍ରେଷ୍ଠ ଇଞ୍ଜିନିୟରିଂ ସଂସ୍ଥାନ — ଯେପରିକି ଏନଆଇଟି, ଆଇଆଇଟି ଓ ଅନ୍ୟ କେନ୍ଦ୍ରୀୟ ଅନୁଦାନପ୍ରାପ୍ତ ଟେକ୍ନିକାଲ୍ ଇନଷ୍ଟିଟ୍ୟୁଟ୍, ବିଶ୍ୱବିଦ୍ୟାଳୟ ଓ ରାଜ୍ୟ ସରକାରଙ୍କ ବୈଷୟିକ ପ୍ରତିଷ୍ଠାନରେ ନାମ ଲେଖାଇବାର ସୁଯୋଗ ପାଇପାରିବେ।
