ନ୍ୟୁଜ ଡେକ୍ସ : ଉପନିର୍ବାଚନ ପ୍ରଚାର ତୀବ୍ର ହେଉଥିବା ବେଳେ ଶୁକ୍ରବାର ଦିନ ବିଜେଡି ସୁପ୍ରିମୋ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆପଡ଼ାରେ ରୋଡ୍ ଶୋ’ କରିଛନ୍ତି। ଦଳୀୟ ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କ ପକ୍ଷରେ ମୁଖ୍ୟମନ୍ତ୍ରୀଙ୍କ ଏହି ପ୍ରଚାର ଅଭିଯାନରେ ଜନସମୁଦ୍ର ଉପସ୍ଥିତି ଦେଖିବାକୁ ମିଳିଛି।ନବୀନ ପଟ୍ଟନାୟକ ଏକ ବିଶେଷ ଶୋଭିତ ବସ୍ରେ ବସି ଖରିଆ ରୋଡ୍ ଓ ନୂଆପଡ଼ା ବ୍ଲକ୍ ଅଞ୍ଚଳରେ ରୋଡ୍ ଶୋ’ କରିଛନ୍ତି।
ରାସ୍ତା ଦୁଇପାର୍ଶ୍ୱରେ ହଜାର ହଜାର ଲୋକ ତାଙ୍କୁ ଦେଖିବାକୁ ଜମାହୋଇଥିଲେ। ନୂଆପଡ଼ା ମାଠରୁ ଆରମ୍ଭ ହୋଇଥିବା ଏହି ରୋଡ୍ ଶୋ’ ସମୟରେ “ନବୀନ ବାବୁ ଜିନ୍ଦାବାଦ” ଓ “ଜୟ ଜଗନ୍ନାଥ” ନାଦରେ ସାରା ଅଞ୍ଚଳ ମୁହଁରିଥିଲା।ନବୀନଙ୍କ ସହ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ, ଏବଂ ଅନ୍ୟ ବରିଷ୍ଠ ନେତାମାନେ ମଧ୍ୟ ରୋଡ୍ ଶୋ’ରେ ସାମିଲ ହୋଇଥିଲେ। ମୁଖ୍ୟମନ୍ତ୍ରୀ ଜନତାଙ୍କୁ ହାତ ହଲାଇ ଅଭିବାଦନ ଜଣାଇଥିଲେ ଏବଂ ନୂଆପଡ଼ାର ଉନ୍ନତି ପାଇଁ ବିଜେଡିକୁ ଭୋଟ୍ ଦେବାକୁ ଆହ୍ୱାନ କରିଥିଲେ। ଏପରି ସମୟରେ ନୂଆପଡ଼ା ଉପନିର୍ବାଚନ ଆସନ୍ତା ନଭେମ୍ବର ୧୧ ତାରିଖରେ ଅନୁଷ୍ଠିତ ହେବାକୁ ଯାଉଛି ଏବଂ ଫଳାଫଳ ନଭେମ୍ବର ୧୪ ତାରିଖରେ ଘୋଷିତ ହେବ।
ଦିବଂଗତ ବିଜେଡି ବିଧାୟକ ରାଜେନ୍ଦ୍ର ଢୋଲକିଆଙ୍କ ଦେହାନ୍ତ ପରେ ଏହି ଉପନିର୍ବାଚନ ହେଉଛି।ଏଥିରେ ବିଜେଡି ପକ୍ଷରୁ ସ୍ନେହାଙ୍ଗିନୀ ଛୁରିଆ, ବିଜେପି ପକ୍ଷରୁ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ, ଓ କଂଗ୍ରେସ ପକ୍ଷରୁ ଘାସିରାମ ମାଝୀ ପ୍ରାର୍ଥୀ ହୋଇ ମୈଦାନରେ ଓହ୍ଲାଇଛନ୍ତି।ନୂଆପଡ଼ାରେ ଏହି ଉପନିର୍ବାଚନ ହେବାକୁ ଯାଉଥିବା ବେଳେ ନବୀନଙ୍କ ରୋଡ୍ ଶୋ’ ବିଜେଡି ଶିବିରକୁ ନୂତନ ଉତ୍ସାହ ଦେଇଛି ଏବଂ ଏହା ଉପନିର୍ବାଚନ ଯୁଦ୍ଧକୁ ଆଉ ରୋମାଞ୍ଚକ କରିଦେଇଛି।
