ନ୍ୟୁଜ ଡେକ୍ସ : ନୂଆପଡ଼ା ବିଧାନସଭା ଉପନିର୍ବାଚନରେ ମତଦାନ ପ୍ରତିଶତ ଏବେ ବହୁତ ଉତ୍ସାହଜନକ ହୋଇଛି। ମୋଟ ୮୧.୬୩ ପ୍ରତିଶତ ଭୋଟର ନିଜ ମତ ଅଧିକାର ପ୍ରୟୋଗ କରିଛନ୍ତି। ଏହି ଉପନିର୍ବାଚନ ଗତ ମଙ୍ଗଳବାର ଦିନ ଶାନ୍ତିପୂର୍ଣ୍ଣ ଭାବରେ ସମାପ୍ତ ହୋଇଥିଲା।ସବୁଠୁ ଆକର୍ଷଣୀୟ ଦିଗ ହେଲା, ଚଳିତ ବର୍ଷ ସୁନାବେଡା ବନ୍ୟପ୍ରାଣୀ ଅଭୟାରଣ୍ୟ ଭିତରେ ଥିବା ବୁଥଗୁଡ଼ିକରେ ଅପେକ୍ଷାକୃତ ଅଧିକ ମତଦାନ ହୋଇଛି।
ସେଠାରେ ଥିବା ୮ଟି ବୁଥରେ ପ୍ରାୟ ୭୦ ପ୍ରତିଶତ ଭୋଟର ନିଜ ମତ ଦେଇଛନ୍ତି। ଏହି ବୁଥଗୁଡ଼ିକ ମଧ୍ୟରୁ ଗତିବେଡା, ସୁନାବେଡା, ସୋସେଙ୍ଗ, ଦେଓସିଲ ଓ ଜାମଗାଁ ଅଞ୍ଚଳରେ ଥିଲା।କେନ୍ଦ୍ରୀୟ ସଶସ୍ତ୍ର ବାହିନୀର ଉପସ୍ଥିତିରେ ମତଦାନ ସୁରକ୍ଷାବଳୟ ମଧ୍ୟରେ ହୋଇଥିଲା। ପ୍ରାୟ ୪୦୦୦ ଭୋଟର ନିଜର ମତଦାନ କରିଥିବା ନେଇ ଅଧିକାରୀମାନେ ସୂଚନା ଦେଇଛନ୍ତି। ଅପରାହ୍ନ ୪ଟାରେ ମତଦାନ ଶେଷ ହେବା ପରେ ସମସ୍ତ ୮ଟି ମତଦାନ ଦଳକୁ ଆଇଏଏଫ୍ ହେଲିକପ୍ଟର ମାଧ୍ୟମରେ ନିରାପଦ ଭାବେ ଫେରାଇ ଆଣାଯାଇଥିଲା। ଉଚ୍ଚ ଭୂମି ଏବଂ ଅସୁବିଧାପୂର୍ଣ୍ଣ ଭୌଗୋଳିକ ପରିସ୍ଥିତି ଦୃଷ୍ଟିରେ ମୋଟ ୪୮ ଜଣ କର୍ମଚାରୀ ଓ ଅଧିକାରୀଙ୍କୁ ଆକାଶ ମାର୍ଗରେ ଯାଏ ନେଇଯାଇଥିଲା।
ମତଦାନ ପ୍ରତିଶତ ଏତେ ଉଚ୍ଚ ହେବାରୁ ଏହି ବର୍ଷ ଉପନିର୍ବାଚନ ରେକର୍ଡ ସୃଷ୍ଟି କରିଛି ବୋଲି ମନେ କରାଯାଉଛି। ମୁଖ୍ୟ ନିର୍ବାଚନ ଅଧିକାରୀ କାର୍ଯ୍ୟାଳୟ ଅନୁସାରେ ଗଣନା ପରେ ଏହି ଅଙ୍କ ଆହୁରି ବଢ଼ିପାରେ।ସିଇଓ ଆର୍ ଏସ୍ ଗୋପାଳନ ଜଣାଇଛନ୍ତି ଯେ, ସମ୍ବେଦନଶୀଳ ଏବଂ ସଖୀ ବୁଥ୍ ସମେତ ମୋଟ ୩୫୮ ମତଦାନ କେନ୍ଦ୍ରରେ ମତଦାନ ଶାନ୍ତିପୂର୍ଣ୍ଣ ଭାବରେ ସମାପ୍ତ ହୋଇଛି। ତେବେ, ଦୁଇଟି ବୁଥରେ ଭୋଟ ଗୋପନୀୟତା ଉଲ୍ଲଂଘନ ହୋଇଥିବା ନେଇ ଦୁଇଜଣ ପ୍ରିଜାଇଡିଂ ଅଧିକାରୀ ଧନଞ୍ଜୟ ମଲ୍ଲିକ ଏବଂ ସନ୍ଦୀପ କୁମାର ସ୍ୱାଇଁଙ୍କୁ ନିଲମ୍ବନ କରାଯାଇଛି।
ରାଜ୍ୟ ମୁଖ୍ୟାଳୟରୁ ମତଦାନ ପ୍ରକ୍ରିୟା ଉପରେ ନିରନ୍ତର ତଦାରଖ ରହିଥିଲା ଯାହା ଫଳରେ ସମସ୍ତେ ନିରାପଦ ଓ ନିରପେକ୍ଷ ଭାବରେ ମତ ଦେଇପାରିଥିଲେ।ସକାଳ ୭ଟାରୁ ମତଦାନ ଆରମ୍ଭ ହୋଇ ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିଥିଲା, ଯେଉଁଥିରେ ୪୭ଟି ସମ୍ବେଦନଶୀଳ ବୁଥରେ ଭୋଟିଂ ଗୋଟିଏ ଘଣ୍ଟା ପୂର୍ବରୁ ଶେଷ ହୋଇଥିଲା।
