ନ୍ୟୁଜ ଡେକ୍ସ : ଅଯୋଧ୍ୟାସ୍ଥିତ ଶ୍ରୀରାମ ଜନ୍ମଭୂମି ମନ୍ଦିରକୁ ଦାନ କରାଯାଇଥିବା ୧୫୧ କିଲୋଗ୍ରାମ ସୁନା ଖଚିତ ରାମଚରିତମାନସକୁ ନେଇ ଏକ ନୂଆ ବିବାଦ ସାମ୍ନାକୁ ଆସିଛି। ଏହି ମୂଲ୍ୟବାନ ଗ୍ରନ୍ଥ ଦାନ କରିଥିବା ପୂର୍ବତନ ଗୃହ ସଚିବ ଏସ୍. ଲକ୍ଷ୍ମୀନାରାୟଣନ ଦାବି କରିଛନ୍ତି ଯେ ଦାନ କରିବା ପରେ ତାଙ୍କୁ ଏହାର କୌଣସି ରସିଦ କିମ୍ବା ସରକାରୀ ସ୍ୱୀକୃତି ପ୍ରଦାନ କରାଯାଇନଥିଲା। ସେ ଆହୁରି କହିଛନ୍ତି ଯେ ବର୍ତ୍ତମାନ ସୁନା ଖଚିତ ରାମଚରିତମାନସ କେଉଁଠି ରହିଛି ସେ ସମ୍ପର୍କରେ ମଧ୍ୟ ତାଙ୍କୁ କୌଣସି ସୂଚନା ନାହିଁ।
ଏହି ଦାବି ପରେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପକ୍ଷରୁ ତୁରନ୍ତ ସ୍ପଷ୍ଟୀକରଣ ଦିଆଯାଇଛି। ଟ୍ରଷ୍ଟ କହିଛି ଯେ ପ୍ରାୟ ଦୁଇ ବର୍ଷ ପୂର୍ବରୁ ଅବସରପ୍ରାପ୍ତ ଆଇଏଏସ୍ ଅଧିକାରୀ ଏସ୍. ଲକ୍ଷ୍ମୀନାରାୟଣନଙ୍କ ଦ୍ୱାରା ଦାନ କରାଯାଇଥିବା ସୁନା ଖଚିତ ରାମଚରିତମାନସ ସମ୍ପୂର୍ଣ୍ଣ ସୁରକ୍ଷିତ ରହିଛି ଏବଂ ଏହାକୁ ନେଇ କୌଣସି ପ୍ରକାରର ଆଶଙ୍କା କରିବାର ଆବଶ୍ୟକତା ନାହିଁ।ସୂଚନା ଅନୁଯାୟୀ, ପୂର୍ବତନ ଆଇଏଏସ୍ ଅଧିକାରୀ ଶନିବାର ଏକ ସାମାଜିକ ଗଣମାଧ୍ୟମ ସାକ୍ଷାତକାରରେ କହିଥିଲେ ଯେ ପ୍ରାୟ ୫ କୋଟି ଟଙ୍କା ବ୍ୟୟରେ ନିର୍ମିତ ସୁନା ଖଚିତ ରାମାୟଣକୁ ସେ ରାମ ମନ୍ଦିର ଟ୍ରଷ୍ଟକୁ ଦାନ କରିଥିଲେ। କିନ୍ତୁ ଏହା ପରେ ସେହି ଗ୍ରନ୍ଥ ସମ୍ପର୍କରେ କୌଣସି ସୂଚନା ମିଳୁନଥିବାରୁ ସେ ଉଦ୍ବେଗ ପ୍ରକାଶ କରିଥିଲେ।ଏହାର ଜବାବରେ ରାମ ମନ୍ଦିର ନିର୍ମାଣ ସହାୟକ ଗୋପାଳ ରାଓ କହିଛନ୍ତି ଯେ ଦାତାଙ୍କ ଇଚ୍ଛା ଅନୁଯାୟୀ ପ୍ରଥମେ ସୁନା ଖଚିତ ରାମଚରିତମାନସକୁ ଶ୍ରୀରାମ ଲଲ୍ଲାଙ୍କ ଗର୍ଭଗୃହ ସମ୍ମୁଖରେ ସମ୍ମାନର ସହ ପ୍ରଦର୍ଶନ କରାଯାଇଥିଲା। ପରେ ମନ୍ଦିରର ନିର୍ଦ୍ଧାରିତ ବ୍ୟବସ୍ଥା ଅନୁଯାୟୀ ଏହାକୁ ଗୁହା ମଣ୍ଡପରେ ଥିବା ଅଳଙ୍କାର ଆଲମାରୀରେ ସୁରକ୍ଷିତ ଭାବେ ସଂରକ୍ଷଣ କରାଯାଇଛି।
ଦାନ ସମୟରେ ଏହାର ବିବରଣୀ ମନ୍ଦିରର ଦାନ ରେଜିଷ୍ଟରରେ ମଧ୍ୟ ଲିପିବଦ୍ଧ କରାଯାଇଥିବା ଟ୍ରଷ୍ଟ ପକ୍ଷରୁ କୁହାଯାଇଛି।ଟ୍ରଷ୍ଟ ଆହୁରି ସ୍ପଷ୍ଟ କରିଛି ଯେ ଏସ୍. ଲକ୍ଷ୍ମୀନାରାୟଣନ ଯେକୌଣସି ସମୟରେ ମନ୍ଦିର ପରିଦର୍ଶନ କରି ନିଜ ଦାନ କରିଥିବା ଗ୍ରନ୍ଥକୁ ଦେଖିପାରିବେ। ରାମଚରିତମାନସ ସମ୍ପୂର୍ଣ୍ଣ ସୁରକ୍ଷିତ ଥିବାରୁ ଏହାକୁ ନେଇ କୌଣସି ପ୍ରକାରର ଭୁଲ ବୁଝାମଣା ସୃଷ୍ଟି ନକରିବାକୁ ଟ୍ରଷ୍ଟ ଅନୁରୋଧ କରିଛି। ଅନ୍ୟପଟେ, ଏସ୍. ଲକ୍ଷ୍ମୀନାରାୟଣନ କହିଛନ୍ତି ଯେ ସେ ୮ ଏପ୍ରିଲ ୨୦୨୪ରେ ଏହି ସୁନା ଖଚିତ ରାମଚରିତମାନସକୁ ମନ୍ଦିର ଟ୍ରଷ୍ଟକୁ ଦାନ କରିଥିଲେ। ଏହି ଗ୍ରନ୍ଥ ପ୍ରସ୍ତୁତ କରିବା ପାଇଁ ସେ ତାଙ୍କ ମାଆ ଓ ପତ୍ନୀଙ୍କ ଅଳଙ୍କାରକୁ ତରଳାଇ ସୁନା ବ୍ୟବହାର କରିଥିବା ଦାବି କରିଛନ୍ତି।
ସେ ଆହୁରି କହିଛନ୍ତି ଯେ ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟଙ୍କ ସହ ତାଙ୍କର ଏହି ପ୍ରସଙ୍ଗରେ ଆଲୋଚନା ହୋଇଥିଲା। ସେହି ସମୟରେ ତାଙ୍କୁ କୁହାଯାଇଥିଲା ଯେ ମନ୍ଦିରରେ କେଉଁ ବସ୍ତୁ କିପରି ରଖାଯିବ, ସେଥିର ନିଷ୍ପତ୍ତି ଟ୍ରଷ୍ଟ ନେବ।ଲକ୍ଷ୍ମୀନାରାୟଣନ କହିଛନ୍ତି ଯେ ଶ୍ରୀରାମ ମନ୍ଦିର କୌଣସି ବ୍ୟକ୍ତି ବିଶେଷଙ୍କ ସମ୍ପତ୍ତି ନୁହେଁ, ବରଂ ଏହା କୋଟି କୋଟି ଭକ୍ତଙ୍କ ଆସ୍ଥା ଓ ବିଶ୍ୱାସର କେନ୍ଦ୍ର। ପ୍ରାୟ ପାଞ୍ଚ ଶତାବ୍ଦୀର ସଂଘର୍ଷ ପରେ ନିର୍ମିତ ଏହି ପବିତ୍ର ମନ୍ଦିରରେ ସ୍ୱଚ୍ଛତା ଓ ଜବାବଦେହିତା ବଜାୟ ରହିବା ଉଚିତ ବୋଲି ସେ ମତ ପ୍ରକାଶ କରିଛନ୍ତି। ବର୍ତ୍ତମାନ ଏହି ପ୍ରସଙ୍ଗକୁ ନେଇ ବିଭିନ୍ନ ମହଲରେ ଆଲୋଚନା ଜାରି ରହିଛି।
