ନ୍ୟୁଜ ଡେକ୍ସ : ଆମେରିକା ଓ ଇରାନ ମଧ୍ୟରେ ଦୀର୍ଘଦିନ ଧରି ଚାଲିଥିବା ତିକ୍ତତାର ଅନ୍ତ ଘଟାଇବା ଲକ୍ଷ୍ୟରେ ଏକ ଐତିହାସିକ ଶାନ୍ତି ଚୁକ୍ତି ସ୍ୱାକ୍ଷରିତ ହୋଇଛି। ଫ୍ରାନ୍ସରେ ଆୟୋଜିତ ସାତ ଶିଳ୍ପୋନ୍ନତ ଦେଶର ଶିଖର ସମ୍ମିଳନୀ ଅବସରରେ ଭର୍ସେଲ୍ସ ପ୍ରାସାଦରେ ଏହି ଚୁକ୍ତିର ଚୂଡ଼ାନ୍ତ ରୂପ ଦିଆଯାଇଥିଲା। ଇରାନର ବୈଦେଶିକ ମନ୍ତ୍ରଣାଳୟ ମଧ୍ୟ ଡିଜିଟାଲ ସ୍ୱାକ୍ଷରକୁ ସ୍ପଷ୍ଟ କରି ଚୁକ୍ତି କାର୍ଯ୍ୟକାରୀ ହୋଇଥିବା ଘୋଷଣା କରିଛି।ଚୁକ୍ତି ସ୍ୱାକ୍ଷର ପରେ ଦୁଇ ଦେଶ ମଧ୍ୟରେ ଚାଲିଥିବା ଶତ୍ରୁତାର ଅବସାନ ଘଟିବା ସହ ବାଣିଜ୍ୟିକ ଜାହାଜ ଚଳାଚଳ ପାଇଁ ଗୁରୁତ୍ୱପୂର୍ଣ୍ଣ ହରମୁଜ୍ ପ୍ରଣାଳୀ ପୁନର୍ବାର ଖୋଲାଯିବ ବୋଲି ଜଣାପଡ଼ିଛି।
ଏହାକୁ ନେଇ ଆମେରିକା ପ୍ରଶାସନ ପକ୍ଷରୁ ମଧ୍ୟ ସୂଚନା ଦିଆଯାଇଛି।ଫ୍ରାନ୍ସ ରାଷ୍ଟ୍ରପତିଙ୍କ ଦ୍ୱାରା ପ୍ରକାଶିତ ଏକ ଭିଡିଓ ବାର୍ତ୍ତାରେ ଆମେରିକାର ରାଷ୍ଟ୍ରପତି କହିଛନ୍ତି ଯେ ଏହି ଚୁକ୍ତି ସ୍ୱାକ୍ଷର କରିବା ସହଜ ନଥିଲା, କିନ୍ତୁ ଦୁଇ ଦେଶ ଶାନ୍ତିର ପଥ ବାଛିଛନ୍ତି। ଅନ୍ୟପଟେ ଇରାନ କହିଛି ଯେ ଚୁକ୍ତିରେ ରବିବାର ଦୁଇ ପକ୍ଷ ମଧ୍ୟରେ ହୋଇଥିବା ମୌଳିକ ସହମତିକୁ ଅନ୍ତର୍ଭୁକ୍ତ କରାଯାଇଛି। ଏହି ଚୁକ୍ତିର ପ୍ରଭାବ ବିଶ୍ୱ ତୈଳ ବଜାରରେ ତୁରନ୍ତ ଦେଖିବାକୁ ମିଳିଛି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ଏକ ପ୍ରତିଶତରୁ ଅଧିକ ହ୍ରାସ ପାଇଛି। ବିଶ୍ୱ ବଜାରରେ ତୈଳ ମୂଲ୍ୟ କମିବା ପରେ ଆଗାମୀ ଦିନରେ ପେଟ୍ରୋଲ ଓ ଡିଜେଲ ଦର ମଧ୍ୟ ହ୍ରାସ ପାଇପାରେ ବୋଲି ଆଶା ପ୍ରକାଶ ପାଇଛି।
ବିଶେଷଜ୍ଞମାନଙ୍କ ମତରେ, ହରମୁଜ୍ ପ୍ରଣାଳୀରେ ସାଧାରଣ ଜାହାଜ ଚଳାଚଳ ପୁନଃ ଆରମ୍ଭ ହେଲେ ବିଶ୍ୱ ତୈଳ ଯୋଗାଣ ବ୍ୟବସ୍ଥା ସୁଦୃଢ଼ ହେବ। ଏହା ଫଳରେ ଶକ୍ତି ବଜାରରେ ସ୍ଥିରତା ଆସିବା ସହ ବିଭିନ୍ନ ଦେଶରେ ଇନ୍ଧନ ମୂଲ୍ୟ ଉପରେ ଚାପ କମିପାରେ।ଉଲ୍ଲେଖଯୋଗ୍ୟ, ଚଳିତ ବର୍ଷ ଆରମ୍ଭରେ ଇରାନର ପରମାଣୁ କାର୍ଯ୍ୟକ୍ରମକୁ କେନ୍ଦ୍ର କରି ଆମେରିକା, ଇସ୍ରାଏଲ ଓ ଇରାନ ମଧ୍ୟରେ ତିକ୍ତତା ବଢ଼ିଥିଲା। ପରେ ହରମୁଜ୍ ପ୍ରଣାଳୀରେ ଚଳାଚଳ ନେଇ ସୃଷ୍ଟି ହୋଇଥିବା ଅନିଶ୍ଚିତତା ବିଶ୍ୱ ତୈଳ ବଜାରକୁ ପ୍ରଭାବିତ କରିଥିଲା। ବର୍ତ୍ତମାନର ଶାନ୍ତି ଚୁକ୍ତିକୁ ଆନ୍ତର୍ଜାତୀୟ ସ୍ତରରେ ଏକ ବଡ଼ କୂଟନୈତିକ ସଫଳତା ଭାବେ ଦେଖାଯାଉଛି।
