ନ୍ୟୁଜ ଡେକ୍ସ : ଇସଲାମାବାଦରେ ଇରାନ ଏବଂ ଆମେରିକା ମଧ୍ୟରେ ହୋଇଥିବା ଗୁରୁତ୍ୱପୂର୍ଣ୍ଣ ଆଲୋଚନା ବିଫଳ ହେବା ପରେ ଇରାନର ବୈଦେଶିକ ମନ୍ତ୍ରୀ ସୈଦ ଆବାସ ଅରାଘଚିଙ୍କ ପ୍ରତିକ୍ରିୟା ସାମ୍ନାକୁ ଆସିଛି। ସେ କହିଛନ୍ତି ଯେ, ଦୁଇ ପକ୍ଷ ମଧ୍ୟରେ ଏକ ଚୁକ୍ତି ପ୍ରାୟ ସାରିଯାଇଥିଲା ଏବଂ ଏହା କେବଳ “ଇଞ୍ଚ ଦୂରରେ” ଥିଲା, କିନ୍ତୁ ଶେଷ ମୁହୂର୍ତ୍ତରେ ଆମେରିକାର କିଛି ବିବାଦୀୟ ମନୋଭାବ ଯୋଗୁଁ ଆଲୋଚନା ବନ୍ଦ ହୋଇଯାଇଛି।
ଅରାଘଚି ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ କରି କହିଛନ୍ତି ଯେ, ଯୁଦ୍ଧ ସମାପ୍ତ କରିବା ଉଦ୍ଦେଶ୍ୟରେ ଇରାନ ସଦ୍ଭାବନା ସହିତ ଏହି ଆଲୋଚନାରେ ଯୋଗଦେଇଥିଲା। କିନ୍ତୁ ଆମେରିକା ପକ୍ଷରୁ ଅତ୍ୟଧିକ ଦାବି, ପରିବର୍ତ୍ତନଶୀଳ ଲକ୍ଷ୍ୟ ଓ ବିଭିନ୍ନ ବାଧା ଯୋଗୁଁ ଏକ ସମ୍ମତିରେ ପହଞ୍ଚିବା ସମ୍ଭବ ହୋଇନଥିଲା।ଇରାନ ଓ ଆମେରିକା ମଧ୍ୟରେ ଏହି ଆଲୋଚନା ପଶ୍ଚିମ ଏସିଆରେ ଚାଲିଥିବା ଯୁଦ୍ଧର ସମାଧାନ ଖୋଜିବା ପାଇଁ ଆୟୋଜିତ ହୋଇଥିଲା।
ଦୁଇ ପକ୍ଷ ମୁହାଁମୁହିଁ ବସିଥିଲେ ମଧ୍ୟ, ଶେଷରେ କୌଣସି ସ୍ପଷ୍ଟ ଫଳାଫଳ ମିଳିନଥିଲା। ଅରାଘଚି ଆହୁରି କହିଛନ୍ତି ଯେ, ପ୍ରାୟ ୪୭ ବର୍ଷ ମଧ୍ୟରେ ଏହା ଦୁଇ ଦେଶ ମଧ୍ୟରେ ସର୍ବୋଚ୍ଚ ସ୍ତରର ଆଲୋଚନା ଥିଲା ଏବଂ ଇରାନ ସଦ୍ଭାବନା ସହିତ ଏହାରେ ଅଂଶଗ୍ରହଣ କରିଥିଲା। ତଥାପି ଆମେରିକାର ମନୋଭାବ ଯୋଗୁଁ ଏହି ଚର୍ଚ୍ଚା ଅଧାରେ ଅଟକି ରହିଗଲା।ଆଲୋଚନା ବନ୍ଦ ହେବା ପରେ ଏହି ପ୍ରକାରର ମନ୍ତବ୍ୟ ଆସିବାରୁ ପଶ୍ଚିମ ଏସିଆର ପରିସ୍ଥିତି ଆହୁରି ଜଟିଳ ହେବାର ସମ୍ଭାବନା ଦେଖାଦେଉଛି।
