ନ୍ୟୁଜ ଡେକ୍ସ : ନ୍ୟୁଜିଲାଣ୍ଡର ଅକ୍ଲାଣ୍ଡରେ ଆସନ୍ତା ଜୁନ୍ ୧୫ରୁ ୨୧ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ଏଫ୍ଆଇଏଚ୍ ହକି ନେସନ୍ସ କପ୍ରେ ଭାରତୀୟ ମହିଳା ହକି ଦଳ ଅଂଶଗ୍ରହଣ କରିବ। ପ୍ରୋ ଲିଗ୍ରେ ନୈରାଶ୍ୟଜନକ ପ୍ରଦର୍ଶନ ପରେ ଏହି ପ୍ରତିଯୋଗିତାରେ ଭାରତର ସ୍ଥାନ ନିଶ୍ଚିତ ହୋଇଛି।୨୦୨୪-୨୫ ହକି ପ୍ରୋ ଲିଗ୍ରେ ଭାରତୀୟ ମହିଳା ଦଳ ଶେଷ ସ୍ଥାନରେ ରହିଥିବାରୁ ସେମାନେ ପ୍ରୋ ଲିଗ୍ରୁ ବାହାରି ନେସନ୍ସ କପ୍ରେ ଖେଳିବାକୁ ପଡ଼ିଛି।
ଏହି ପ୍ରତିଯୋଗିତା ଭାରତ ପାଇଁ ପୁନର୍ବାର ପ୍ରୋ ଲିଗ୍କୁ ଫେରିବାର ଏକ ମୁଖ୍ୟ ସୁଯୋଗ ହେବ।ଏହି ଟୁର୍ଣ୍ଣାମେଣ୍ଟରେ ଭାରତ ସହ ଆତିଥ୍ୟ ଦେଶ ନ୍ୟୁଜିଲାଣ୍ଡ, ୟୁଏସ୍ଏ, ଜାପାନ, କୋରିଆ, ଚିଲି, ସ୍କଟଲାଣ୍ଡ ଓ ଫ୍ରାନ୍ସ ଦଳ ଅଂଶଗ୍ରହଣ କରିବେ। ବିଶ୍ବର ଶୀର୍ଷ ମାନ୍ୟତାପ୍ରାପ୍ତ ଦଳମାନଙ୍କ ପରେ ଥିବା ଦଳମାନଙ୍କ ପାଇଁ ଏହା ଏକ ମହତ୍ତ୍ୱପୂର୍ଣ୍ଣ ମଞ୍ଚ।ସେହିପରି ପୁରୁଷ ନେସନ୍ସ କପ୍ ଦକ୍ଷିଣ ଆଫ୍ରିକାର କେପ୍ଟାଉନରେ ଜୁନ୍ ୧୧ରୁ ୨୦ ପର୍ଯ୍ୟନ୍ତ ଆୟୋଜିତ ହେବ।
ଏଥିରେ ଫ୍ରାନ୍ସ, ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା, ଜାପାନ, ମାଲେସିଆ, ସ୍କଟଲାଣ୍ଡ ଓ ଆୟର୍ଲାଣ୍ଡ ଦଳ ଭାଗ ନେବେ। ନେସନ୍ସ କପ୍ରେ ବିଜୟୀ ଦଳ ପ୍ରୋ ଲିଗ୍ରେ ଖେଳିବା ପାଇଁ ଯୋଗ୍ୟତା ଅର୍ଜନ କରିଥାଏ। ଏହି ପରିସ୍ଥିତିରେ ଭାରତୀୟ ମହିଳା ଦଳ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ଅବସର ଭାବେ ଦେଖାଯାଉଛି।
