ନ୍ୟୁଜ ଡେକ୍ସ : ପଶ୍ଚିମ ଏସିଆରେ ପୁଣି ଥରେ ଉତ୍ତେଜନା ବଢ଼ିଛି। ଆମେରିକା ଓ ଇରାନ ମଧ୍ୟରେ ଯୁଦ୍ଧବିରତି ଚୁକ୍ତି ହେବାର କିଛିଦିନ ପରେ ପୁଣି ଉଭୟ ପକ୍ଷ ପରସ୍ପର ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିଛନ୍ତି। ଏହାଫଳରେ ସମଗ୍ର ଅଞ୍ଚଳରେ ପୁଣି ଅସ୍ଥିରତା ଦେଖାଦେଇଛି।ସୂଚନା ଅନୁସାରେ, ଇରାନ ପକ୍ଷରୁ ଏକ ତୈଳବାହୀ ଜାହାଜ ଉପରେ ଡ୍ରୋନ ଆକ୍ରମଣ ପରେ ଆମେରିକା ତେହେରାନର କିଛି ସାମରିକ ଘାଟି ଓ ଡ୍ରୋନ କେନ୍ଦ୍ରକୁ ଲକ୍ଷ୍ୟ କରି ବିମାନ ଆକ୍ରମଣ କରିଛି।
ଏହା ପରେ ଉଭୟ ଦେଶ ମଧ୍ୟରେ ତିକ୍ତତା ଆହୁରି ବଢ଼ିଛି।ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ଇରାନ ଯଦି ଯୁଦ୍ଧବିରତି ଉଲ୍ଲଂଘନ ଜାରି ରଖେ, ତେବେ ଆମେରିକା ପକ୍ଷରୁ ଆହୁରି କଠୋର ସାମରିକ ପଦକ୍ଷେପ ନିଆଯିବ। ଏହି ଚେତାବନୀ ପରେ ଅଞ୍ଚଳରେ ଚିନ୍ତା ବଢ଼ିଛି।ଅନ୍ୟପଟେ, ଇରାନ ପକ୍ଷରୁ ହର୍ମୁଜ ପ୍ରଣାଳୀ ନିକଟରେ ଯାଉଥିବା ଏକ ତୈଳବାହୀ ଜାହାଜକୁ ଡ୍ରୋନ ମାଧ୍ୟମରେ ଲକ୍ଷ୍ୟ କରାଯାଇଥିବା କୁହାଯାଉଛି। ଏହି ଜାହାଜରେ ବହୁ ପରିମାଣର ଅଶୋଧିତ ତୈଳ ରହିଥିଲା।
ଏହା ପରେ ଆମେରିକା ପୁଣି ଥରେ ପ୍ରତିଆକ୍ରମଣ କରିଥିବା ସୂଚନା ମିଳିଛି।ଏହି ପରିସ୍ଥିତି ମଧ୍ୟରେ ଲେବାନନରେ ମଧ୍ୟ ଉତ୍ତେଜନା ବଢ଼ିଛି। ଇସ୍ରାଏଲ ପକ୍ଷରୁ ଦକ୍ଷିଣ ଲେବାନନର କିଛି ସ୍ଥାନରେ ଆକ୍ରମଣ କରାଯାଇଥିବାବେଳେ ହିଜବୋଲା ଯୁଦ୍ଧବିରତି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି। ଦକ୍ଷିଣ ଲେବାନନରୁ ଇସ୍ରାଏଲୀ ସେନା ସମ୍ପୂର୍ଣ୍ଣ ପ୍ରତ୍ୟାହାର ନହେବା ପର୍ଯ୍ୟନ୍ତ ସହଯୋଗ କରାଯିବ ନାହିଁ ବୋଲି ହିଜବୋଲା ସ୍ପଷ୍ଟ କରିଛି। ଏହାଫଳରେ ପଶ୍ଚିମ ଏସିଆର ସୁରକ୍ଷା ପରିସ୍ଥିତି ଆହୁରି ଜଟିଳ ହୋଇପଡ଼ିଛି।
