ନ୍ୟୁଜ ଡେକ୍ସ : ଭାରତ ଓ ଆମେରିକା ମଧ୍ୟରେ ପ୍ରସ୍ତାବିତ ମଧ୍ୟବର୍ତ୍ତୀକାଳୀନ ବାଣିଜ୍ୟ ଚୁକ୍ତିର ବିବରଣୀକୁ ଚୂଡ଼ାନ୍ତ ରୂପ ଦେବା ପାଇଁ ସୋମବାରଠାରୁ ଚାରି ଦିନିଆ ଉଚ୍ଚସ୍ତରୀୟ ବୈଠକ ଆରମ୍ଭ ହେଉଛି। ଏହି ବୈଠକରେ ଉଭୟ ଦେଶର ମୁଖ୍ୟ ବାଣିଜ୍ୟ ଆଲୋଚନାକାରୀମାନେ ଅଂଶଗ୍ରହଣ କରିବେ।ଆମେରିକା ପକ୍ଷରୁ ମୁଖ୍ୟ ଆଲୋଚନାକାରୀ ବ୍ରେଣ୍ଡନ ଲିଞ୍ଚ ନେତୃତ୍ୱ ନେଉଥିବା ବେଳେ ଭାରତ ପକ୍ଷରୁ ବାଣିଜ୍ୟ ବିଭାଗର ଅତିରିକ୍ତ ସଚିବ ଦର୍ପଣ ଜୈନ ଆଲୋଚନାର ନେତୃତ୍ୱ ନେବେ।
ଫେବୃଆରିରେ ଉଭୟ ଦେଶ ଏକ ମଧ୍ୟବର୍ତ୍ତୀକାଳୀନ ବାଣିଜ୍ୟ ଚୁକ୍ତିର ଢାଞ୍ଚା ଉପରେ ସହମତି ପ୍ରକାଶ କରିଥିଲେ। ବର୍ତ୍ତମାନ ଏହାର ଆଇନଗତ ଏବଂ ପ୍ରକ୍ରିୟାଗତ ଦିଗଗୁଡ଼ିକୁ ଚୂଡ଼ାନ୍ତ କରିବା ଉପରେ ଗୁରୁତ୍ୱ ଦିଆଯିବ।ଫେବୃଆରି ୭ରେ ଜାରି ହୋଇଥିବା ମିଳିତ ବିବୃତ୍ତିରେ ଉଭୟ ଦେଶ ପାରସ୍ପରିକ ଲାଭଦାୟକ ବାଣିଜ୍ୟ ସମ୍ପର୍କକୁ ଆହୁରି ମଜଭୁତ କରିବା ଲକ୍ଷ୍ୟରେ ଏହି ଚୁକ୍ତି ପାଇଁ ଢାଞ୍ଚା ଉପରେ ସହମତ ହୋଇଥିଲେ। ଏହି ଚୁକ୍ତି ଭାରତ-ଆମେରିକା ଦ୍ୱିପାକ୍ଷିକ ବାଣିଜ୍ୟ ସମ୍ପର୍କକୁ ନୂଆ ଦିଗ ଦେବ ବୋଲି ଆଶା କରାଯାଉଛି।
ଏହାବ୍ୟତୀତ ଭାରତ ଓ ଓମାନ ମଧ୍ୟରେ ମୁକ୍ତ ବାଣିଜ୍ୟ ଚୁକ୍ତି (ଏଫ୍ଟିଏ) ଆଜିଠାରୁ କାର୍ଯ୍ୟକାରୀ ହେବ। ଉଭୟ ଦେଶ ସୋମବାର ଏହି ନିଷ୍ପତ୍ତିକୁ ଆନୁଷ୍ଠାନିକ ଭାବେ ଘୋଷଣା କରିବେ।ବାଣିଜ୍ୟ ବିଶେଷଜ୍ଞମାନଙ୍କ ମତରେ, ଏହି ଆଲୋଚନା ଏବଂ ଚୁକ୍ତିଗୁଡ଼ିକ ଭାରତର ରପ୍ତାନି, ବିନିଯୋଗ ଓ ଅର୍ଥନୈତିକ ସହଯୋଗକୁ ଆହୁରି ସୁଦୃଢ଼ କରିବାରେ ସହାୟକ ହେବ। ଉଭୟ ଦେଶ ମଧ୍ୟରେ ବାଣିଜ୍ୟିକ ସମ୍ପର୍କକୁ ନୂଆ ଉଚ୍ଚତାରେ ପହଞ୍ଚାଇବା ପାଇଁ ଏହି ବୈଠକକୁ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି।
