ନ୍ୟୁଜ ଡେକ୍ସ : ଆମେରିକା ସରକାର ପ୍ରବାସନ ନୀତିରେ ଏକ ବଡ଼ ଏବଂ କଡ଼ା ପଦକ୍ଷେପ ଗ୍ରହଣ କରିଛି। ରୁଷ, ଇରାନ, ଆଫଗାନିସ୍ତାନ ସମେତ ୭୫ଟି ଦେଶର ନାଗରିକଙ୍କ ପାଇଁ ଭିସା ପ୍ରକ୍ରିୟାକରଣ ଅସ୍ଥାୟୀ ଭାବେ ବନ୍ଦ କରିବାକୁ ଆମେରିକା ନିଷ୍ପତ୍ତି ନେଇଛି। ଏହି ନୂଆ ନୀତି ଜାନୁଆରୀ ୨୧ ତାରିଖରୁ କାର୍ଯ୍ୟକାରୀ ହେବ।
ଆମେରିକୀୟ ଷ୍ଟେଟ୍ ଡିପାର୍ଟମେଣ୍ଟ ସୂଚନା ଅନୁଯାୟୀ, ସାର୍ବଜନୀନ ସୁବିଧା ଉପରେ ନିର୍ଭର କରିବାର ଉଚ୍ଚ ବିପଦ ଥିବା ଆବେଦନକାରୀଙ୍କୁ ଚିହ୍ନଟ କରିବା ଓ ସେମାନଙ୍କୁ ଭିସା ନ ଦେବା ପାଇଁ ଏହି କଡ଼ା ପଦକ୍ଷେପ ନିଆଯାଇଛି। ଇମିଗ୍ରେସନ୍ ଆଇନ ଅନୁଯାୟୀ କନସୁଲାର୍ ଅଧିକାରୀମାନଙ୍କୁ ଭିସା ପ୍ରତ୍ୟାଖ୍ୟାନ କରିବାକୁ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି।ଏହି ପ୍ରତିବନ୍ଧକ ଅନ୍ତର୍ଗତ ଯେଉଁ ଦେଶଗୁଡ଼ିକ ରହିଛନ୍ତି, ସେମାନଙ୍କ ମଧ୍ୟରେ ରୁଷ, ସୋମାଲିଆ, ଆଫଗାନିସ୍ତାନ, ଇରାକ, ଇଜିପ୍ଟ, ବ୍ରାଜିଲ, ଇରାନ, ନାଇଜେରିଆ, ଥାଇଲ୍ୟାଣ୍ଡ ଏବଂ ୟେମେନ ଅଛନ୍ତି। ବିଶେଷକରି ସୋମାଲିଆ ଉପରେ ଆମେରିକା ଅଧିକ କଡ଼ା ନଜର ରଖିଛି।
ମିନିଆପୋଲିସରେ ଘଟିଥିବା ଏକ ବଡ଼ ଠକେଇ ମାମଲା ପରେ ସୋମାଲିଆ ସଂପୃକ୍ତ ପ୍ରବାସୀମାନଙ୍କ ଉପରେ ସନ୍ଦେହ ଗଭୀର ହୋଇଛି। ଏହି ମାମଲାରେ କରଦାତାଙ୍କ ଟଙ୍କାରେ ଚାଲୁଥିବା ସରକାରୀ ଲାଭ ଯୋଜନାର ଅପବ୍ୟବହାର ପ୍ରକାଶ ପାଇଥିବା ଜଣାପଡ଼ିଛି, ଯେଉଁଥିରେ ଅନେକ ସୋମାଲି ଓ ସୋମାଲି-ଆମେରିକୀୟ ସଂପୃକ୍ତ ଥିଲେ।ନଭେମ୍ବର ୨୦୨୫ରେ ଜାରି ହୋଇଥିବା ଏକ ଷ୍ଟେଟ୍ ଡିପାର୍ଟମେଣ୍ଟ କେବୁଲ ଅନୁଯାୟୀ, ସ୍ୱାସ୍ଥ୍ୟ, ବୟସ, ଇଂରାଜୀ ଦକ୍ଷତା, ଆୟ ସମ୍ଭାବନା ଓ ଦୀର୍ଘକାଳୀନ ଚିକିତ୍ସା ଆବଶ୍ୟକତା ଭଳି ବିଷୟକୁ ମୂଲ୍ୟାଙ୍କନ କରି ଭିସା ନିଷ୍ପତ୍ତି ନିଆଯିବ।ଷ୍ଟେଟ୍ ଡିପାର୍ଟମେଣ୍ଟ ସ୍ପଷ୍ଟ କରିଛି ଯେ, ଆମେରିକୀୟ ସାର୍ବଜନୀନ ସୁବିଧାର ଅପବ୍ୟବହାରକୁ ରୋକିବା ଏବଂ ଦେଶର ଆର୍ଥିକ ଓ ସାମାଜିକ ସୁରକ୍ଷାକୁ ସୁଦୃଢ଼ କରିବା ପାଇଁ ଏହି ପଦକ୍ଷେପ ଗ୍ରହଣ କରାଯାଇଛି। ପ୍ରବାସନ ପ୍ରକ୍ରିୟାର ସମ୍ପୂର୍ଣ୍ଣ ସମୀକ୍ଷା ସମ୍ପନ୍ନ ହେଉନଥିବା ପର୍ଯ୍ୟନ୍ତ, ଏହି ୭୫ ଦେଶରୁ ଭିସା ପ୍ରକ୍ରିୟାକରଣ ବନ୍ଦ ରହିବ।
