ନ୍ୟୁଜ ଡେକ୍ସ : ଇରାନ ସହିତ ଚାଲିଥିବା ଯୁଦ୍ଧବିରତି ମଧ୍ୟରେ ଆମେରିକାରୁ ଆସିଛି ଏକ ଚମତ୍କାରକ ଓ ଚିନ୍ତାଜନକ ସନ୍ଦେଶ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହଠାତ୍ ଏକ ଏମିତି ଘୋଷଣା କରିଛନ୍ତି, ଯାହା ପରେ ବିଶ୍ୱ ରାଜନୀତିରେ ତୀବ୍ର ଚଞ୍ଚଳତା ସୃଷ୍ଟି ହୋଇଛି। ଟ୍ରମ୍ପ ସ୍ପଷ୍ଟ କରିଛନ୍ତି ଯେ ଇରାନକୁ ଯେକୌଣସି ଦେଶ ଯଦି ଅସ୍ତ୍ରଶସ୍ତ୍ର ଯୋଗାଇ ସାହାଯ୍ୟ କରେ, ସେହି ଦେଶ ଉପରେ ୫୦ ପ୍ରତିଶତ ଭାରି ଶୁଳ୍କ ଲାଗୁ କରାଯିବ।
ଏହି ନିଷ୍ପତ୍ତିରେ କୌଣସି ଛାଡ଼ ନ ଥିବାକୁ ସେ ସଫା ମନା କରିଦେଇଛନ୍ତି। ତାଙ୍କର ଏହି କଠୋର ଭାବଭଙ୍ଗୀ ପଛରେ କଣ ଯୋଜନା ରହିଛି, ସେଥିପାଇଁ ଏବେ ସମସ୍ତଙ୍କ ମଧ୍ୟରେ ଉତ୍ସୁକତା ବଢ଼ିଛି।ଏହା ସହିତ ଟ୍ରମ୍ପ କହିଛନ୍ତି ଯେ ଇରାନରେ ଆଉ ୟୁରାନିୟମ୍ ସମୃଦ୍ଧି ହେବ ନାହିଁ। ଆମେରିକା ଏବେ ଇରାନ ସହିତ ମିଶି କାମ କରିବାକୁ ପ୍ରସ୍ତୁତ, କିନ୍ତୁ ଏହା ପଛରେ ରହିଛି କଠିନ ସର୍ତ୍ତ। ସେ ଦାବି କରିଛନ୍ତି ଯେ ଇରାନର ପରମାଣୁ କେନ୍ଦ୍ରଗୁଡ଼ିକ ଉପରେ ସତତ ନଜର ରଖାଯାଉଛି, ଯାହା ଆଗାମୀ ପଦକ୍ଷେପକୁ ଆହୁରି ଗୁରୁତ୍ୱପୂର୍ଣ୍ଣ କରୁଛି।ଏହି ଘୋଷଣା ପରେ ବଡ଼ ପ୍ରଶ୍ନ ଉଠିଛି କେଉଁ କେଉଁ ଦେଶ ଏହାର ପ୍ରଭାବରେ ପଡ଼ିବେ? ଯଦି ଏହି ଶୁଳ୍କ ବାସ୍ତବରେ ଲାଗୁ ହୁଏ, ତେବେ ସେହି ଦେଶଗୁଡ଼ିକରୁ ଆମେରିକାକୁ ଯାଉଥିବା ସାମଗ୍ରୀ ହଠାତ୍ ମହଙ୍ଗା ହୋଇଯିବ।
ଏହା ବିଶ୍ୱ ବାଣିଜ୍ୟରେ ଏକ ନୂଆ ସଂକଟ ସୃଷ୍ଟି କରିପାରେ। ଅନ୍ୟପଟେ, ପଶ୍ଚିମ ଏସିଆରେ ଆଗରୁ ରହିଥିବା ଉତ୍ତେଜନା ମଧ୍ୟରେ ଏହି ଘୋଷଣା ଆଗୁନରେ ଘିଅ ପକାଇବା ସମାନ ବୋଲି ମନେ କରାଯାଉଛି। ଟ୍ରମ୍ପ ଏହା ମଧ୍ୟ ସୂଚନା ଦେଇଛନ୍ତି ଯେ ଶୁଳ୍କ କମେଇବା ନେଇ ଆଲୋଚନା ହେବ, କିନ୍ତୁ କେବେ ଏବଂ କେମିତି ସେଥିପାଇଁ କୌଣସି ସ୍ପଷ୍ଟତା ନାହିଁ।ଏବେ ସମସ୍ତଙ୍କ ଦୃଷ୍ଟି ରହିଛି ଇରାନ କେମିତି ପ୍ରତିକ୍ରିୟା ଦେବ? ଏବଂ ବିଶ୍ୱର ଅନ୍ୟାନ୍ୟ ଶକ୍ତିଶାଳୀ ଦେଶମାନେ କେଉଁ ପକ୍ଷ ନେବେ? ଏହି ନିଷ୍ପତ୍ତି ଆଗାମୀ ଦିନରେ ବିଶ୍ୱ ରାଜନୀତିକୁ କେଉଁ ଦିଗକୁ ନେବ, ସେ ନେଇ ସମସ୍ତଙ୍କ ନଜର ।
