ନ୍ୟୁଜ ଡେକ୍ସ : ଓଡ଼ିଶା ଶିକ୍ଷକ ଯୋଗ୍ୟତା ପରୀକ୍ଷା ଓଡ଼ିଶା ଟିଚର୍ ଇଲିଜିବିଲିଟି ଟେଷ୍ଟ (ଓଟିଇଟି) ୨୦୨୬ ପାଇଁ ଆବେଦନ ସମୟକୁ ବୋର୍ଡ ପକ୍ଷରୁ ବଢ଼ାଇ ଦିଆଯାଇଛି। ପୂର୍ବରୁ ଆବେଦନର ଶେଷ ସମୟ ଗୁରୁବାର ରାତି ୧୨ଟା ପର୍ଯ୍ୟନ୍ତ ଧାର୍ଯ୍ୟ ଥିଲା, କିନ୍ତୁ ବିଭିନ୍ନ କାରଣରୁ ଅନେକ ପ୍ରାର୍ଥୀ ନିର୍ଦ୍ଧାରିତ ସମୟରେ ଆବେଦନ କରିପାରିନଥିବାରୁ ସେମାନଙ୍କୁ ଆଉ ଏକ ସୁଯୋଗ ଦିଆଯାଇଛି।
ଏବେ ଆଶାୟୀ ପ୍ରାର୍ଥୀମାନେ ମେ’ ମାସ ୯ ତାରିଖ ପର୍ଯ୍ୟନ୍ତ ଆବେଦନ କରିପାରିବେ।ବୋର୍ଡର ଏହି ସିଦ୍ଧାନ୍ତରେ ଅନେକ ଆଶାୟୀଙ୍କ ମଧ୍ୟରେ ଖୁସିର ପରିବେଶ ଦେଖାଯାଇଛି। ବିଶେଷକରି ଯେଉଁମାନେ ପ୍ରାରମ୍ଭିକ ସମୟ ସୀମା ମଧ୍ୟରେ ଆବେଦନ କରିପାରିନଥିଲେ, ସେମାନଙ୍କ ପାଇଁ ଏହା ବଡ଼ ସୁଯୋଗ ହୋଇଛି। ଏହି ସମୟ ବୃଦ୍ଧି ଫଳରେ ଅଧିକ ସଂଖ୍ୟକ ପ୍ରାର୍ଥୀ ପରୀକ୍ଷାରେ ଯୋଗଦେବାର ସୁଯୋଗ ପାଇବେ ବୋଲି ଆଶା କରାଯାଉଛି।ଅଦ୍ୟାବଧି ମିଳିଥିବା ସୂଚନା ଅନୁଯାୟୀ, ଏହି ପରୀକ୍ଷା ପାଇଁ ୭୦ ହଜାରରୁ ଅଧିକ ପ୍ରାର୍ଥୀ ଆବେଦନ କରିସାରିଛନ୍ତି। ଏହି ସଂଖ୍ୟା ଦିନକୁ ଦିନ ବଢ଼ୁଥିବାବେଳେ, ଆଗାମୀ ଦିନରେ ଏହା ଆହୁରି ବୃଦ୍ଧି ପାଇବାର ସମ୍ଭାବନା ରହିଛି।
ଆବେଦନକାରୀଙ୍କ ମଧ୍ୟରେ ବହୁ ସଂଖ୍ୟକ ଇନ୍ସର୍ଭିସ୍ ଶିକ୍ଷକମାନେ ମଧ୍ୟ ରହିଥିବା ଖବର ମିଳିଛି, ଯେଉଁମାନେ ନିଜ ଯୋଗ୍ୟତାକୁ ଅଧିକ ସୁଦୃଢ଼ କରିବା ପାଇଁ ଏହି ପରୀକ୍ଷାରେ ଭାଗ ନେଉଛନ୍ତି। ଏକ ମାସରୁ ଅଧିକ ସମୟ ଆବେଦନ ପାଇଁ ମିଳିଥିବାରୁ ଆହୁରି ଅନେକ ପ୍ରାର୍ଥୀ ଏହାର ଲାଭ ଉଠାଇବେ। ଏହା ଫଳରେ ମୋଟ ଆବେଦନକାରୀଙ୍କ ସଂଖ୍ୟା ୧ ଲକ୍ଷ ଅତିକ୍ରମ କରିପାରେ ବୋଲି ଶିକ୍ଷା ମହଳରେ ଚର୍ଚ୍ଚା ଚାଲିଛି।ଓଟିଇଟି ପରୀକ୍ଷା ଓଡ଼ିଶାରେ ଶିକ୍ଷକ ହେବା ପାଇଁ ଏକ ମୁଖ୍ୟ ଯୋଗ୍ୟତା ପରୀକ୍ଷା ଭାବେ ପରିଚିତ। ଏହି ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ପ୍ରାର୍ଥୀମାନେ ଶିକ୍ଷକ ପଦବୀ ପାଇଁ ଯୋଗ୍ୟ ହୋଇଥାନ୍ତି।
ସେହିପରି ଏହି ପରୀକ୍ଷା ପ୍ରତି ଆଗ୍ରହ ଦିନକୁ ଦିନ ବଢ଼ୁଥିବା ଦେଖାଯାଉଛି।ବୋର୍ଡ ପକ୍ଷରୁ ପ୍ରାର୍ଥୀମାନଙ୍କୁ ସମୟ ମଧ୍ୟରେ ନିଜ ଆବେଦନ ପ୍ରକ୍ରିୟା ସମାପ୍ତ କରିବାକୁ ଅନୁରୋଧ କରାଯାଇଛି, ଯାହାଦ୍ୱାରା ଶେଷ ମୁହୂର୍ତ୍ତରେ କୌଣସି ପ୍ରାଯୁକ୍ତିକ ସମସ୍ୟା ଦେଖାନଦିଏ। ଏହି ସୁଯୋଗକୁ ଲାଭ କରି ଅଧିକ ସଂଖ୍ୟକ ଯୋଗ୍ୟ ପ୍ରାର୍ଥୀ ପରୀକ୍ଷାରେ ଭାଗ ନେବେ ବୋଲି ଆଶା କରାଯାଉଛି।
